gospels_to_acts_1892.md

digitization-url	https://books.google.de/books?id=huw9AAAAYAAJ
digitization-attribution	Google Books, original from Harvard University
transcription-license	https://creativecommons.org/licenses/by/4.0/
transcription-attribution	Brandon Seah (https://learn-teochew.github.io)
metadata-fields	digitization-url digitization-license digitization-attribution transcription-license transcription-attribution URL for digital scan of source that was consulted to make the text transcription License for digital scan images (not the source text itself) Creator or publisher of digital scan who has released the scan under above license License for transcription of the source (text only, not the images), i.e. this document Creator or publisher of the text transcription

Kiù-tsú Iâ-sou Ki-tok kâi Sin-ieh Tshuân-tsṳ : Chiēⁿ-kńg Má-thài kàu Sài-thû.

Su-kat-lân : Tãi Eng-kok Lãi Gūa Siàⁿ-tsṳ-hũe ìn. 1892.

Matthew to Acts : Swatow dialect.

Printed for the British and Foreign Bible Society by Blackie & Son, Limited, Glasgow.

Má-thài Hok-im-tsṳ.

1

Iâ-sou Ki-tok, chiũ-sĩ A-pek-la̍h-hán kâi kiáⁿ-sun, iā sĩ Tã-phek kâi kiáⁿ-sun, I kâi tso̍k-phóu.

[2] A-pek-la̍h-hán seⁿ Íⁿ-sat; Íⁿ-sat seⁿ Iá-kok; Iá-kok seⁿ Iû-tã kũa i-kâi hiaⁿ-tĩ; [3] Iû-tã tshông-tõ Tã-má seⁿ Huap-le̍k-sṳ̃ kũa Sat-la̍h; Huap-le̍k-sṳ̃ seⁿ Íⁿ-sṳ̃-lûn; [4] Ín-sṳ̃-lûn seⁿ A-lân; A-lân seⁿ A-mí-ná-ta̍t; A-mí-ná-ta̍t seⁿ Ná-sũn; [5] Ná-sũn seⁿ Sàn-bûn: Sàn-bûn tshông-tõ La̍h-ha̍p seⁿ Po-sṳ̃; Po-sṳ̃ tshông-tõ Lũ-tit seⁿ O-pek; O-pek seⁿ Iâ-si; [6] Iâ-si seⁿ Tã-phek uâng.

[7] Tâ-phek tshông tõ U-lĩ-a kâi chhi seⁿ Só-lô-mn̂g; Só-lô-mn̂g seⁿ Lô-po-àm; Lô-po-àm seⁿ A-pí-a; A-pí-a seⁿ A-sat; [8] A-sat seⁿ Iak-sa-huap; Iak-sa-huap seⁿ Iak-lân; [9] Iak-lân seⁿ U-si-a; U-si-a seⁿ Iak-tàn; Iak-tàn seⁿ A-hap-sṳ̃; [10] A-hap-sṳ̃ seⁿ Hi-si-kia; Hi-si-kia seⁿ Má-ná-si; Má-ná-sí seⁿ A-mn̂g; [11] A-mn̂g seⁿ Iak-si-a; Iak-si-a seⁿ Iâ-ko-nî-a kũa i-kâi hiaⁿ-tĩ, chiũ-sĩ mîn pĩ-súa khṳ̀ Pa-pí-lûn kâi sî-hāu.

[12] Mîn pĩ-súa khṳ̀ Pa-pí-lûn ãu, Iâ-ko-nî-a seⁿ Sat-la̍h-thiet; [13] Sat-la̍h-thiet seⁿ Só-lô-pa-pek; Só-lô-pa-pek seⁿ A-pí-ut; A-pí-ut seⁿ Íⁿ-lĩ-a-kim; Íⁿ-lĩ-a-kim seⁿ A-só; [14] A-só seⁿ Sat-to̍k; Sat-to̍k seⁿ A-kim; A-kim seⁿ Íⁿ-lu̍t; [15] Íⁿ-lu̍t seⁿ Íⁿ-lĩ-a-sat; Íⁿ-lĩ-a-sat seⁿ Má-tàn; Má-tàn seⁿ Iá-kok; [16] Iá-kok seⁿ Iak-sek, Iak-sek chiũ-sĩ Má-lĩ-a kâi chiãng-hu. Má-lĩ-a seⁿ Iâ-sou, chiũ-sĩ chheng-tsò Ki-tok.

[17] Chièn-seⁿ tsṳ̃ A-pek-la̍h-hán chì-kàu Tã-phek kâi sì-tō kāng ũ tsa̍p-sì tō: tsṳ̃ Tã-phek chì-kàu pĩ-súa khṳ̀ Pa-pí-lûn iũ--sĩ tsa̍p-sì tō; tsṳ̃ pĩ-súa Pa-pí-lûn chì-kàu Ki-tok iũ--sĩ tsa̍p-sì tō.

[18] Iâ-sou Ki-tok seⁿ kâi sṳ̄-chhêng sĩ àn-chièⁿ-seⁿ: I kâi a-bó Má-lĩ-a íⁿ-keng hṳ́-phiàⁿ Iak-sek, nõ-nâng būe-chêng tsò-pû, thóiⁿ-tshut i ũ sin-hūn, chiũ-sĩ tshông-tõ Siàⁿ-sîn chiũ-ũ--kâi. [19] I kâi chiãng-hu Iak-sek sĩ ngĩ-jîn, iā m̄-kam zo̍k--i pun chèng-nâng thóiⁿ, siẽⁿ àiⁿ àm-chẽⁿ hiuⁿ-tiāu. [20] Nā-sĩ chiàⁿ-tõ-siẽⁿ chí tsùaⁿ-kâi-sṳ̄ Tsú kâi sài-chiá tõ māng--tang hién-hīn, tùi-i tàⁿ, Tã-phek kâi kiáⁿ-sun Iak-sek a, lṳ́ tie̍h-tshūa lṳ́-kâi-chhi Má-lĩ-a kui lṳ́, mài kiaⁿ-gî; in-ũi i só-siũ kâi tho sĩ tshông-tõ Siàⁿ-sîn. [21] I chiang-àiⁿ-seⁿ lâm-jî, lṳ́ tie̍h chheng I kâi miâⁿ tsò Iâ-sou, in-ũi sĩ I àiⁿ-kiù I kâi mîn thut-tshut in-kâi tsũe-ak. [22] Chí tsùaⁿ-kâi sṳ̄ tsò-chiâⁿ, chiũ-sĩ lâi èng-ngiām Tsú thoh soiⁿ-tsai-nâng só-tàⁿ kâi ūe, sĩ tàⁿ,

[23] Che̍k-kâi nńg-tsṳ́ chiang-àiⁿ siũ-tho, seⁿ lâm-jî,

Nâng chiũ àiⁿ chheng I kâi miâⁿ tsò Íⁿ-má-nũi-lĩ;

[24] huan-e̍k chiũ-sĩ Siãng-tì kāng-nán tsò-pû-tõ. Iak-sek u̍t-chhéⁿ khí-lâi, chiũ tsun-kiâⁿ Tsú sài-chiá kâi mẽng, tshūa i-kâi-chhi lâi; [25] būe-chêng kāng-i tâng-pâng thãi-kàu seⁿ-kiáⁿ, chheng kiáⁿ kâi miâⁿ tsò Iâ-sou.

2

Iâ-sou íⁿ-keng tõ Hi-lu̍t uâng kâi sî-hāu tshut-sì tõ Iû-thài kâi Pek-lĩ-hêng, ũ phak-sṳ̃ tshông-tõ tang-pôiⁿ kàu Iâ-lũ-sat-lêng, tàⁿ, [2] Seⁿ-tshut-sì tsò Iû-thài-nâng uâng kâi, tõ-tî-kò? Uń tõ tang-pôiⁿ thóiⁿ-kìⁿ i-kâi-chheⁿ, kù-tshṳ́ chiũ lâi-pài i. [3] Hi-lu̍t uâng che̍k thiaⁿ-tie̍h chiũ kiaⁿ-lṳ̃ hãm Iâ-lũ-sat-léng iā tsò-che̍k-ē kiaⁿ-lṳ̃. [4] Hi-lu̍t tsũ-chi̍p tsu-ūi chì-si-chiáng, kũa mîn--kan kâi tha̍k-tsṳ-nâng, chiũ mn̄g in Ki-tok eng-kai tõ-tî-kò tshut-sì. [5] In chiũ ìn--i, tàⁿ, Tõ Iû-thài kâi Pek-lĩ-hêng, in-ũi thoh tõ soiⁿ-tsai-nâng chièⁿ-seⁿ kì-tsài, tàⁿ,

[6] Iû-tã tī, Pek-lĩ-hêng, a,

Tõ Iû-tã kun-chiáng--tang lṳ́ si̍t m̄-sĩ tsùe-sòi--kâi:

In-ũi ũ kun àiⁿ tshông-tõ lṳ́--kò tshut--lâi,

Lâi mo̍k-iáng uá-kâi Íⁿ-sek-lie̍t mîn.

[7] Aũ--liáu Hi-lu̍t mi̍t-mi̍t tiãu phak-sṳ̃ lâi tùi-in siâng-mn̄g hīn kâi chheⁿ sĩ-mih sî-hāu. [8] Chiũ sái in khṳ̀ Pek-lĩ-hêng, iũ tàⁿ, Nín khṳ̀ sòi-huáng hṳ́-kâi eng-jî; tshūe--tie̍h-liáu, chiũ lâi pò-uá-tsai, sái uá iā hó lâi-pài i. [9] Tsùaⁿ-nâng thiaⁿ--liáu kun-uâng kâi ūe chiũ khí-kiâⁿ; in tsá tõ tang-pôiⁿ só-thóiⁿ-kìⁿ kâi chheⁿ, ã! tshūa tõ-thâu-tsôiⁿ chì-kàu eng-jî só-tõ kâi ūi-tshṳ̀, chiũ thêng-tiām tõ-hṳ́-téng. [10] In thóiⁿ-kìⁿ hṳ́-kâi-chheⁿ chiũ tūa huaⁿ-hí kàu-ke̍k. Ta̍h-ji̍p tshù-lãi, chiũ thóiⁿ-kìⁿ eng-jî kũa I-kâi a-bó Má-lĩ-a chiũ phak-lo̍h tī pài eng-jî; khui--liáu in-kâi pó-khì, chiũ khie̍h lói-mue̍h lâi chìn-hièn eng-jî, chiũ-sĩ n̂g-kim, zú-hieⁿ, mu̍t-ie̍h. [12] Phak-sṳ̃ tõ māng--tang siũ chí-sī, hàm in mài tńg--khṳ̀ Hi-lu̍t--kò, chiũ tshông-tõ pa̍t-tiâu-lōu kui-tńg in-kâi pńg-tī.

[13] In tsùaⁿ-nâng tńg--khṳ̀ ãu, Tsú kâi sài-chiá tõ māng--tang hién-hīn tùi Iak-sek tàⁿ, Khí--lâi, tùa eng-jî kūa I-kâi a-bó tsáu-khṳ̀ Ai-ki̍p, nā hṳ́-kò thãi uá lâi kāng-lṳ́ tàⁿ: in-ũi Hi-lu̍t àiⁿ-tshūe eng-jî lâi-suah I. [14] I chiũ khí--lâi sêng-mê tùa eng-jî kũa I-kâi a-bó, khṳ̀ Ai-ki̍p: [15] khiã-khí tõ-hṳ́-kò chì-kàu Hi-lu̍t- sí: sái Tsú só-thoh soiⁿ-tsai-nâng kâi ūe èng-ngiām, chiũ-sĩ tàⁿ, Uá chêng-tiãu uá-kâi-kiáⁿ tshut Ai-ki̍p.

[16] Hi-lu̍t che̍k-tsai sĩ pĩ phak-sṳ̃ só khin-buãn chiũ tūa náu-khì, sái nâng chiang Pek-lĩ-hêng kũa só-so̍k kâi kài-lãi só-ũ kâi lâm-jî, huâm ũ nõ-hùe íⁿ-ẽ--kâi che̍k-khài suah-mi̍t, chiũ-sĩ chiè i sòi-mn̄g phak-sṳ̃ kâi sî-hāu. [17] Tsá thoh soiⁿ-tsai-nâng Iâ-lĩ-mí só-tàⁿ kâi ūe hṳ́-sî chiũ èng-ngiām--liáu; sĩ-tàⁿ,

[18] Tõ La̍h-má thiaⁿ-kìⁿ ũ siaⁿ,

Ai-khàu tūa pui-tshoih,

La̍h-kiet khàu i-kâi-kiáⁿ;

In-ũi in bô-tshûn kâi uân-kù chiũ m̃-siũ uaⁿ-ùe.

[19] Kàu Hi-lu̍t sí--liáu, Tsú kâi sài-chiá tõ Ai-ki̍p hién-māng kāng Iak-sek tàⁿ, [20] Hó khí-sin tùa eng-jî kũa I kâi a-bó, khṳ̀ kàu Íⁿ-sek-lie̍t tī, in-ũi soiⁿ chhîm-hāi eng-jî kâi sèⁿ-miāⁿ chiá-nâng taⁿ sí--liáu. [21] Iak-sek chiũ khí-sin tùa eng-jî kũa I kâi a-bó, lâi-kàu Íⁿ-sek-lie̍t tī. [22] Thiaⁿ-kìⁿ A-ki-láu tõ Iû-thài chiap i-kâi-pẽ tsò-uâng, chiũ kiaⁿ, m̄-káⁿ khṳ̀ hṳ́-kò; māng--tang siũ chí-sī chiũ thò-khui kàu Ka-lĩ-lĩ kâi kài-lãi, khiã-khí tõ che̍k-kâi siâⁿ-ip, [23] miâⁿ kiè-tsò Ná-sat-le̍k: lâi èng-ngiām chèng soiⁿ-tsai-nâng só-tàⁿ kâi ūe, chiũ-sĩ tàⁿ, I chiang-àiⁿ chheng-tsò Ná-sat-le̍k-nâng.

3

Tng hṳ́-kâi sî-hāu Si-sói Iak-hân chiũ lâi tõ Iû-thài kâi khuàng-iá thuân--tàⁿ, Tie̍h hùe-kói; [2] in-ũi thien-kok kṳ̃n--liáu. [3] Chí-kâi-nâng sĩ thoh soiⁿ-tsai Íⁿ-sài-a só-chí--kâi, sĩ tàⁿ,

Khuàng-iá--kò ũ nâng-siaⁿ u-hàm--tàⁿ,

Tie̍h-siu Tsú kâi tãu-lōu,

Phah-ti̍t I kâi lōu-kèⁿ.

[4] Chí-kâi Iak-hân kâi sin-chhēng sĩ lo̍h-tho̍h-mô chit--kâi, iā ũ phûe-tùa hâ-ie, i-kâi-chia̍h chiũ-sĩ huâng-thâng iá-bi̍t.

[5] Tng-sî Iâ-lũ-sat-léng kũa thong Iû-thài, kũa Iak-tãn sì-phìⁿ kâi tī-hng, chiũ tshut--lâi chiũ-kṳ̃n i, jīn-tshut ka-kī kâi tsũe-kùe, [6] chiũ tõ Iak-hân kâi chhiú--thâu niáⁿ sói-lói tõ Iak-tãn hô. [7] Iak-hân thóiⁿ-kìⁿ Huap-lĩ-sài kũa tàⁿ, Ak-tsûa kâi chéng-lūi a, ũ tî-tiâng chí-sī nín tô-tsáu chiang-lâi kâi náu-hêng? [8] Kù-tshṳ́ tie̍h kit-kúeⁿ lâi hû-ha̍h hùe-kói. [9] Mài tõ ka-kī sim-lãi siẽⁿ--tà, Uń ũ A-pek-la̍h-hán tsò tsóu-pẽ: uá kāng-nín tàⁿ, Siãng-tì lêng-tit tshông-tõ chí-kâi chie̍h-põu kāng A-pek-la̍h-hán heng-khí kiáⁿ-sun. [10] Taⁿ, póu-thâu íⁿ-keng hẽ tõ chhiū-kṳn--liáu: kù-tshṳ́ huâm sĩ-mih chhiū m̄-kit hó-kúeⁿ-chí, chiũ tsám-tiāu ka̍k-lo̍h húe. [11] Uá chiũ-sĩ ēng-tsúi kiâⁿ-sói tõ nín, sái nín hùe-kói: tãn-sĩ tõ uá-ãu--kò lâi--kâi pí uá kèng ũ khuân-la̍t, I kâi ôi uá iā m̄-kham-kai kāng I kũaⁿ, I chiang-àiⁿ ēng Siàⁿ-sîn kũa húe lâi kiâⁿ-sói tõ nín: [12] I kâi chhiú khie̍h pùa-ki, tõ I kâi sài-tiâⁿ àiⁿ-pùa kàu-chĩn, chiũ siu I kâi be̍h ji̍p-tshng, tãn-sĩ chí-kâi phàⁿ-khak chiũ chiang put-mi̍t kâi húe lâi-sie-tiāu.

[13] Tng-sî Iâ-sou tshông-tõ Ka-lĩ-lĩ lâi kàu Iak-tãn, chiũ Iak-hân, àiⁿ tõ i-kâi chhiú--thâu niáⁿ-sói. [14] Iak-hân sî I, chiũ tàⁿ, Uá eng-kai chiũ lṳ́ lâi-niáⁿ-sói, lṳ́ kèng-lâi chiũ uá, hóⁿ? [15] Iâ-sou chiũ tùi-i tap-tàⁿ, Taⁿ chhiáⁿ èng-hṳ́: nán chièⁿ-seⁿ uân-tshuân lói-ngĩ chiàⁿ-ha̍h. Chiũ èng-hú I. [16] Iâ-sou niáⁿ-sói liáu sûi-chiet tshông-tõ tsúi--kò chiẽⁿ-khṳ̀, thiⁿ chiũ kāng I khui, I chiũ thóiⁿ-kìⁿ Siãng-tì kâi Sîn huáng-sṳ̃ hún-chiáu kàng-lîm tõ I sin--chīeⁿ; [17] tshông-tõ thiⁿ--kò iũ ũ siaⁿ, tàⁿ, Chí-kâi sĩ uá-kâi Aì-tsṳ́, uá só-hí-zua̍t--kâi.

4

Iáu Iâ-sou khṳt Siàⁿ-sîn ín-tshūa chiẽⁿ-khṳ̀ khuàng-iá tng mô-kúi kâi iú-ho̍k. [2] Bô-chia̍h sì-tsa̍p ji̍t-mê, ãu chiũ tóu khùn. [3] Iú-ho̍k--chiá chiũ--lâi tùi I tàⁿ, Lṳ́ jia̍k-sĩ Siãng-tì kâi Kiáⁿ, chiũ hó sái chí-kâi chie̍h-põu tsò mīⁿ-pau. [4] Iâ-sou ìn--tàⁿ, Ũ kì-tsài--tàⁿ, Nâng kâi sèⁿ-miāⁿ put-to̍k sĩ kõu mīⁿ-pau, zûi-sĩ kõu Siãng-tì kâi tshùi huâm só-tshut kâi ūe.

[5] Aũ--liáu mô-kúi tùa I ji̍p siàⁿ-siâⁿ; sái I khiã tõ tōiⁿ-tn̂g kâi tshù-kak téng, tùi I tàⁿ, [6] Lṳ́ jia̍k-sĩ Siãng-tì kâi Kiáⁿ, chiũ hó chiang-sin ka̍k--lo̍h-khṳ̀: in-ũi ũ kì-tsài--tàⁿ,

Tsú ũi-tie̍h lṳ́ àiⁿ-mẽng I chèng sài-chiá;

Sài-chiá chiũ chiang-chhiú hû--lṳ́,

Mín tì-kàu lṳ́-kâi-kha tak--tie̍h chie̍h.

[7] Iâ-sou tùi-i tàⁿ, Iā ũ kì-tsài--tàⁿ, M̄-hó chhì Tsú, sĩ lṳ́-kâi Siãng-tì.

[8] Mô-kúi iũ tùa Iâ-sou kàu siãng-kûiⁿ kâi suaⁿ, chiang thiⁿ-ẽ lie̍t-kok, kũa lie̍t-kok kâi tsun-iông, kí-tiám I thóiⁿ, chiũ tùi I tàⁿ, [9] Zû-jia̍k lṳ́ ho̍k-tī lâi-pài uá, chí-tsùaⁿ-kâi uá chiũ lóng-tsóng àiⁿ-pun lṳ́. [10] Iâ-sou chiũ tùi-i tàⁿ, Sat-tãn, lṳ́ thò--khṳ̀, in-ũi ũ kì-tsài--tàⁿ, Lṳ́ tie̍h-pài Tsú, sĩ lṳ́-kâi Siãng-tì, tuaⁿ-tuaⁿ tshông-sṳ̃ I. [11] Iáu mô-kúi chiũ lī-khui Iâ-sou, chiũ ũ chèng thien-sài bûa--lâi ho̍k-sṳ̃ I.

[12] Iâ-sou zṳ́-bûn Iak-hân pĩ-kòi chiũ thò--khṳ̀ Ka-lĩ-lĩ; [13] lī-khui Ná-sat-le̍k, chiũ kàu Ka-pek-lông khiã-khí, hṳ́-kâi tī-hng kṳ̃n-hái, tõ Si-pù-lûn Na̍p-tã-lĩ kâi tī-kài: [14] lâi-èng soiⁿ-tsai-nâng Íⁿ-sài-a só-tàⁿ kâi ūe, sĩ tàⁿ,

[15] Si-pù-lûn tī kũa Na̍p-tã-lĩ tī,

In̂-hái kâi lōu, Iak-tãn gūa,

Ĩ-pang kâi Ka-lĩ-lĩ.

[16] Tsõ tõ ou-àm--tang kâi mîn

Ũ thóiⁿ-kìⁿ tūa kuang-mêng,

Tsõ tõ sí-tī im-ṳ̀ kâi nâng

Iā ũ tit--tie̍h kng khí--lâi chiè in.

[17] Tsṳ̃ chí-kâi sî-hāu Iâ-sou chiũ khí-tsho thuân-tãu, tàⁿ, Tie̍h hùe-kói; in-ũi thien-kok kṳ̃n--liáu.

[18] Iâ-sou kiâⁿ tõ Ka-lĩ-lĩ hái-kîⁿ thóiⁿ-kìⁿ nõ-kâi hiaⁿ-tĩ, chiũ-sĩ Si-mn̂g, hãu-tsò Pí-tit, kũa i-kâi hiaⁿ-tĩ An-tit-lie̍t, nõ-nâng pha-mãng tõ-hái; in-ũi in sĩ thó-hái kâi nâng. [19] Iâ-sou tùi-in tàⁿ, Lâi tùe-tshông uá, uá àiⁿ sái-nín tit-nâng chhin-chhiẽⁿ tit-hŵ che̍k-iēⁿ.

[20,21] In sûi-sî siá-tiāu mãng tùe-tshông I. Iâ-sou tshông-tõ hṳ́-kò khṳ̀, chiũ thóiⁿ-kìⁿ ke nõ-kâi hiaⁿ-tĩ Iak-hân, chí-nõ-nâng kũa in-kâi-pẽ Si-pí-thài tõ-tsûn--kò tõ póu in-kâi-mãng; Iâ-sou kiè in. [22] In sûi-sî lī-khui tsûn kũa lī-khui in-kâi-pẽ, chiũ lâi tùe-tshông Iâ-sou.

[23] Iâ-sou pìn-kiâⁿ Ka-lĩ-lĩ, tõ in tsùaⁿ-kâi hũe-tn̂g kà-hùe, thuân thien-kok kâi hok-im, ui mîn--kan kak-iēⁿ pēⁿ-thiàⁿ kũa kak-iēⁿ nńg-jia̍k. [24] I-kâi miâⁿ-siaⁿ thuân-kàu pìn Sũ-lĩ-a múaⁿ-tshù; ũ tì-pēⁿ, ke-ke-iēⁿ kâi thiàⁿ-khóu, huãm-tie̍h kúi, tie̍h iêⁿ-tshái, nńg-huang, lóng-tsóng tùa--lâi chiũ Iâ-sou, Iâ-sou chiũ ui in. [25] Ũ tsōi-tsōi-nâng tshông-tõ Ka-lĩ-lĩ, Tí-ka-po-lĩ, Iâ-lũ-sat-léng, Iû-thài, Iak-tãn gūa, sêng-khûn lâi tùe-tshông I.

5

Iâ-sou thóiⁿ-kìⁿ chèng-nâng chiâⁿ-khûn, chiũ chiẽⁿ--khṳ̀ che̍k-kâi-suaⁿ, tsõ-lo̍h--liáu I kâi mn̂g-thû chiũ bûa--lâi: [2] Iâ-sou khui-tshùi kà-hùe in, chiũ tàⁿ,

[3] Hṳ-sim kâi nâng ũ hok: in-ũi thien-kok sĩ in-kâi-kok.

[4] Ai-khàu kâi nâng ũ hok: in-ũi in chiang-àiⁿ tit--tie̍h uaⁿ-ùe.

[5] Un-jiû kâi nâng ũ hok: in-ũi in chiang-àiⁿ tit--tie̍h thóu-tī tsò zũi-ngia̍p.

[6] Mōⁿ-ngĩ che̍k-zû tóu khùn âu ta kâi nâng ũ hok: in-ũi in chiang-àiⁿ tit--tie̍h pá-tsok.

[7] Tshûn-sim liên-mién kâi nâng ũ hok: in-ũi in chiang-àiⁿ tit liên-mién.

[8] Sim--tang chheng-kiet kâi nâng ũ hok: in-ũi in chiang-àiⁿ-kìⁿ Siãng-tì.

[9] Hûa-phêng kâi nâng ũ hok: in-ũi in chiang-àiⁿ chheng-tsò Siãng-tì kâi kiáⁿ.

[10] Uĩ-tie̍h ngĩ siũ khún-to̍k kâi nâng ũ hok: in-ũi thien-kok sĩ in-kâi-kok.

[11] Nín ũi-tie̍h uá kâi uân-kù, pĩ nâng uàn-mē, khún-to̍k, bû-pãng kak-iēⁿ kâi ak-sṳ̄, chiũ ũ hok. [12] Tie̍h huaⁿ-hí, chì-la̍k: in-ũi tõ thiⁿ nín tit-siéⁿ sĩ tūa: uân-khî in khún-to̍k nín-tsôiⁿ kâi soiⁿ-tsai-nâng iā sĩ chièⁿ-seⁿ.

[13] Nín sĩ sì-kan kâi iâm, iâm iā-sĩ sit-lo̍h i-kâi-bī, hó ēng sĩ-mih-mue̍h lâi sái i õi kiâm? Aũ pit-tiāⁿ bô-ēng, tuaⁿ-tuaⁿ ka̍k tõ guā-kháu, pun nâng lūn-ta̍h. [15] Nín sĩ sì-kan kâi kng. Siâⁿ-kiẽn tõ suaⁿ-téng bõi-tit ṳ́n-tshâng. [15] Nâng tiám-teng m̃-pàng tõ táu-ẽ, pit-sĩ pàng tõ thâi--chiēⁿ; chiũ õi pìn-chiè kàu tshù-lãi chèng-nâng. [16] Nín-kâi-kng iā tie̍h chièⁿ-seⁿ chiè tõ nâng mīn-tsôiⁿ, sái nâng thóiⁿ-kìⁿ nín-kâi siẽn-hẽng chiũ kui iông-kuang tõ nín thiⁿ--chiēⁿ kâi Pẽ.

[17] Mài siẽⁿ-tsò uá lâi sĩ àiⁿ kói-tiāu lu̍t-huap kũa soiⁿ-tsai-nâng: uá lâi m̄-sĩ àiⁿ kói-tiāu, zûi-sĩ àiⁿ sêng-tshuân in. [18] Uá khak-si̍t kāng-nín tàⁿ, thiⁿ-tī būe kùe--khṳ̀, lu̍t-huap che̍k-tiám che̍k-ue̍h pit-tiāⁿ bô kùe--khṳ̀, chì-kàu che̍k-chhiet lóng-tsóng tsò-chiâⁿ. [19] Kù-tshṳ́ put-lũn tî-tiâng hùi-tiāu chí-tsùaⁿ-kâi lu̍t-kài chì-mûi-sòi--tang che̍k-kiãⁿ, iũ chièⁿ-seⁿ kà-nâng, tõ thien-kok pit chheng-tsò sĩ chì-mûi-sòi: nā-sĩ put-lũn tî-tiâng tsun-kiâⁿ chí-tsùaⁿ-kâi lu̍t-kài, kũa chiang chí-kâi lâi-kà-nâng, tõ thien-kok pit chheng-tsò tūa. [20] Uá kāng-nín tàⁿ, zû-jia̍k nín-kâi-ngĩ bõi kiêⁿ--kùe tha̍k-tsṳ-nâng kũa Huap-lĩ-sài nâng kâi ngĩ, nín tuàn-tuàn bô ji̍p thien-kok.

[21] Nín chêng-thiaⁿ-kìⁿ ũ hiáu-zũ kóu-nâng kâi ūe, sĩ tàⁿ, M̄-hó-suah, tãi-huâm kiâⁿ-suah--kâi lân-mién tiāⁿ-tsũe. [22] Nā-sĩ uá kāng-nín tàⁿ, Tãi-huâm bô-sṳ̄-kù náu-khì i-kâi hiaⁿ-tĩ kâi nâng, lân-mién tiāⁿ-tsũe; tãi-huâm tùi i-kâi hiaⁿ-tĩ tàⁿ, La̍h-ka, chí-kâi-nâng lân-mién kong-hũe tiāⁿ-ngí: tãi-huâm tàⁿ, Mô-lĩ, chí-kâi-nâng lân-mién tī-ge̍k kâi húe. [23] Kù-tshṳ́ zû-jia̍k lṳ́ tõ tûaⁿ--kò hièn lói-mue̍h, chiũ tõ-hṳ́-kò siẽⁿ-tshut lṳ́-kâi hiaⁿ-tĩ kāng-lṳ́ khiah-chiah, [24] chiũ tie̍h chhiáⁿ-pàng lṳ́-kâi lói-mue̍h tõ tûaⁿ-tsôiⁿ, tsò-lṳ́ khṳ̀, soiⁿ kāng lṳ́-kâi hiaⁿ-tĩ hûa-hó, jiên-áu chiàⁿ lâi-hièn lṳ́-kâi lói-mue̍h. [25] Uan-chhiû huân-sĩ tsò-pû tõ lōu--kò mé-mé tie̍h kāng-i hûa, khióng-ùi i kau lṳ́ tõ hêng-kuaⁿ, hêng-kuaⁿ kau lṳ́ tõ kìm-chí, lṳ́ chiũ siu tõ kam. [26] Uá khak-si̍t kāng-lṳ́ tàⁿ, Lṳ́ tsua̍h hâu-lî būe siêⁿ-hôiⁿ, tuàn-tuàn put-lêng hó-tshut hṳ́-kâi tī-hng.

[27,28] Nín chêng-thiaⁿ-kìⁿ ũ tàⁿ, M̄-hó kiâⁿ-îm: nā-sĩ uá kāng-nín tàⁿ, Huâm sĩ-mih-nâng thóiⁿ hũ-nńg chiũ tõng îm-sim, íⁿ-keng sĩ sim-lãi hiàng-i kiâⁿ-îm--liáu. [29] Zû-jia̍k lṳ́-kâi chiàⁿ-ma̍k sái lṳ́ hām-lo̍h tõ tsũe, chiũ tie̍h liú--tshut-lâi ka̍k-tiāu; lẽng-tsò peh-thói--tang sit-lo̍h che̍k-kiãⁿ, mài tshuân-sin ka̍k-lo̍h tī-ge̍k. [30] Zû-jia̍k lṳ́-kâi chiàⁿ-chhiú sái lṳ́ hām-lo̍h tõ tsũe, chiũ tie̍h tok-tñg lâi ka̍k-tiāu; lẽng-tsò peh-thói--tang sit-lo̍h che̍k-kiãⁿ, mài tshuân-sin lo̍h tī-ge̍k.

[31] Iũ ũ tàⁿ, Put-lũn sĩ-mih-nâng thut-tiāu i-kâi-chhi, chiũ tie̍h siá lî-tsṳ hôiⁿ i: [32] nā-sĩ uá kāng-nín tàⁿ, put-lũn sĩ-mih-nâng, m̄-sĩ ũi-tie̍h kan-chhêng kâi uân-kù chiũ thut-tiāu i-kâi-chhi, chiũ-sĩ sái i tsò îm-hũ: thut-tiāu tsṳ-ãu put-lũn sĩ-mih-nâng tshūa i, iā sĩ kiâⁿ-îm.

[33] Nín huân-tsài chêng thiaⁿ-kìⁿ ũ hiáu-zũ kóu-nâng kâi ūe sĩ tàⁿ, M̄-hó pũe-sit sīe-ieh, ũ só sī-ieh--kâi, tie̍h-tsò kàu-chiâⁿ lâi-hôiⁿ Tsú: [34] nā-sĩ uá kāng-nín tàⁿ, Che̍k-khài mài huat-sī; mài chí-thiⁿ lâi-huat-sī, in-ũi sĩ Siãng-tì kâi tsō-ūi; [35] mài chí-tī, in-ũi sĩ Siãng-tì kâi kha-tèng; mài chí Iâ-lũ-sat-léng, in-ũi sĩ chì-tsun Kun-uâng kâi kiaⁿ-siâⁿ. [37] Iā m̄-hó chí lṳ́-kâi-thâu lâi-huat-sī, in-ũi lṳ́ put-lêng sái che̍k-tiâu thâu-mô ho̍k tsò pe̍h ho̍k tsò ou. [37] Tãn-sĩ nín-kâi-ūe, sĩ tie̍h-tsò sĩ, hui tie̍h-tsò hui: ũ kùe chièⁿ-seⁿ chiũ-sĩ tshông-tõ ak khí.

[38] Nín chêng thiaⁿ-kìⁿ ũ tàⁿ, Ma̍k siêⁿ-hôiⁿ ma̍k, khí siêⁿ-hôiⁿ khí: [39] nā-sĩ uá kāng-nín tàⁿ, Mài tí-te̍k ak-nâng: ho̍k-sĩ ũ nâng piang lṳ́ iũ-pôiⁿ kâi kih-kau, tie̍h tsài u̍t-tńg hièⁿ-pôiⁿ hiàng i. [40] Ho̍k-sĩ ũ nâng àiⁿ kāng-lṳ́ sie-kò, àiⁿ-âⁿ lṳ́-kâi sin-tói-saⁿ, lṳ́-kâi gūa-ho̍k iā sûi i khie̍h. [41] Ho̍k-sĩ ũ nâng ngẽⁿ-lia̍h lṳ́ kiâⁿ che̍k-tsãm-lōu, tie̍h kāng-i tsò-pû kiâⁿ nõ-tsãm. [42] Ũ nâng kāng-lṳ́ thó, tie̍h ṳ́-pun i, ũ nâng àiⁿ kāng-lṳ́ chieh mài tsò-lṳ́ u̍t-tńg.

[43] Nín chêng thiaⁿ-kìⁿ ũ tàⁿ, Tie̍h ài-sieh lṳ́-kâi tshù-piⁿ, lóu-hṳ̃n lṳ́-âi chhiû-te̍k, [44] nā-sĩ uá kāng-nín tàⁿ, Tie̍h ài-sieh nín-kâi chhiû-te̍k: khún-to̍k nín kâi nâng, nín tie̍h ũi-tie̍h in khî-táu. [45] Chiũ sái nín tsò nín thiⁿ--chiēⁿ tsṳ Pẽ kâi kiáⁿ: uân-khî I sĩ sái I kâi ji̍t tshut--lâi chiè siẽn kũa put-siẽn kâi nâng, iā sĩ kàng-hõu pun ngĩ kũa put-ngĩ kâi nâng. [46] Nín iā-sĩ ài-sieh ài-nín kâi nâng, nín ũ sĩ-mih siéⁿ-sṳ̀, né? liên-kũa sùe-lī khá iā-m̄-sī chièⁿ-seⁿ kiâⁿ? [47] Nín jia̍k-sĩ tuaⁿ-tuaⁿ kèng-lói nín-kâi hiaⁿ-tĩ, ũ kiâⁿ sĩ-mih kùe-nâng kâi sṳ̄, né? Chì-kàu ĩ-pang-nâng khá iā-m̄-sĩ chièⁿ-seⁿ kiâⁿ? [48] Kù-tshṳ́ nín tie̍h sûn-tshuân, chhin-chhiẽⁿ nín-kâi Thien-pẽ sĩ sûn-tshuân che̍k-iēⁿ.

6

Tie̍h kṳ́n-sim mài tõ nâng mīn-tsôiⁿ tsò-tshut nín-kâi-ngī, àiⁿ pun nâng thóiⁿ--kìⁿ, zû-jia̍k sī chièⁿ-seⁿ chiũ bô-tit--tie̍h siéⁿ-sṳ̀ tõ nín thî--chiēⁿ kâi Pẽ.

[2] Kù-tshṳ́ lṳ́ si-chì kâi sî-hāu, mài tshue-kak tõ lṳ́ thâu-tsôiⁿ chhin-chhiẽⁿ hṳ́-khí ké-hó kâi nâng tõ hũe-tn̂g kũa koi-hāng hièⁿ-seⁿ, àiⁿ-tit iông-kuang tõ nâng--kò, uá khak-si̍t kāng-nín tàⁿ, In íⁿ-keng tit--tie̍h in-kâi siéⁿ-sṳ̀--liáu. [3] Tãn-sĩ lṳ́ si-chì kâi sî-hāu tie̍h mài pun lṳ́-kâi tsó-chhiú tsai lṳ́-kâi iũ-chhiú só-ûi: [4] chièⁿ-seⁿ lṳ́-kâi si-chì chiũ ṳ́n-ba̍t--liáu: lṳ́ Pẽ kàm-tshat tõ ṳ́n-ba̍t, chiũ àiⁿ pò-siéⁿ lṳ́.

[5] Nín khî-táu kâi sî-hāu m̄-hó chhin-chhiẽⁿ hṳ́-khí ké-hó kâi nâng: in hàuⁿ khiã tõ hùaⁿ-kâi hũe-tn̂g kũa tsham-chhe lōu-thâu khî-táu, àiⁿ pun nâng thói--kìⁿ. Uá khak-si̍t kāng-nín tàⁿ, In íⁿ-keng tit--tie̍h in-kâi siéⁿ-sṳ̀--liáu. [6] Tãn-sĩ lṳ́ khî-táu kâi sî-hāu, tie̍h-ji̍p lṳ́-kâi lãi-koiⁿ, kueⁿ-mn̂g liáu, khiû lṳ́ tõ ṳ́n-ba̍t kâi Pẽ, lṳ́ Pẽ kàm-tshat tõ ṳ́n-ba̍t chiũ àiⁿ pò-siéⁿ lṳ́. [7] Nín tõ khî-táu tàⁿ-ūe mài tàⁿ-liáu tsài-têng, chhin-chhiẽⁿ ĩ-pang-nâng hièⁿ-seⁿ: in siẽⁿ-tsò sĩ tàⁿ ke-ke-kù chiàⁿ õi-tit thiaⁿ-kàu. [8] Nín mài-o̍h in: in-ũi nín būe-chêng-khiû I, nín só-ēng--tie̍h kâi, nín-kâi Pẽ íⁿ-keng soiⁿ tsai. [9] Kù-tshṳ́ nín tie̍h àn-chièⁿ-seⁿ khî-táu: Uń-kâi Pẽ tõ thiⁿ, Nguãn lṳ́-kâi-miâⁿ siàⁿ. [10] Lṳ́-kâi-kok kàu--lâi. Lṳ́-kâi chí-ì tit-sêng tõ tī chhin-chhiẽⁿ tõ thiⁿ. [11] Uń-kâi ji̍t-chia̍h kim-ji̍t sṳ̀-pun ún. [12] Sià-mién ún-kâi hũ-khiàm, chhin-chhiẽⁿ ún ũ sià-mién hũ-khiàm ún kâi nâng. [13] Mài sái ún siũ-chhì, kiù ún thut-lī ak. [14] Nín jia̍k-sĩ sià-mién nâng kâi kùe, nín-kâi Thien-pẽ iā àiⁿ sià-mién nín. [15] Nín jia̍k-iā m̃ sià-mién nâng kâi kùe, nín-kâi Pẽ iā m̃ sià-mién nín-kâi-kùe.

[16] Nín kìm-chia̍h kâi sî-hāu mài chhin-chhiẽⁿ hṳ́-khí ké-hó kâi nâng tsò huân-ló kâi iông: in tsuan-pièn in-kâi mīn-sek, àiⁿ pun nâng thóiⁿ-kìⁿ in sĩ kìm-chia̍h. Uá khak-si̍t kāng-nín tàⁿ, In íⁿ-keng tit--tie̍h in-kâi siéⁿ-sṳ̀--liáu. [17] Tãn-sĩ lṳ́ kìm-chia̍h kâi sî-hāu, tie̍h buah lṳ́-kâi-thâu sói lṳ́-kâi-mīn; [18] mài pun nâng thóiⁿ--kìⁿ lṳ́ sĩ kìm-chia̍h, zûi-sĩ khṳt lṳ́ tõ ṳ́n-ba̍t kâi Pẽ thóiⁿ: lṳ́-kâi Pẽ kàm-tshat tõ ṳ́n-ba̍t, chiũ pò-siéⁿ lṳ́.

[19] Nín mài chek-tshâi tõ tī--chiēⁿ, ũ thâng kũa san lâi hùi-hāi, iā ũ tsha̍t liú-khang lâi thau-khie̍h. [20] Nín tie̍h chek-tshâi tõ thiⁿ, thâng kũa san bô hùi-hāi: tsha̍t iā bô liú-khang lâi thau-khie̍h: [21] in-ũi lṳ́-kâi-tshâi só-tõ lṳ́-kâi-sim iā tõ--hṳ́-kò. [22] Chèk-sin kâi teng chiũ-sĩ ma̍k: kù-tshṳ́ lṳ́-kâi-ma̍k jia̍k-sĩ liãng, chiũ múaⁿ-sin tshuân-kng. [23] Lṳ́-kâi-ma̍k jia̍k-iā-sĩ m̄-hó, chiũ múaⁿ-sin tshuân-àm. Lṳ́ hṳ́-tói kâi kng jia̍k-iā-sĩ àm, hṳ́-kâi-àm ũ jie̍h-tūa, né! [24] Bô-nâng õi ho̍k-sṳ̃ nõ-kâi-tsú: in-ũi ho̍k-sĩ lóu chí--kâi, sieh hṳ́--kâi; ho̍k-sĩ ji̍p-sim hṳ́--kâi, thóiⁿ-khin chí--kâi. Nín iā put-lêng ho̍k-sṳ̃ Siãng-tì kiam-kũa ho̍k-sṳ̃ hùe-tshâi. [25] Kù-tshṳ́ uá kāng-nín tàⁿ, Mài khùa-lṳ̃ nín-kâi sèⁿ-miāⁿ tsò-nî tit-chia̍h, tsò-nî tit-ím; kũa nín-kâi sin-thói tsò-nî tit-chhēng. Sèⁿ-miāⁿ khá-m̄-sĩ tõng-tãi--kùe niêⁿ-chia̍h, sin-thói khá-m̄-sĩ tõng-tãi--kùe sin-chhēng?

[26] Thóiⁿ chiá thiⁿ--tang kâi pue-chiáu, i bô iā-lo̍h, bô kuah-khí, bô siu ji̍p tshng, nín-kâi Thien-pẽ siãng-chhiáⁿ iáng-chhī i. Nín khá-m̄-sĩ tūa-ē kùi-tõng--kùe pue-chiáu? [27] Nín--tang tî-tiâng õi chiang khùa-lṳ̃ lâi sái i-kâi sin-thói kûiⁿ ke che̍k-chhieh? [28] Nín iā hô-ēng ũi-tie̍h sin-chhēng khùa-lṳ̃, né? Lâi-siẽⁿ khuàng-iá kâi peh-ha̍h-hue, i tsò-nî seⁿ-chiáng; bô-lâu-la̍t, iā bô-pháng-cheh: [29] uá iũ kāng-nín tàⁿ, Liên-kũa Só-lô-mn̂g ke̍k iông-hûa kâi sî-hāu, i-kâi i-ho̍k pí-m̄-kàu chí-kâi-hue che̍k-ki. [30] Iá-tsháu kim-ji̍t tõ--kò mùa-tsá ka̍k tõ lôu, Siãng-tì huân kāng-i tsuang-sek kàu chièⁿ-seⁿ, hô-khuàng sī nín, sié-sìn kâi nâng, a! [31] Kù-tshṳ́ nín mài khùa-lṳ̃--tàⁿ, Aìⁿ-chia̍h tî-kâi? [32] àiⁿ-ím tî-kâi? àiⁿ-chhēng tî-kâi? In-ũi chí chiàⁿ-kâi-mue̍h sĩ ĩ-pang-nâng só-khiû; nín-kâi Thien-pẽ tsai nín ēng--tie̍h chí chiàⁿ-kâi-mue̍h. [33] Tãn-sĩ nín tie̍h siãng-soiⁿ khiû Siãng-tì kâi kok kũa I kâi ngĩ, chí chiàⁿ-kâi-mue̍h chiũ lóng-tsóng kia-pun nín. [34] Kù-tshṳ́ mài ũi-tie̍h mêng-ji̍t khùa-lṳ̃; mêng-ji̍t kâi khùa-lṳ̃, thãi mêng-ji̍t khṳ̀ khùa-lṳ̃. Che̍k-ji̍t tng che̍k-ji̍t kâi kan-khóu chiũ lã.

7

Nín mài ngí-nâng, chiũ mín pĩ-ngí. [2] In-ũi nín ngí-nâng sĩ tsò-nî ngí, nín pĩ-ngí iā sĩ chièⁿ-seⁿ: nín sĩ tsò-nî niêⁿ pun nâng chiũ àiⁿ hièⁿ-seⁿ niêⁿ pun nín. [3] Lṳ́ tsò-nî thóiⁿ-kìⁿ lṳ́ hiaⁿ-tĩ ma̍k--tang ũ tsháu-khòu, kèng m̄-siẽⁿ ka-kī ma̍k--tang ũ êⁿ, né? [4] Aìⁿ tsò-nî tùi lṳ́-kâi hiaⁿ-tĩ tàⁿ, Lṳ́ ma̍k--tang kâi tsháu-khòu thãi uá lâi kāng-lṳ́ khṳ́-tiāu; ka-kī ma̍k--tang kèng-jiên ũ êⁿ, né? [5] Ké-hó a, soiⁿ tie̍h khṳ́-tiāu lṳ́ ka-kī ma̍k--tang kâi êⁿ, chiàⁿ õi thóiⁿ-mêng lâi khṳ́-tiāu lṳ́-kâi hiaⁿ-tĩ ma̍k--tang kâi tsháu-khòu.

[6] Mài chiang siàⁿ kâi mue̍h pun káu, iā mài chiang nín-kâi chin-tsu ka̍k tõ tṳ mīn-tsôiⁿ, khióng-ùi lūn-ta̍h tõ kha-ẽ, iáu chiũ hui-tńg lâi kã-phùa-tshùi nín.

[7] Tie̍h-ũ khiû chiũ pun nín; tshūe chiũ tit--tie̍h, phah-mn̂g chiũ kāng-nín khui: [8] in-ũi tãi-huâm khiû kâi nâng chiũ siũ--kàu; tshūe kâi nâng chiũ tit--tie̍h: phah-mn̂g kâi nâng chiũ kāng-i khui. [9] Nín--tang ũ sĩ-mih-nâng, i-kâi-kiáⁿ kāng-i thó-piáⁿ, khá-ũ khie̍h-tsò chie̍h pun i; ho̍k-sĩ thó-hŵ, khá-ũ khie̍h-tsò tsûa pun i, né? [10,11] Nín sui--sĩ ak, huân tsai chiang hó-mue̍h sṳ̀-pun nín-kâi kiáⁿ-jî, hô-khuàng sĩ nín thiⁿ--chiēⁿ kâi Pẽ khá-m̃ chiang hó-mue̍h sṳ̀-pun khiû I kâi nâng, né? [12] Nín huâm àiⁿ nâng khuán-thãi nín tî-kâi-sṳ̄, nín iā tie̍h chièⁿ-seⁿ khuán-thãi nâng: chí-kâi sĩ lu̍t-huap kũa chèng-soiⁿ-tsai.

[13] Tie̍h tùi hṳ́-kâi oi̍h-mn̂g chìn-ji̍p: uân-khî ín-nâng kàu mi̍t-buâng--kâi hṳ́-kâi-mn̂g sĩ khuah, hṳ́-kâi-lōu sĩ khùaⁿ, tùi hṳ́-kò ji̍p kâi nâng sĩ tsōi. [14] Iń-nâng kàu seⁿ-ua̍h--kâi chí-kâi-mn̂g sĩ oi̍h, chí-kâi-lōu sĩ pek, tshūe--tie̍h kâi nâng sĩ chié.

[15] Kṳ́n-huâng hṳ́-khí ké kâi soiⁿ-tsai, in chhēng-tsò iêⁿ-phûe lâi tõ nín-kò, sim-lãi sĩ tshâng-hāi kâi tshâi-lâng. [16] Hó tshông-tõ in-kâi kit-kúeⁿ lâi-jīn--tshut in. Keng-keke chhiũ-tói khá tiah--tshut ũ phû-thô--né, ho̍k-sĩ chi̍t-lî tsâng-lãi khá tiah--tshut ũ bô-hue-kúeⁿ, né? [17] Chièⁿ-seⁿ thóiⁿ-khí-lâi tãi-huâm hó kâi chhiū chiũ seⁿ múi-kúeⁿ, àu kâi chhiū chiũ seⁿ ak-kúeⁿ. [18] Hó kâi chhiū put-lêng seⁿ ak-kúeⁿ, àu kâi chhiū iā put-lêng seⁿ múi-kúeⁿ. [19] Huâm sĩ-mih-chhiū bô-seⁿ múi-kúeⁿ--kâi, chiũ tsám-tiāu sek-lo̍h húe. [20] Kù-tshṳ́ hó tshông-tõ in-kâi kit-kúeⁿ lâi jīn--tshut in.

[21] Tãi-huâm tùi-uá tàⁿ, Tsú a, Tsú a, būe-pit kak-kak chiang-lâi ji̍p thien-kok; zûi-sĩ tsun-kiâⁿ uá thiⁿ--chiēⁿ kâi Pẽ kâi chí-ì--kâi, chiũ tit-ji̍p. [22] Tng-hṳ́-ji̍t ke-ke-nâng àiⁿ tùi-uá tàⁿ, Tsú a, Tsú a, ún khá-m̄-sĩ ũ thoh lṳ́-kâi-miâⁿ kiâⁿ ke-ke ĩ-lêng? [23] Iáu uá chiũ àiⁿ ti̍t-ti̍t kāng-in tàⁿ, Uá tsṳ̃-liáu m̄-pat nín: nín sĩ tsò put-huap kâi nâng, tie̍h lī-khui uá khṳ̀.

[24] Kù-tshṳ́ huâm sĩ-mih-nâng thiaⁿ-kìⁿ uá chí-kâi-ūe chiũ khṳ̀-kiâⁿ chí-kâi, phì-zû tsò ũ-tì-hũi kâi nâng, khí i-kâi-tshù tõ chie̍h-pûaⁿ--chiēⁿ: [25] hõu lo̍h, lâu lâi, huang tshue, tsuãng hṳ́-kâi-tshù, tshù huân bõi-tó: in-ũi tī-ki sĩ pàng tõ chie̍h-pûaⁿ--chiēⁿ. [26] Huâm sĩ-mih-nâng thiaⁿ-kìⁿ uá chí-kâi-ūe bô khṳ̀-kiâⁿ chí-kâi, phì-zû tsò ngô-ngà kâi nâng, khí i-kâi-tshù tõ-sua--chiēⁿ, [27] hõu lo̍h, lâu lâi, huang tshue, tsuãng hṳ́-kâi-tshù, tshù chiũ tó: i-kâi tó iũ sĩ tūa-ē. [28] Iâ-sou tàⁿ chí chiàⁿ-kâi-ūe liáu chèng-nâng khî-ĩ I kâi kà-hùe: [29] uân-khî Iâ-sou kà-hùe in, sĩ àn ũ-khuân-pèⁿ kâi nâng hièⁿ-seⁿ, kāng in-kâi tha̍k-tsṳ-nâng m̄-tâng.

8

Iâ-sou tshông suaⁿ-téng lo̍h--lâi, ũ tsōi-tsōi nâng chiâⁿ-khûn chiâⁿ-khûn tùe I.

[2] Chiũ ũ che̍k-kâi thái-ko kâi nâng kṳ̃n-tsôiⁿ lâi kũi-pài I, chiũ tàⁿ, Tsú, lṳ́ jia̍k-sĩ khéng, lṳ́ õi-sái uá chheng-kiet. [3] Iâ-sou chiũ tshun-chhiú àn tõ i, tàⁿ, Uá khéng, lṳ́ hó chheng-kiet. I-kâi thái-ko sûi-chiet chiũ chheng-kiet. [4] Iâ-sou kāng-i tàⁿ, Kṳ́n-sín mài kāng-nâng tàⁿ, tãn-sĩ tie̍h-khṳ̀ pun chì-si thóiⁿ lṳ́-kâi-sin, iā tie̍h-hièn Mô-si só-mẽng kâi lói-mue̍h, tsò-chèng-kṳ̃ pun chèng-nâng thóiⁿ.

[5] Iâ-sou ji̍p Ka-pek-lông kâi sî-hāu, ũ che̍k-kâi pá-tsáng chiũ-kṳ̃n I, khiû I, tàⁿ, [6] Tsú, uá-kâi-po̍k tó tõ tshù-lãi nńg-huang, siãng kan-khóu. [7] Iâ-sou kāng-i tàⁿ, Uá lâi-khṳ̀ ui i. [8] Pá-tsáng chiũ ìn--tàⁿ, Tsú, lṳ́ kàu uá-kâi tshù-lãi uá tng-m̄-khí; lṳ́ tuaⁿ-tuaⁿ tàⁿ che̍k-kù-ūe, uá-kâi-po̍k chiũ tshuân-zú. [9] In-ũi uá sĩ pa̍t-nâng só-kuán kâi nâng, iā ũ piaⁿ sĩ so̍k uá só-kuán: chí--kâi uá mẽng--tàⁿ, Khṳ̀, i chiũ-khṳ̀; hṳ́--kâi uá mẽng--tàⁿ, Lâi, i chiũ-lâi; mẽng uá-kâi-po̍k, tàⁿ, Tsò chí-kâi-sṳ̄, i chiũ tsò chí-kâi-sṳ̄. [10] Iâ-sou thiaⁿ-kìⁿ chí-kâi, chiũ khî-ĩ, tùi sûi-kiâⁿ kâi nâng tàⁿ, Uá khak-sit kāng-nín tàⁿ, uá tõ Íⁿ-sek-lie̍t nâng--tang, būe-pat thóiⁿ-kìⁿ sìn ũ chièⁿ-tūa. [11] Uá iũ kāng-nín tàⁿ, pit-tiāⁿ ũ ke-ke nâng tshông-tang tsông-sai àiⁿ-lâi kāng A-pek-la̍h-hán, Íⁿ-sat, Iá-kok, tsò-pû tsõ tõ thien-kok: [12] nā-sĩ thien-kok kâi tsṳ́-mîn pit-tiāⁿ to̍k-tshut tõ gūa-pôiⁿ kâi ou-àm; tõ-hṳ́-kò ũ ai-khàu iā ũ kã gê. [13] Iâ-sou chiũ tùi pá-tsáng tàⁿ, Lṳ́ tsò-lṳ́ khṳ̀, chiè lṳ́-kâi-sìn chiũ tit--tie̍h. I-kâi-po̍k tùi hṳ́-che̍k-sî chiũ tshuân-zú.

[14] Kàu Iâ-sou ji̍p tõ Pí-tit kâi ke-lāi, chiũ thóiⁿ-kìⁿ Pí-tit kâi nga̍k-bó ũ jie̍t-pēⁿ tó-lo̍h tõ-u̍t. [15] Iâ-sou chiũ àn i-kâi-chhiú, i-kâi jie̍t-pēⁿ chiũ lī-khui i; chí-kâi hũ-jîn tsáu-khí--lâi chiũ ho̍k-sṳ̃ I.

[16] Kàu jit àiⁿ-lo̍h kâi sî-hāu, ũ nâng tùa tsōi-tsōi huãm--tie̍h kúi kâi nâng, lâi-chiũ I. Iâ-sou tàⁿ che̍k-kù-ūe chiũ to̍k-tshut hṳ́-kâi siâ-sîn, siãng-chhiáⁿ ui-hó che̍k-chhiet tì-pēⁿ kâi nâng: [17] sái soiⁿ-tsai Íⁿ-sài-a kâi ūe èng-ngiām, i-kâi-ūe sĩ tàⁿ,

I sêng-siũ nán-kâi nńg-jia̍k,

Taⁿ-tng nán-kâi pēⁿ-thiàⁿ.

[18] Iâ-sou thóiⁿ-kìⁿ tsōi-tsōi nâng kàu-khûn lâi-ûi I, chiũ hàm--tàⁿ àiⁿ tōu-kùe hièⁿ-pôiⁿ. [19] Ũ che̍k-kâi tha̍k-tsṳ-nâng chiũ-kṳ̃n Iâ-sou, tùi I tàⁿ, Sin-seⁿ, lṳ́ put-lũn khṳ̀ tî-kò uá àiⁿ-tùe lṳ́ khṳ̀. [20] Iâ-sou chiũ kāng-i tàⁿ, Hôu-lâi ũ khang, thiⁿ--tang kâi pue-chiáu ũ tàu: to̍k-to̍k Jîn-tsṳ́ bô hó chím-thâu kâi tī-ūi. [21] Mn̂g-thû--tang iũ ũ pa̍t-nâng tùi I tàⁿ, Tsú a, iông uá soiⁿ khṳ̀-tsǹg uá-pẽ. [22] Iâ-sou kāng-i tàⁿ, Tie̍h-tùe uá; thẽng sí-nâng khṳ̀-tsǹg in ka-kī kâi sí-nâng.

[23] Iâ-sou chiẽⁿ-tsûn--liáu, I tsùaⁿ-kâi mn̂g-thû kṳn-tùe I. [24] Put-kak hái-mīn khí tūa huang-éng, chì-kàu éng chiaⁿ-iap--tie̍h tsûn: nā-sĩ Iâ-sou tõ-u̍t. [25] Mn̂g-thû bûa--khṳ̀ hàm I chhéⁿ, tàⁿ, Tsú a, lâi-kiù; mit-buâng, uā! [26] Iâ-sou chiũ kāng-in tàⁿ, Sié-sìn kâi nâng, nín tsò-nî kiaⁿ-kũ? iáu, chiũ khí--lâi tuah huang kah hái: chiũ tūa-ē phêng-chẽⁿ. [27] Hṳ́-hiàⁿ-nâng khî-ĩ, chiũ tàⁿ, Chí-kâi sĩ sĩ-mih-téng nâng, liên huang kũa hái iā thiaⁿ-sũn I?

[28] Iâ-sou kùe kàu hièⁿ-pôiⁿ kàu Kek-kek-sa nâng kâi tī-hng, ũ huãm--tie̍h kúi nõ-kâi-nâng, tshông-tõ phûn-mõⁿ--kò tshut--lâi tú-ngõ--tie̍h I, sĩm sĩ hiong-mé, tì-sái bô nâng káⁿ tùi hṳ́-tiâu-lōu keng-kùe. [29] U-hàm, tàⁿ, Siãng-tì kâi Kiáⁿ a, ún kāng-lṳ́ ũ sĩ-mih kan-sia̍p? sî-hāu būe kàu lṳ́ sĩ soiⁿ lâi chí-kò khóu ún, héⁿ? [30] Tõ hṳ́ hñg-hñg--kò ũ che̍k-khûn-tṳ tsōi-tsōi-chiah tõ-chia̍h. [31] Kúi chiũ khiû I, tàⁿ, Lṳ́ jia̍k-sĩ to̍k ún tshut, chiũ sái ún khṳ̀ ji̍p tṳ-khûn. [32] Iâ-sou kāng-in tàⁿ, Nín khṳ̀. Kúi chiũ tshut--lâi, ji̍p--khṳ̀ tõ tṳ, tsn̂g-khûn tu̍t-jiên chiũ sià--lo̍h kiã-po, thiàu hái, sí tõ tsúi. [33] Chiéⁿ-tṳ kâi nâng chiũ phun-tsáu khṳ̀ ji̍p-siâⁿ, chiang chí kak-sṳ̄ kũa huãm-tie̍h-kúi kâi nâng só-ngõ kâi sṳ̄-kù, o̍h khṳt nâng thiaⁿ. [34] Iáu pìn-siâⁿ kâi nâng tshut--lâi kìⁿ Iâ-sou: che̍k-ē kìⁿ-tie̍h I, chiũ khiû I lī-khui in-kâi tī-kài.

9

Iâ-sou chiẽⁿ-tsûn, kùe-hái kàu I ka-kī kâi siâⁿ. [2] Ũ nâng tùa che̍k-kâi nńg-huang, u̍t tõ mîn-íⁿ, lâi chiũ Iâ-sou, Iâ-sou thóiⁿ-tshut in ũ-sìn, chiũ tùi hṳ́-kâi nńg-huang kâi nâng tàⁿ, A-nôu a, lṳ́ pàng-sim, lṳ́-kâi tsũe-kùe sià-mién--liáu. [3] Tha̍k-tsṳ-nâng--tang ũ nâng sim-lãi siẽⁿ--tàⁿ, Chí-kâi-nâng sĩ chhiàm-buáng. [4] Iâ-sou tsai in-kâi sim-ì, chiũ tàⁿ, Nín tsò-nî sim-lãi huâi-khǹg ak-liãm? [5] Ho̍k-sĩ tàⁿ, Lṳ́-kâi-tsũe sià, ho̍k-sĩ tàⁿ, Khí--lâi kiâⁿ, tî-che̍k-kiãⁿ kōi, né? [6] Taⁿ àiⁿ-sái nín tsai Jîn-tsṳ́ tõ tī--chiēⁿ ũ khuân lâi sià-tsũe, chiũ tùi hṳ́-kâi nńg-huang--kâi hàm--tàⁿ, Khí--lâi, khiâ lṳ́-kâi mîn-íⁿ tńg-khṳ̀ lṳ́-tshù. [7] I chiũ peh-khí-lâi tńg--khṳ̀ i-kâi-tshù. [8] Hṳ́-chèng-nâng thóiⁿ-tie̍h chiũ kiaⁿ-kũ, kui iông-kuang tõ Sĩang-tì, in-ũi Siãng-tì ũ chiang chièⁿ-seⁿ kâi khuân lâi sṳ̀-pun nâng.

[9] Iâ-sou tshông hṳ́-kò keng-kùe, thóiⁿ-kìⁿ che̍k-kâi-nâng, miâⁿ kiè-tsò Má-thài, tsõ tõ hiàng-kuan; chiũ kāng-i tàⁿ, Tùe-tshông uà. I chiũ khí--lâi tùe-tshông Iâ-sou. [10] Iâ-sou tõ tshù-lãi tsõ-sia̍h, ũ ke-ke sùe-lī kũa tsũe-jîn kàu--lâi kāng Iâ-sou kũa I kâi mn̂g-thû tsò-pû tsõ. [11] Huap-lĩ-sài nâng thóiⁿ-kìⁿ chiũ tùi Iâ-sou kâi mn̂g-thû tàⁿ, Nín-kâi Sin-seⁿ tsò-nî kāng sùe-lī kũa tsũe-jîn tâng-chia̍h, né? [12] Iâ-sou che̍k-thiaⁿ-kìⁿ chiũ tàⁿ, Khin-kiāⁿ kâi nang mín-ēng--tie̍h ui-seng, zûi-sĩ tì-pēⁿ kâi nâng chiàⁿ ēng--tie̍h. [13] Tãn-sĩ nín tie̍h-khṳ̀-siẽⁿ, chí-kâi-ūe, Uá àiⁿ liên-mién, m̄-sĩ àiⁿ chì-sṳ̃, sĩ sĩ-mih ì-sṳ̀. Uân-khî uá lâi m̄-sĩ àiⁿ-chie ngĩ-jîn, zûi-sĩ àiⁿ-chie tsũe-jîn.

[14] Tng-sî Iak-hân kâi mn̂g-thû chiũ-kṳ̃n Iâ-sou, chiũ tàⁿ, Uń kũa Huap-lĩ-sài nâng lú-lú kìm-chia̍h, to̍k-to̍k lṳ́-kâi mn̂g-thû bô kìm-chia̍h, sĩ tsò-nî? [15] Iâ-sou chiũ kāng-in tàⁿ, Sin-nn̂g huân-liáu tõ--kò, hō-hí kâi nâng khá-ũ ai-khàu, né? zûi-sĩ sin-nn̂g pĩ keh-khui--khṳ̀ kâi ji̍t-khî chiang-kàu, hṳ́-sî in chiàⁿ kìm-chia̍h. [16] Tshuân-bô-nâng ēng sin-pòu lâi-póu kū-saⁿ; in-ũi só-póu--kâi li̍h-tiāu chí-kâi-saⁿ, li̍h--khṳ̀ zú-kèng-tūa. [17] Iā tshuân-bô-nâng tshō sin-chiú tõ kū phûe-tō: jia̍k-sĩ ũ, tō chiũ li̍h, chiú chiũ lāu, hṳ́-kâi-tō iā sĩ hùi-tiāu: zûi-sĩ sin-chiú tshō tõ sin phûe-tō, chiũ nõ-kiãⁿ lóng-tsóng pó-tshûan.

[18] Iâ-sou chiàⁿ tõ-tàⁿ chí-kâi-ūe, ũ che̍k-kâi-kuaⁿ bûa--lâi pài I, chiũ tàⁿ, Uá-kâi nńg-tsṳ́ siè-siè sí--khṳ̀: tãn-sĩ lṳ́ lâi chhiú àn tõ-i, i chiũ õi-ua̍h. [19] Iâ-sou chiũ khí-sin tùe i khṳ̀, kũa I kâi mn̂g-thû iā ũ tsò-pû khṳ̀.

[20] Ũ che̍k-kâi hũ-jîn tì hueh-lāu-pēⁿ tsa̍p-jī nîⁿ kú, kṳn-tùe tõ Iâ-sou pùe-ãu, mông I kâi saⁿ-kṳ: [21] uân-khî i siẽⁿ--tàⁿ, Uá jia̍k-sĩ tuaⁿ mông--tie̍h I kâi saⁿ, chiũ pit-tiāⁿ tit-kiù. [22] Iâ-sou u̍t-tńg-thâu thóiⁿ-kìⁿ i, chiũ tàⁿ, Nńg-tsṳ́ a, lṳ́ pàng-sim; lṳ́-kâi-sìn kiù lṳ́ liáu. Hũ-jîn tshông hṳ́-sî chiũ kiù-hó.

[23] Iâ-sou ji̍p kàu hṳ́-kâi-kuaⁿ kâi ke-lãi, chiũ thóiⁿ-kìⁿ tshue-te̍k kâi nâng, [24] kũa chèng-nâng kā-kā-zŵ, chiũ hàm--tàⁿ, Nín thò--khṳ̀: chí-kâi nńg-tsṳ́ m̄-sĩ sí, sĩ tõ-u̍t. [25] Chèng-nâng chiũ háu-chhiè I. Sái chèng-nâng tshut--khṳ̀ ãu, Iâ-sou ji̍p--khṳ̀, khan nńg-tsṳ́ kâi chhiú; nńg-tsṳ́ chiũ tsáu-khí. [26] Chí-kâi-sṳ̄ kâi miâⁿ-siaⁿ pìn-iâng kàu hṳ́ múaⁿ-tī-hng.

[27] Iâ-sou tshông hṳ́-kò keng-kùe, ũ nõ-kâi chheⁿ-mêⁿ-nâng tùe I, u-siaⁿ hàm--tàⁿ, Tã-phek kâi ãu-ĩ a, liên-mién ún. [28] Iâ-sou ji̍p tshù-lãi--liáu, hṳ́-nõ-kâi chheⁿ-mêⁿ-nâng chiũ-kṳ̃n I: Iâ-sou tùi-in-tàⁿ, Nín sìn uá õi-tsò chí-kâi-sṳ̄, mé? chiũ tùi I tàⁿ, Tsú a, sìn a. [29] Iâ-sou chhiú àn in-kâi-ma̍k, chiũ tàⁿ, Chiè nín-kâi-sìn kāng-nín tsò-chiâⁿ. [30] In-kâi ma̍k-chiu chiũ khui. [30] Iâ-sou ngiâm-ngiâm kàu-kài in, tàⁿ, Sié-sim mài pun nâng tsai chí-kâi-sṳ̄. [31] Tãn-sĩ nõ-nâng tshut--khṳ̀ pùa-iâng I kâi miâⁿ pìn hṳ́-kâi tī-hng.

[32] In lím-lím chiàⁿ kiâⁿ--tshut-khṳ̀, chiũ ũ nâng tùa che̍k-kâi huãm-kúi kâi é-nâng lâi kìⁿ Iâ-sou. [33] Kúi che̍k-to̍k-tshut, é-nâng chiũ tàⁿ-ūe: chèng-nâng chiũ khî-ĩ, tàⁿ, Tõ Íⁿ-sek-lie̍t kò tshông-būe-pat thóiⁿ-kìⁿ ũ chièⁿ-seⁿ. [34] Zûi-to̍k Huap-lĩ-sài nâng tàⁿ, I sī chiã kúi-uâng lâi to̍k-kúi.

[35] Iâ-sou pìn-kiâⁿ kak hieⁿ-ip, tõ in-kâi hũe-tn̂g kà-hùe, iũ thuân thien-kok kâi hok-im, kũa ui kak-iēⁿ kâi pēⁿ-chèng kũa kak-iēⁿ kâi nńg-jia̍k. [36] Thóiⁿ-kìⁿ in khûn-chèng-nâng, chiũ kám-tõng liên-mién kâi sim, in-ũi in khùn-khóu lî-sùaⁿ, chhin-chhiẽⁿ bô chiéⁿ-mo̍k kâi iêⁿ hièⁿ-seⁿ. [37] Chiũ tùi I kâi mn̂g-thû tàⁿ, Kè-sek sit-tsãi sĩ tsōi, kang-jîn chié. [38] Kù-tshṳ́ nín tie̍h-khiû siu-tang kâi tsú sái kang-jîn tshut--lâi siu I kâi kè-sek.

10

Iâ-sou tiãu I tsa̍p-jī mn̂g-thû bûa--lâi, sṳ̀-pun in ũ-khuân lâi tî siâ-sîn khu-to̍k i tshut--lâi, ui kak-iēⁿ kâi pēⁿ-chèng kũa kak-iēⁿ kâi nńg-jia̍k.

[2] Tsa̍p-jī sài-thû kâi miâⁿ lie̍t tõ-chí-ẽ: thâu-che̍k-nâng chiũ-sĩ Si-mn̂g hãu-tsò Pí-tit, kũa i-kâi hiaⁿ-tĩ An-tit-lie̍t; Si-pí-thài kâi kiáⁿ Iá-kok, kũa i-kâi hiaⁿ-tĩ Iak-hân; [3] Hui-le̍k kũa Pa-to-lô-mái; To-má kũa sùe-lī Má-thài; [4] A-le̍k-hui kâi kiáⁿ Iá-kok, kũa Ta̍t-thãi; Si-mn̂g, iā hãu-tsò Zũe, kũa Ka-lia̍k nâng Iû-tã, chiũ-sĩ bōi Iâ-sou kâi nâng.

[5] Chí tsa̍p-jī-nâng Iâ-sou sái in tshut--khṳ̀, chiũ hun-hù in, tàⁿ, Ĩ-pang kâi lōu mài-kiâⁿ, Sat-má-lĩ-a nâng kâ siâⁿ tsn̂g-kâi mài-ji̍p: [6] lẽng-tsò khṳ̀-chiũ Íⁿ-sek-lie̍t ke kâi buâng-iêⁿ kèng-hó. [7] Nín thâu-kiâⁿ tie̍h thâu-thuân, tàⁿ, Thien-kok kṳ̃n--liáu. [8] Iā tie̍h ui-hó pēⁿ-nâng, ho̍k-ua̍h sí-nâng, kiet-chheng tháṳi-ko, to̍k-kúi; nín sĩ pe̍h-pe̍h chiũ tit--tie̍h, iā tie̍h pe̍h-pe̍h si-pun nâng. [9] Mài ṳ̃-pĩ kim, ngŵn, tâng, pàng tóu-ie, [10] iā mài ṳ̃-pĩ tō tõ lōu--kan ēng, iā mài nõ-kiãⁿ-saⁿ, kũa ôi, kũa chiãng: in-ũi tsò-kang kâi nâng kham-kai tit--tie̍h i-kâi kháu-chia̍h. [11] Bô-lûn sĩ ji̍p tî-kâi-siâⁿ tî-kâi-hieⁿ, chiũ tie̍h huáng-mn̄g hṳ́-kò tî-tiâng sĩ ha̍h; chiũ nā hṳ́-kò khiã-khí, thãi-kàu àiⁿ tshut-mn̂g. [12] Ji̍p-kàu nâng kâi ke-lãi chiũ tie̍h kāng-i mn̄g-uaⁿ. [13] Zû-jia̍k hṳ́-kâi-ke ā-sĩ kham-kai hó-tit--tie̍h, nín-kâi phêng-an chiũ hó kàu-ji̍p i: jia̍k-ā-sĩ m̄-kham-kai, nín-kâi phêng-an chiũ hó kui-tńg nín ka-kī. [14] Zû jia̍k ũ nâng m̃-chiap-na̍p nín, m̃-thiaⁿ nín-kâi-ūe, nín lī-khui hṳ́-kâi-ke, ho̍k-sĩ hṳ́-kâi-siâⁿ, chiũ tie̍h hìⁿ-tiāu kha kâi thôu-hún. [15] Uá khak-si̍t kāng-nín tàⁿ, Tng sím-phuàn-ji̍t Só-to-má Ngô-mô-la̍h tī só-siũ, pí--tie̍h hṳ́-kâi-siâⁿ, huân kèng-kōi-siũ.

[16] Uá sái nín tshut--khṳ̀ chhin-chhiẽⁿ iêⁿ tõ tshâi-lâng tsṳ-tang: kù-tshṳ́ nín tie̍h tì-hũi chhin-chhiẽⁿ tsûa, láu-si̍t chhin-chhiẽⁿ hún-chiáu. [17] Tie̍h kṳ́n-huâng nâng: in-ũi in chiang-àiⁿ kòi-sàng nín tõ chiàⁿ-kâi kong-hũe, àiⁿ piⁿ-phah nín tõ in chiàⁿ-kâi hũe-tn̂g; [18] nín siãng-chhiáⁿ ũi-tie̍h uá kâi uân-kù chiang-àiⁿ kòi-sàng kàu tsóng-tok kũa kun-uâng mīn-tsôiⁿ, lâi-pun in kũa ĩ-pang-nâng tsò chèng-kṳ̃. [19] In kòi-sàng nín kâi sî-hāu mài khùa-lṳ̃ àiⁿ-tsò-nî tàⁿ-ūe, àiⁿ-tàⁿ tî-kâi: pit-tiāⁿ tõ-hṳ́-sî sṳ̀ nín só eng-tàⁿ kâi ūe. [20] In-ũi m̄-sĩ nín ka-kī tàⁿ-ūe, sĩ nín Pẽ kâi Sîn tõ nín--tang tàⁿ--tshut-lâi. [21] Hiaⁿ-tĩ chiang-àiⁿ kòi-sàng hiaⁿ-tĩ tì-sí, pẽ thãi-kiáⁿ iā sĩ chièⁿ-seⁿ, kiáⁿ iā àiⁿ kong-phah pẽ-bó sái in sí. [22] Nín ũi-tie̍h uá-kâi-miâⁿ tì-kàu pĩ chèng-nâng uàn-hṳ̃n: zûi-to̍k jím-nãi kàu-búe chí-kâi-nâng chiũ tit-kiù. [23] Nâng tõ chí-kkâi siâⁿ khún-to̍k nín, chiũ tie̍h-tsáu--khṳ̀ hṳ́--kâ siâⁿ; uá khak-si̍t kāng-nín tàⁿ, Íⁿ-sek-lie̍t tsùaⁿ-kâi-siâⁿ, nín kiâⁿ-būe-thàu, Jîn-tsṳ́ soiⁿ lâi--liáu.

[24] Mn̂g-thû bõi kùi-tõng kùe i-kâi sin-seⁿ, ke-po̍k iā bõi kùi-tõng kùe i-kâi tsú-jîn. [25] Mn̂g-thû tit chhin-chhiẽⁿ i-kâi sin-seⁿ, ke-po̍k tit chhin-chhiẽⁿ i-kâi tsú-jîn chiũ kàu. Nâng kì-jiên sĩ hàm ke-tsú tsò Pie̍t-si-phok, hô-khuàng sĩ hàm i-kâi ke-jîn! [26] Kù-tshṳ́ mài-kiaⁿ in: in-ũi m̄-chêng ũ tshâng-khǹg--kâi chiang-lâi bô-tshut-hīn; iā m̄-chêng ũ ṳ́n-ba̍t--kâi bô pun nâng tsai. [27] Uá tõ àm-chẽⁿ kāng-nín tàⁿ--kâi, tie̍h-káng tõ-kuang-mêng; nín thiaⁿ tõ-hĩⁿ--kâi, tie̍h thuân tõ tshù-téng. [28] Suah ne̍k-sin put-lêng suah lêng-hûn--kâi mài-kiaⁿ in: to̍k-to̍k õi-suah lêng-hûn kũa ne̍k-sin tõ tī-ge̍k kâi, chiũ zú-kèng tie̍h-kiaⁿ I. [29] Nõ-chiah mûa-chiah-chiáu khá-m̄-sĩ pùaⁿ-hun-ngŵn lâi-bōi? jia̍k-m̄-sĩ tshut-tõ nín-kâi Pẽ, khî-tang liên che̍k-chiah tou bõi tūi lo̍h-tī: [30] chiũ-sĩ nín-kâi thâu-mô iā lóng-tsóng siàu-tiāⁿ. [31] Kù-tshṳ́ nín mai-kiaⁿ; nín pí-tie̍h tsōi-tsōi mûa-chiah-chiáu zú-kèng kùi-tõng. [32] Kù-tshṳ́ huâm sĩ-mih-nâng ũ-jīn uá tõ nâng mīn-tsôiⁿ, uá iā pit-jīn i tõ uá thiⁿ--chiēⁿ kâi Pẽ mīn-tsôiⁿ. [33] Huâm sĩ-mih-nâng nā-sĩ khì-tso̍h uá tõ nâng mīn-tsôiⁿ, uá iā pit khì-tso̍h i tõ uá thiⁿ--chiēⁿ kâi Pẽ mīn-tsôiⁿ.

[34] Mài siẽⁿ-tsò uá lâi sni sái sì-kan hûa-phêng: uá lâi m̄-sĩ sái sì-kan hûa-phêng, zûi-sĩ sái sì-kan tõng-tshut to-chhieⁿ. [35] Uân-khî uá lâi sĩ sái-kàu nâng so-po̍h i-kâi-pẽ, nńg-tsṳ́ so-po̍h i-kâi-bó, sim-pũ so-po̍h i-kâi ta-ke: [36] kak-nâng kâi chhiû-te̍k chiũ-sĩ i ka-kī ke-lãi kâi nâng. [37] Aì-sieh pẽ-bó ke-kùe uá kâi nâng m̄-kham-kai hó-tshông uá: ài-sieh lâm-nńg-kiáⁿ ke-kùe uá kâi nâng iā-sĩ m̄-kham-kai hó-tshông uá. [38] Bô taⁿ i-kâi tsa̍p--jī kè lâi-tùe uá kâi nâng iā sĩ m̄-kham-kai hó-tshông uáṳ. [39] Tit--tie̍h i-kâi sèⁿ-miāⁿ kâi nâng tin-tò sàng-sit; ũi-tie̍h uá kâi uân-kù tì sàng sèⁿ-miāⁿ kâi nâng huân-tsò tit--tie̍h.

[40] Ũ chiap-na̍p nín kâi nâng chiũ-sĩ chiap-na̍p uá, ũ chiap-na̍p uá kâi nâng chiũ-sĩ chiap-na̍p sái uá Kâi. [41] Ũ chiap-na̍p soiⁿ-tsai-nâng in-ũi i tsò soiⁿ-tsai-nâng, pit-tiāⁿ tit--tie̍h soiⁿ-tsai-nâng kâi siéⁿ-sṳ̀; ũ chiap-na̍p ngĩ-jîn in-ũi i tsò ngĩ-jîn, chiũ pit-tiāⁿ tit--tie̍h ngĩ-jîn kâi siéⁿ-sṳ̀. [42] Put-lũn tî-tiâng chiang che̍k-pue liâng-tsúi pun chí-kâi mûi-sòi--tang che̍k-nâng lim, in-ũi chí-kâi mûi-sòi--kâi tsò uá-kâi mn̂g-thû, uá khak-si̍t kāng-nín tàⁿ, chí-kâi-nâng tuàn-tuàn bõi sit i-kâi siéⁿ-sṳ̀.

11

Kàu-ãu Iâ-sou íⁿ-keng mẽng I tsa̍p-jī mn̂g-thû, chiũ tshông hṳ́-kò lī-khui, khṳ̀-kàu hṳ́ hùaⁿ-kâi-siâⁿ kà-hùe thuân-tãu.

[2] Iak-hân tõ hṳ́ kam-lãi zṳ́-bûn Ki-tok só-kiâⁿ kâi sṳ̄, chiũ sái ka-kī mn̂g-thû lâi-mn̄g Iâ-sou, tàⁿ, [3] Lṳ́ sĩ hṳ́-kâi àiⁿ-lâi--kâi, a-sĩ huân-liáu tie̍h-mōⁿ pa̍t-nâng, né? [4] Iâ-sou chiũ tùi-in tap--tàⁿ, Nín tie̍h-khṳ̀, chiang nín só-thiaⁿ só-thóiⁿ kâi sṳ̄-si̍t kàu-tsai Iak-hân: [5] tsu-zû chheⁿ-mêⁿ--kâi tit--tie̍h thóiⁿ--kìⁿ, kuái-kha--kâi õi-kiâⁿ, thái-ko-kâi tit--tie̍h chheng-kiet, hĩⁿ lâng--kâi õi thiaⁿ-kìⁿ, sí--kâi õi ho̍k-ua̍h, phîn-khiông-nâng tit--tie̍h thiaⁿ hok-im. [6] Tãi-huâm bô ũi-tie̍h uá iàm-sim tsó-thì kâi nâng, chí-kâi-nâng chiũ ũ hok.

[7] Iak-hân tsuàⁿ-kâi mn̂g-thû chiàⁿ-chiàⁿ khṳ̀, Iâ-sou tùi chèng-nâng thî-khí Iak-nân lâi-lũn, chiũ tàⁿ, Nín phêng-ji̍t tshut--khṳ̀ khuàng-iá sĩ àiⁿ-thóiⁿ sĩ-mih-kâi, né? Sĩ lû-tia̍h pĩ huang tshue-tõng, héⁿ? [8] Nín tshut--khṳ̀ at-ho̍k sĩ àiⁿ-thóiⁿ tî-kâi, né? Sĩ che̍k-kâi-nâng chhēng jiû-múi kâi i-ho̍k, héⁿ? Nā-sĩ chhēng jiû-múi i-ho̍k kâi nâng sĩ tõ uâng-keng. [9] Hiá, chièⁿ-seⁿ, nín tshut--khṳ̀ sĩ ũi-tie̍h tsò-nî, né? Sĩ àiⁿ-thóiⁿ kâi soiⁿ-tsai-nâng, héⁿ? Uá kāng-nín tàⁿ, Sĩ, siãng-chhiáⁿ kèng-tũa-kùe soiⁿ-tsai-nâng. [10] Siàⁿ-tsṳ--tang só-kì-tsài, tàⁿ,

Uá khién uá-kâi sài-chiá tõ lṳ́ mīn-tsôiⁿ,

I chiang-àiⁿ tõ lṳ́ thâu-tsôiⁿ ṳ̃-pĩ lṳ́-kâi lōu-thû, chiũ-sĩ chí chí-kâi-nâng.

[11] Uá khak-si̍t kāng-nín tàⁿ, Che̍k-chhiet tshông-tõ hũ-jîn só-seⁿ tsṳ-tang, būe-ũ tūa--kùe si-sói Iak-hân heng-khí--lâi: nā-sĩ thien-kok--tang chì-mûi-sòi--kâi huân tūa--kùe chí-kâi-nâng. [12] Tsṳ̃ si-sói Iak-hân kâi sî-hāu kàu-taⁿ, thien-kok pĩ-nâng ēng-la̍t lâi-tshú, ēng-la̍t kâi nâng chiũ ēng-la̍t lâi tit--tie̍h. [13] In-ũi chèng soiⁿ-tsai-nâng kũa lu̍t-huap ũ ṳ̃-ngân chì-kàu Iak-hân. [14] Zû-jia̍k nín ā-sĩ khéng sêng-siũ, chí-kâi-nâng chiũ-sĩ hṳ́-kâi àiⁿ-lâi kâi Íⁿ-lĩ-a. [15] Huâm ũ hĩⁿ hó-thiaⁿ--kâi, chiũ tie̍h-thiaⁿ. [16] Chí sì-kài kâi nâng, uá hó chiang tî-kâi lâi-pí? Sĩ chhin-chhiẽⁿ nôu-kiáⁿ--húe tsõ tõ koi-chhĩ, hàm in-kâi tâng-phũaⁿ, chiũ tàⁿ, [17] Uń tùi-nín pûn-te̍k, nín bô thiàu-bú; ún tùi-nín pui-ko, nín bô ai-khàu. [18] Uân-khî Iak-hân kàu--lâi, iā m̃-chia̍h, iā m̃-ím, nâng tàⁿ, I sĩ huãm-kúi. [19] Jîn-tsṳ́ kàu--lâi chia̍h iā ím, nâng tàⁿ I sĩ hàuⁿ-chia̍h hàuⁿ-chiú, sĩ sùe-lī tsũe-jîn kâi phêng-iú! Nā-sĩ tì-hũi chiũ-sĩ tshông-tõ só-kiâⁿ--kâi lâi chheng-ngĩ.

[20] Iâ-sou phêng-ji̍t kiâⁿ siãng-tsōi ĩ-lêng tõ tsùaⁿ-kâi siâⁿ-ip, Iâ-sou hṳ́-sî chiũ khui-tshùi cheh-hiâm in, in-ũi in bô hùe-kói. [21] Aī--ā, Ko-la̍h-sìn a, āi--a, Pek-sài-tā a, in-ũi tõ nín--tang só-kiâⁿ kâi ĩ-lêng, zû-jia̍k tõ Thi-lô Si-tũn kiâⁿ chí-kâi, in chiũ tâng-tsá chhēng-mûa ēng hue-hu lâi-hùe-kói--liáu. [22] Nā-sĩ uá kāng-nín tàⁿ, tng sím-phuàn-ji̍t, Thi-lô Si-tũn só-siũ--kâi, pí-nín zú-kèng kōi-siũ. [23] Ka-pek-lông a, lṳ́ khá-sĩ õi seng-kàu thiⁿ-chiēⁿ? lṳ́ pit-tiāⁿ kàng-lo̍h tõ àm-hú: in-ũi tno-lṳ́--tang só-kiâⁿ kâi ĩ-lêng zû-jia̍k tõ Só-to-má ũ-kiâⁿ chí-kâi, Só-to-má chiũ pit-tiāⁿ tshûn kàu kim-ji̍t. [24] Nā-sĩ uá kāng-nín tàⁿ, tng sím-phuàn-ji̍t Só-to-má tī-hng só-siũ--kâi, pí-lṳ́ zú-kèng kōi-siũ.

[25] Tõ hṳ́-kâi sî-hāu Iâ-sou tùi-tap chiũ tàⁿ, Pẽ a, sĩ thiⁿ-tī kâi Tsú, uá chheng-tsàn lṳ́, in-ũi lṳ́ ũ chiang chí chiàⁿ-kâi-sṳ̄, tùi tì-hũi tshong-mêng kâi nâng chiũ ṳ́n-pì, tùi sòi-kiáⁿ chiũ hién-mêng: [26] Pẽ a, si̍t-tsãi sĩ chièⁿ-seⁿ, in-ũi lṳ́ thóiⁿ-tsò chièⁿ-seⁿ sĩ hó. [27] Buān-mue̍h tshông-tõ uá-kâi Pẽ kau-hù uá: Pẽ tsṳ-gūa bô-nâng pat Kiáⁿ; Kiáⁿ, kũa Kiáⁿ só àiⁿ chí-sī kâi nâng, tsṳ-gūa, iā bô nâng pat Pẽ. [28] Nín huâm ũ lâu-khóu teh tãng-tàⁿ kâi nâng, lâi-chiũ uá, uá chiũ àiⁿ sṳ̀-pun nín uaⁿ-jiên. [29] Nín tie̍h-pì uá-kâi taⁿ-uan, lâi-hãu-o̍h uá, in-ũi uá sĩ un-jiû, sim-sèⁿ khiam-sùn, nín chiũ tit--tie̍h nín-kâi-sim uaⁿ. [30] In-ũi uá-kâi taⁿ-uan sĩ kōi, uá-kâi-tàⁿ sĩ khin.

12

Hṳ́-kâi sî-hāu Iâ-sou tõ an-sek-ji̍t tùi shân--kò kùe; I kâi mn̂g-thû tóu khùn, chiàⁿ tõ-tiah be̍h-sūi lâi-chia̍h. [2] Huap-lĩ-sài nâng che̍k-ē thóiⁿ-kìⁿ chiũ kāng I tàⁿ, Ã, lṳ́-kâi mn̂g-thû tsò tõ an-sek-ji̍t m̄-eng-kai tsò kâi sṳ̄. [3] Iâ-sou tùi-in tàⁿ, Tã-phek kũa sûi-tsõng kâi nâng tóu khùn--sî só-tsò kâi sṳ̄ nín khá-sĩ m̄-pat-tha̍k, héⁿ? [4] Chiũ-sĩ Tã-phek ji̍p Siãng-tì kâi keng chia̍h pái-siet kâi piáⁿ, nā-sĩ chí-kâi-piáⁿ Tã-phek m̄-hó-chia̍h, kũa i sûi-tsõng kâi nâng iā m̄-hó-chia̍h, zûi-sĩ chì-si chiàⁿ-hó-chia̍h tiāⁿ-tiāⁿ. [5] Lu̍t-huap só kì-tsài, tàⁿ, Chèng chì-si tùi an-sek-ji̍t tõ-tōiⁿ-lãi huãm an-sek-ji̍t huân-liáu bô-tsũe, chí-kâi nín iā m̄-pat-tha̍k, héⁿ? Nā-sĩ uá kāng-nín tàⁿ, chí-kò ũ tūa--kùe tōiⁿ-tn̂g kâi tõ--kò. [7] Nín jia̍k-sĩ hiáu--tit, Uá sĩ àiⁿ liên-mién, m̄-sĩ àiⁿ chì-sṳ̃, kâi ūe-ì, nín chiũ pit-tiāⁿ m̃-hiâm-ngí bô-tsũe kâi nâng. [8] In-ũi Jîn-tsṳ́ sĩ an-sek-ji̍t kâi tsú.

[9,10] Iâ-sou lī-khui hṳ́-kâi tī-hng, ji̍p in-kâi hũe-tn̂g: ũ che̍k-nâng chiah-chhiú phien-kou. Ũ nâng mn̄g Iâ-sou, chiũ tàⁿ, Tõ an-sek-ji̍t kiâⁿ-ui, hó--mé? in-kâi-ì sĩ àiⁿ-kò I. [11] Iâ-sou chiũ tùi-in tàⁿ, Nín--tang tî-tiâng ũ che̍k-chiah-iêⁿ, an-sek-ji̍t chí-chiah-iêⁿ pua̍h-lo̍h kheⁿ-hām, m̃-khṳ̀-lia̍h i, thua i khí--lâi, mé? [12] Hiá, nâng kùi-tõng--kùe iêⁿ ũ jie̍h-tsōi, né! Kù-tshṳ́ an-sek-ji̍t kiâⁿ-siẽn sĩ ha̍h-ngî. [13] Iáu, Iâ-sou chiũ tùi hṳ́-kâi-nâng hàm--tàⁿ, Tshun-tshut lṳ́-kâi-chhiú. I chiũ tshun-tshut--lâi, chhiú chiũ tshuân-zú, chhin-chhiẽⁿ hièⁿ-pôiⁿ-chiah che̍k-iēⁿ. [14] Huap-lĩ-sài nâng chiũ tshut--khṳ̀ mông-hāi Iâ-sou, àiⁿ tsò-nî lâi suah-mi̍t I.

[15] Iâ-sou kak-tsai, chiũ lī-khui hṳ́-kâi tī-hng: tsōi-tsōi nâng tùe I; [16] Iâ-sou lóng-tsóng ui-hó in, iā kìm-kài in mài kāng I iâng-miâⁿ: [17] lâi-èng ngiām soiⁿ-tsai-nâng Íⁿ-sài-a só-tàⁿ kâi ūe, sĩ tàⁿ,

[18] Chí-kâi sĩ uá só-suán kâi po̍k;

Uá só-ài-sieh, uá-kâi-sim só hí-zua̍t--kâi:

Uá àiⁿ chiang uá-kâi Sîn hù-thoh I,

I chiũ chiang sím-phuàn lâi-chí-sĩ ĩ-pang-nâng.

[19] I m̃-cheⁿ-tòu, m̃-suang-jiáng;

Iā tõ koi-lōu bô-nâng thiaⁿ-kìⁿ I kâi siaⁿ.

[20] Siũ-sieⁿ kâi lû-tia̍h I m̃-chi̍h-tñg,

Tshut-in kâi húe-bûe I m̃-mi̍t-kùe,

Thãi-kàu I chiang sím-phuàn si-kiâⁿ chì-kàu tit-sèng.

[21] Ĩ-pang-nâng iā àiⁿ ngiáng-kõu I kâi miâⁿ.

[22] Hṳ́-kâi sî-hāu ũ nâng khan che̍k-kâi huām-tie̍h kúi, chheⁿ-mêⁿ kiam-kũa é--kâi, lâi-chiũ Iâ-sou: Iâ-sou ui i, sái-kàu hṳ́-kâi-nâng iũ tàⁿ-ūe iũ thói-ⁿ-kìⁿ. [23] Tãi-chèng lóng-tsóng hãi-ĩ, chiũ tàⁿ, Chí-kâi khá-sĩ Tã-phek kâi kiáⁿ-sun, héⁿ? [24] Nā-sĩ Huap-lĩ-sài nâng thiaⁿ-tie̍h chiũ tàⁿ, Chí-kâi-nâng to̍k-tshut kúi bô-hui sĩ chiã kúi-uâng Pie̍t-si-phok. [25] Iâ-sou tsai in-kâi sim-ì chiũ tùi-in tàⁿ, Huâm sĩ-mih kok ka-kī siang-hun-cheⁿ pit-tiāⁿ tì-kàu hṳ-khang; huâm sĩ-mih-siâⁿ, sĩ-mih-ke, ka-kī siang-hun-cheⁿ pit-tiāⁿ bõi sêng-li̍p: [26] siet-sái Sat-tãn to̍k-tshut Sat-tãn, chiũ-sĩ ka-kī siang-hun-cheⁿ; i-kâi-kok tsãi-tit sêng-li̍p, né? [27] Siet-sái uá sĩ chiã Pie̍t-si-phok lâi to̍k-tshut kúi, nín-kâi kiáⁿ-tĩ sĩ chiã tî-tiâng lâi to̍k-tshut kúi, né? in-tshṳ́ in chiũ àiⁿ chí-ngí nín. [28] Zû-jia̍k uá iā-sĩ chiã Siãng-tì kâi Sîn lâi to̍k-tshut kúi, Siãng-tì kâi kok chiũ-sĩ lîm-kàu nín--liáu. [29] Tsãi-tit ji̍p ióng-sṳ̃ kâi tshù-lãi lâi-kiap i-kâi ke-tsṳ, bũ-pit tie̍h soiⁿ pa̍k chí-kâi ióng-sṳ̃, ãu chiàⁿ kiap-chĩn i-kâi tshù-lãi. [30] M̄ kāng-uá tâng--kâi chiũ-sĩ kāng-uá te̍k: m̄ kāng-uá siu-bûa--kâi chiũ-sĩ sùaⁿ-khui. [31] Kù-tshṳ́ uá kāng-nín tàⁿ, kak-iēⁿ kâi tsũe-ak kũa húiⁿ-pãng chiũ pit àiⁿ sià-mién nâng, zûi-sĩ húiⁿ-pãng Siàⁿ-sîn chiũ pit bô sià-mién. [32] Put-lũn sĩ-mih-nâng tàⁿ-ūe lâi-kong Jîn-tsṳ́ chiũ pit àiⁿ sià-mién i; zûi-sĩ ũ nâng tàⁿ-ūe lâi-kong Siàⁿ-sîn, chiũ-sĩ kim--sì chì-kàu lâi--sì pit bô sià-mién i. [33] Tsò chhiū-ba̍k sĩ múi, i-kâi-kúeⁿ iā sĩ múi, ho̍k-sĩ chhiū-ba̍k àu, i-kâi-kúeⁿ iā sĩ àu; in-ũi chhiū-ba̍k sĩ tshông-tõ i-kâi-kúeⁿ, chiàⁿ pat i. [34] Ak-tsûa kâi chéng-lūi a, nín kì-sĩ ak, tsāi-tit õi-tàⁿ siẽn kâi ūe? in-ũi sĩ tshông-tõ sim só tshong-múaⁿ--kâi chiàⁿ tàⁿ-tshut-tshùi. [35] Siẽn-jîn sĩ tshông-tõ i só-chek kâi siẽn, chiũ huat-tshut siẽn: ak-nâng tshông-tõ i só-chek kâi ak chiũ huat-tshut ak. [36] Uá iũ kāng-nín tàⁿ, Huâm nâng só-tàⁿ múe-che̍k-kù bô-iah kâi ūe, tõ sím-phuàn-ji̍t pit-tiāⁿ kak-kak keng-tshut chí-kâi. [37] Uân-khî lṳ́ sĩ àn lṳ́-kâi-ūe chiũ lâi-tit chheng-ngĩ, iā sĩ àn lṳ́-kâi-ūe lâi-pĩ ngí-tsũe.

[38] Tng-sî tha̍k-tsṳ-nâng kũa Huap-lī-sài nâng--tang ũ nâng tùi Iâ-sou tàⁿ, Sin-seⁿ a, ún àiⁿ-tóiⁿ lṳ́ kiâⁿ che̍k-kâi ĩ-chiah. [39] Iâ-sou chiũ tùi-in tap--tàⁿ, Kan-ak kâi sì-kài khiû ĩ-chiah, tŵ soiⁿ-tsai Iak-ná kâi ĩ-chiah tsṳ-gūa pit bô pa̍t-kâi ĩ-chiah pun in thóiⁿ: [40] zû Iak-ná saⁿ-ji̍t saⁿ-mê tõ tūa-hŵ kâi tóu-tói, chièⁿ-seⁿ Jîn-tsṳ́ chiang-àiⁿ saⁿ-ji̍t saⁿ-mê tõ tī pak-lãi. [41] Nî-nî-mûi nâng tng sím-phuàn kâi sî-hāu chiang-àiⁿ kāng chí sì-kài-kâi nâng tsò-pû khiã lâi-tiāⁿ-tsũe in: in-ũi in che̍k thiaⁿ-kìⁿ Iak-ná kâi ūe chiũ hùe-kói, hô-khuàng ũ tūa--kùe Iak-ná tõ--chí-kò, mé. [42] Nâm-hng kâi nńg-uâng tng sím-phuàn kâi sî-hāu chiang-àiⁿ kāng chí sì-kài kâi nâng tsò-pû khiã lâi tiāⁿ-tsũe in: in-ũi nńg-uâng tshông-tõ tī-ke̍k lâi-thiaⁿ Só-lô-mn̂g kâi tì-hũi; hô-khuàng ũ tūa--kùe Só-lô-mn̂g tõ--chí-kò, mé.

[43] Siâ-kúi lī-khui nâng chiũ tõ bô-tsúi kâi tī-hng kiâⁿ-tsáu, àiⁿ-tshūe uaⁿ-hiah, bõi-tit-tie̍h. [44] Liáu chiũ tàⁿ, Uá àiⁿ kui-tńg uá-kâi-tshù tsá--tsūn tshông-tõ hṳ́-kò tshut--lâi kâi; íⁿ-keng kàu--liáu, chiũ thóiⁿ-kìⁿ hṳ́-kâi-tshù khang-chẽⁿ, siu-sàu chheng-tshái. [45] Chiũ khṳ̀, iũ tùa ke chhit-kâi-sîn, pí i kèng ak--kâi, tsò-pû ji̍p-khṳ̀ khiã-khí tõ-hṳ́-kò: tì-kàu hṳ́-kâi-nâng āu-lâi kâi chhêng-tsuãng pí--tie̍h soiⁿ kèng-sĩm. Chí-kâi ak kâi sì-kài iā chiang-àiⁿ chièⁿ-seⁿ.

[46] Iâ-sou huân-liáu tùi chèng-nâng tàⁿ-ūe kâi sî-hāu, tú-ngõ I kâi a-bó kũa I kâi hiaⁿ-tĩ khiã tõ-hṳ́-gūa àiⁿ kāng I tàⁿ-ūe. [47] Ũ che̍k-nâng pò-tsai Iâ-sou, tàⁿ, Lṳ́-kâi a-bó kũa lṳ́-kâi hiaⁿ-tĩ khiã tõ-hṳ́-gūa àiⁿ kāng-lṳ́ tàⁿ-ūe. [48] Iâ-sou tùi hṳ́-kâi pò-tsai kâi nâng tàⁿ, Tî-tiâng sĩ uá-kâi a-bó? tî-tiâng sĩ uá-kâi hiaⁿ-tĩ, né? [49] Chiũ hiàng I kâi mn̂g-thû tshun-tshut I kâi chhiú, chiũ tàⁿ, Chiá-kâi chiũ-sĩ uá-kâi a-bó kũa uá-kâi hiaⁿ-tĩ! In-ũi huâm sĩ-mih-nâng tsun-kiâⁿ uá thiⁿ--chiēⁿ kâi Pẽ kâi chí-ì, chí-kâi-nâng chiet-sī uá-kâi hiaⁿ-tĩ, uá-kâi chí-mūe, kũa uá-kâi a-bó.

13

Tng hṳ́-che̍k-ji̍t Iâ-sou tshông tshù-lãi tshut--khṳ̀ tsõ tõ hái-kîⁿ. [2] Ũ tsōi-tsōi nâng chiâⁿ-khûn chiâⁿ-khûn ha̍h-bûa lâi chiũ-kṳ̃n I, in-tshṳ́ Iâ-sou chiũ chiẽⁿ-tsûn lâi-tsõ; chèng-nâng lóng-tsóng khiã tõ hái-kîⁿ. [3] Iâ-sou chiũ ēng ke-ke-sṳ̄ siet phì-zũ, tùi chèng-nâng káng--tàⁿ,

[4] Ũ iā-chéng kâi nâng tshut-khṳ̀ iā; iā kâi sî-hāu, ũ kâi kau-lau̍h tõ lōu-kîⁿ, chiáu kàu chiũ chĩn-chia̍h-tiāu chí-kâi: [5] ũ-kâi kau-lau̍h tõ chie̍h-pûaⁿ kâi tī-ūi, hṳ́-kò bô hièⁿ-tsōi thôu: in-ũi thôu chhién-po̍h, sûi-chiet chiũ huat--khí-lâi: [6] ji̍t che̍k-ē chiũ pha̍k-tiāu; in-ũi bô-kṳn kù-tshṳ́ chiũ kou-ta--khṳ̀. [7] Ũ kâi kau-lau̍h tõ chhì-tsâng--tang; chhì huat-kûiⁿ chiũ iòng-sat-tiāu. [8] Ũ kâi kau-lau̍h tõ pûi-jiâu kâi tī, chiũ kit-si̍t, ũ kâi che̍k-peh-pũe, ũ kâi la̍k-tsa̍p-pũe, ũ kâi saⁿ-tsa̍p-pũe. [9] Huâm ũ hĩⁿ kâi nâng chiũ tie̍h-thiaⁿ.

[10] Chèng-mn̂g-thû kiâⁿ-bûa chiũ mn̄g--tàⁿ, Lṳ́ tùi chèng-nâng ēng phì-zũ lâi-tàⁿ-ūe sĩ tsò-nî, né? [11] Iâ-sou tùi-in tap--tàⁿ, Thien-kok kâi àu-biāu, chiũ pun nín tsai chí-kâi, bô-pun in--nâng tsai. [12] Uân-khî tãi-huâm ũ--kâi-nâng chiũ àiⁿ pun i, sái i ũ tshong-tsok: bô-ũ kâi nâng, liên-kũa i só-ũ--kâi chiũ àiⁿ kāng-i to̍h-tńg. [13] Kù-tshṳ́ uá chiàⁿ ēng phì-zũ kâi ūe kāng-in tàⁿ; in-ũi in thóiⁿ thóiⁿ-m̄-kìⁿ, thiaⁿ thiaⁿ-m̄-kàu, iā bõi hiáu-ngõ. [14] Íⁿ-sài-a só-ṳ̃-tàⁿ kâi ūe, tõ chí-kâi-nâng chiũ èng-ngiām--liáu, chí-kâi-ūe sĩ tàⁿ,

Nín chiang-àiⁿ-thiaⁿ, li tshuân-bô thiaⁿ-mêng;

Chiang-àiⁿ-thóiⁿ, li tshuân-bô thóiⁿ-kìⁿ:

[15] In-ũi chí-kâi-mîn kâi sim chiãm-chiãm nguán-ngẽ--liáu,

In-kâi-hĩⁿ lâng,

In ha̍p-mi in kâi-ma̍k--liáu;

Khióng-ùi ho̍k-chiá ēng in-kâi-ma̍k thóiⁿ-kìⁿ,

En̄g in-kâi-hĩⁿ thiaⁿ-kìⁿ,

En̄g in-kâi-sim hiáu-ngõ,

Chiũ huán-hùe,

Uá chiũ ui-hó in.

[16] Nā-sĩ nín-kâi-ma̍k ũ hok, uân-khî ũ thóiⁿ-kìⁿ, nín-kâi-hĩⁿ ũ hok, uân-khî ũ thiaⁿ-kìⁿ. [17] Uá khak-si̍t kāng-nín tàⁿ, Soiⁿ-tsá ũ ke-ke soiⁿ-tsai-nâng kũa ngĩ-jîn, àiⁿ-thóiⁿ nín só thóiⁿ--kìⁿ kâi bõi-tit-tie̍h thóiⁿ, àiⁿ-thiaⁿ nín só-thiaⁿ--kìⁿ kâi bõi-tit-tie̍h thiaⁿ.

[18,19] Kù-tshṳ́ nín tie̍h-lâi-thiaⁿ chiá iā-chéng phì-zũ. Put-lũn sĩ-mih-nâng thiaⁿ thien-kok kâi tãu iā-sĩ m̄-hiáu-ngõ, hṳ́-kâi ak--kâi chiũ kàu, to̍h-khṳ̀ i sim--tang só-iā--kâi. [20] Chiá chiũ-sĩ só-iā tõ lōu-kîⁿ kâi. Iā tõ chie̍h-pûaⁿ kâi ūi-tshṳ̀, chiũ-sĩ nâng thiaⁿ-tãu sûi-chiet hí-na̍p; [21] zûi-sĩ lãi bô-kṳn iā sĩ chiãm-sî tiāⁿ-tiāⁿ; ki̍p-kàu ũi-tie̍h tãu ngõ-tie̍h kan-khóu khún-to̍k sûi-chiet iàm-sim tsó-thì. [22] Iā tõ chhì-tsâng--tang chiũ-sĩ nâng thiaⁿ-tãu, chí sì--kan kâi tsa̍p-liãm tshâi-mue̍h kâi mî-ho̍k iòng-sat chí-kâi-tãu, i chiũ bô kit-si̍t. [23] Iā tõ pûi-jiâu kâi tī, chiũ-sĩ nâng thiaⁿ-tãu chiũ hiáu-ngõ; chí-khí chiũ kúaⁿ-chin kit-si̍t, ũ kâi huat-seⁿ che̍k-peh-pũe, ũ kâi la̍k-tsa̍p-pũe, ũ kâi saⁿ-tsa̍p-pũe.

[24] Iâ-sou iũ siet kâi phì-zũ tùi-in tàⁿ, Thien-kok sĩ phì-zũ tsò nâng iā hó kâi chéng-chí tõ i-kâi-tshân: [25] nâng u̍t kâi sî-hāu i-kâi chhiû-te̍k chiũ kàu iā phōiⁿ tõ i-kâi-be̍h--tang, chiũ khṳ̀. [26] Ki̍p-kàu be̍h-tâ tūa--khí-lâi chiũ kit-si̍t, hṳ́-sî phōiⁿ iā tshut-hīn. [27] Tsú-jîn kâi po̍k lâi-pò--tàⁿ, Tsú, a, lṳ́ khá-m̄-sĩ ēng hó kâi chéng-chí iā tõ lṳ́-kâi-tshân, né? tshông-tî-kò ũ chí-kâi-phōiⁿ, né? [28] Tsú-jîn ìn--tàⁿ, Chí-kâi sĩ chhiû-jîn só-tsò--kâi. Po̍k chiũ mn̄g--tàⁿ, Hiá, lṳ́ àiⁿ ún khṳ̀ mán-tiāu, mé? [29] Chiũ ìn--tàⁿ, M̄-hó; khióng-ùi nín tõ mán phōiⁿ, kũa be̍h tsò-che̍k-ē po̍ih-tiāu. [30] Iông chí-nõ-kiãⁿ tsò-pû tūa, thãi-kàu siu-tang; tõ siu-tang kâi sî-hāu uá àiⁿ hun-hù siu-kuah kâi nâng, Soiⁿ tie̍h siu-si̍p chí-kâi-phōiⁿ, hâ-tsò-pé lâi sie-tiāu: ãu--liáu siu-be̍h ji̍p uá-kâi-tshng.

[31] Iâ-sou iũ siet kâi phì-zũ tùi-in tàⁿ, Thien-kok sĩ chhin-chhiẽⁿ che̍k-lia̍p kài-lua̍h-chéng, nâng khie̍h--lâi iā tõ i-kâi-tshân; [32] chiá sĩ sòi--kùe peh-iēⁿ kâi chéng-chí; ki̍p-kàu seⁿ-chiáng, chiũ tūa--kùe kak-iēⁿ kâi tshài, huat-chiâⁿ-chhiū, sái-kàu thiⁿ--tang kâi pue-chiáu lâi chhi-hiah tõ i-kâi-ki.

[33] Iâ-sou iũ siet kâi phì-zũ tùi-in tàⁿ; Thien-kok sĩ chhin-chhiẽⁿ kàⁿ-bó, che̍k-kâi hũ-jîn khie̍h--lâi lo̍h tõ saⁿ-táu-mīⁿ hṳ́-tói, tì-kàu lóng-tsóng huat-kàⁿ.

[34] Chí tsùaⁿ-kâi-sṳ̄ Iâ-sou ēng phì-zũ lâi tùi chèng-nâng tàⁿ--kâi; bô-m̄-sĩ ēng phì-zũ lâi tùi-in tàⁿ-ūe; [35] lâi èng-ngiām thoh soiⁿ-tsai-nâng só-tàⁿ kâi ūe, sĩ tàⁿ,

Uá àiⁿ khui-tshùi lâi-siet phì-zũ;

Tsṳ̃ tshàng-sì íⁿ-lâi só ṳ́n-tshâng--kâi àiⁿ huat-mêng tshut--lâi.

[36] Aũ--liáu Iâ-sou lī-khui chèng-nâng, ji̍p--khṳ̀ tshù-lãi: I chèng-mn̂g-thû kiâⁿ-bûa lâi tàⁿ, Chí-kâi tshân-phōiⁿ kâi phì-zũ chhiáⁿ kāng-ún kói-mêng. [37] Iâ-sou chiũ ìn--tàⁿ, Iā hó-chéng--kâi chiũ-sĩ Jîn-tsṳ́; [38] tshân chiũ-sĩ sì-kài; múi-chéng chiũ-sĩ thien-kok kâi tsṳ́-mîn; phōiⁿ chiũ-sĩ mô-kúi: siu-tang kâi sî-hāu chiũ-sĩ sì-kài kâi mua̍t-ji̍t; siu-kuah--kâi chiũ-sĩ thien-sài. [40] Chhin-chhiẽⁿ phōiⁿ siu-si̍p-bûa chiũ lâi sie-húe, tõ sì-kài kâi kat-ke̍k pit-tiāⁿ iā sĩ chièⁿ-seⁿ. [41] Jîn-tsṳ́ chiang-àiⁿ sái I kâi sài-chiá, tshông-tõ I-kâi kok--tang siu-si̍p che̍k-khài hām-hāi nâng tõ tsũe, [42] kũa kiâⁿ put-ngĩ kâi nâng, lâi ka̍k-lo̍h húe-lôu, tõ hṳ́-kò ũ ai-khàu kã-khí. [43] Hṳ́-sî ngĩ-jîn tõ in-kâi Pẽ kâi kok chiũ kuang-iãu zû ji̍t. Ũ hĩⁿ kâi nâng chiũ tie̍h-thiaⁿ.

[44] Thien-kok sĩ chhin-chhiẽⁿ tshâi-pó khǹg tõ tshân; che̍k-kâi-nâng ngõ--tie̍h chiũ khǹg-bûa; huaⁿ-hí chiũ khṳ̀ bōi-tiāu huâm só-ũ--kâi lâi bói chí-kâi-tshân.

[45] Thien-kok iũ sĩ chhin-chhiẽⁿ tsò siang-kheh kâi nâng tõ tshūe múi-tsu: [46] ngõ--tie̍h che̍k-lia̍p chì-ta̍t-chîⁿ--kâi, chiũ khṳ̀ bōi-tiāu só-ũ kâi mue̍h, lâi-bói chí che̍k-lia̍p-tsu.

[47] Thien-kok iũ sĩ chhin-chhiẽⁿ mãng pha tõ hái, tsũ-chi̍p kak-lūi: íⁿ-keng múaⁿ--liáu, chiũ thua chiẽⁿ-phiâⁿ--lâi; [48] nâng tsõ--lo̍h-khṳ̀, to̍h chí-kâi hó--kâi lo̍h khì-kũ, m̄-hó--kâi chiũ ka̍k-tiāu tõ-gūa. [49] Sì-kài kâi kat-ke̍k iā sĩ chièⁿ-seⁿ: thien-sài chiang-àiⁿ tshut--lâi, tõ ngĩ-jîn tsṳ-tang lâi-pie̍t-tshut ak-nâng, ka̍k in lo̍h húe-lôu: [50] tõ-hṳ́-kò ũ ai-khàu kã-khí.

[51] Chí tsùaⁿ-kâi-sṳ̄ nín ũ lóng-tsóng hiáu-ngõ, mé? In ìn--tàⁿ, Ũ. [52] Iâ-sou chiũ tùi-in tàⁿ, Kù-tshṳ́ huâm ũ ha̍k-si̍p thien-kok tõ-lí kâi sin-seⁿ, sĩ chhin-chhiẽⁿ tsò ke-tsú kâi nâng, tshông tõ i-kâi khòu-pâng huat-tshut sin-kū kâi mue̍h.

[53] Kàu Iâ-sou tàⁿ-uân chí-tsùaⁿ-kâi phì-zũ I chiũ lī-khui hṳ́-kâi tī-ūi. [54] Kàu I ka-kī kâi tī-hng chiũ tõ in-kâi hũe-tn̂g kà-hùe nâng, tì-kàu chèng-nâng khî-ĩ, chiũ tàⁿ, Chí-kâi-nâng tshông-tî-kò tit chí-kâi tì-hũi kũa chí-kâi ĩ-lêng, né? [55] Chí-kâi khá-m̄-sĩ hṳ́-kâi ba̍k-kang kâi kiáⁿ, hóⁿ? I-kâi a-bó khá-m̄-sĩ miâⁿ tsò Má-lĩ-a? I kâi hiaⁿ-tĩ, khá-m̄-sĩ Iá-kok, Iak-sek, Si-mn̂g, Iû-tã? [56] I kâi ché-mūe khá-m̄-sĩ lóng-tsóng kāng-nán tsò-pû tõ chí-kò? Chièⁿ-seⁿ chí-kâi-nâng sĩ tshông-tî-kò tit chí tsùaⁿ-kâi-sṳ̄. [57] In ũi-tie̍h Iâ-sou chiũ iàm-sim tsó-thì. Iâ-sou chiũ tùi-in tàⁿ, Soiⁿ-tsai-nâng, jia̍k-m̄-sĩ tõ ka-kī kâi tī, ka-kī kâi ke, bô-m̄ tit nâng tsun-kèng. [58] Iâ-sou kiâⁿ ĩ-lêng tõ-hṳ́-kò bô-mih-tsōi, uân-khî nâng m̄-sièn kâi uân-kù.

14

Tõ hṳ́-kâi sî-hāu hun-hong kâi kun-uâng Hi-lu̍t zṳ́-bûn Iâ-sou kâi miâⁿ-siaⁿ, chiũ tùi i-kâi-chhîn tàⁿ, [2] Chí-kâi sĩ Si-sói Iak-hân; sí-liáu ho̍k-ua̍h: kù-tshṳ́ chí-kâi ĩ-lêng kiâⁿ tõ i-kò lâi.

[3] Uân-khî tng-tsho, Hi-lu̍t ũ lia̍h Iak-hân, khún-pa̍k i, siu-kìm tõ kam, chiũ-sĩ ũi-tie̍h i hiaⁿ-tĩ Hui-le̍k kâi chhi Hi-lô-tí kâi sṳ̄. [4] In-ũi Iak-hân pat tùi Hi-lu̍t tàⁿ, Lṳ́ siu-na̍p chí-kâi-hũ sĩ m̄-ha̍h-ngî. [5] Hi-lu̍t àiⁿ-suah i, tãn-sĩ ùi-kũ chèng-nâng, in-ũi chèng-nâng sĩ thóiⁿ Iak-hân tsò soiⁿ-tsai-nâng. [6] Tú-ngõ Hi-lu̍t tsò seⁿ-ji̍t, Hi-lô-tí kâi nńg-tsṳ́ ko-bú tõ sia̍h-tsôiⁿ, sái-kàu Hi-lu̍t huaⁿ-hí. [7] In-tshṳ́ Hi-lu̍t huat-sī, èng-hṳ́ i put-lũn só-khiû--kâi chiũ àiⁿ sṳ̀-pun i. [8] I pun i-kâi a-bó só kà-so, chiũ tàⁿ, Chhiáⁿ chiang Si-sói Iak-hân kâi thâu, pàng pûaⁿ-téng tõ-chí-kò sṳ̀-pun uá. [9] Kun-uâng sĩ huân-ló; nā-sĩ íⁿ-keng huat-sī--liáu, iũ-chhiáⁿ ũi-tie̍h tâng-sia̍h kâi nâng tõ--kò, chiũ hun-hù tie̍h sṳ̀-pun i; [10] sái nâng khṳ̀ kam-lãi tsám Iak-hân kâi thâu. [11] Tshō i-kâi-thâu tõ pûaⁿ-téng khâng lâi sṳ̀-pun nńg-tsṳ́: nńg-tsṳ́ chiũ khâng lâi pun i-kâi a-bó. [12] I-kâi mn̂g-thû lâi tshú i-kâi sin-si khṳ̀-tsǹg; liáu chiũ lâi kàu-tsai Iâ-sou.

[13] Iâ-sou thiaⁿ--tie̍h chiũ chiẽⁿ-tsûn lī-khui hṳ́-kò, ka-kī khṳ̀ tõ khuàng-iá kâi tī-hng: tãi-chèng-ke thiaⁿ-tsai chiũ tshông-tõ kak siâⁿ-ip pōu-kiâⁿ khṳ̀-tùe I.

[14] Iâ-sou tshut--lâi thóiⁿ-kìⁿ che̍k tūa-khûn-nâng, chiũ liên-mién in, ũ-pēⁿ--kâi chiũ kāng-in ui. [15] Ji̍t háⁿ-àm--liáu, mn̂g-thû kiâⁿ-bûa tùi Iâ-sou tàⁿ, Chí-kò sĩ khuàng-iá, sî-hāu íⁿ-keng kùe-uàⁿ--liáu: chhiáⁿ sùaⁿ-khui tãi-chèng-ke, sái in lo̍h-hieⁿ bói-chia̍h. [16] Iâ-sou tùi-in tàⁿ, In mín-ēng khṳ̀, nín khie̍h pun in chia̍h chiũ hó. [17] Mn̂g-thû ìn--tàⁿ, Uń tõ-chí-kò put-kùe ũ ngõu-kò-piáⁿ kũa nõ-búe-hŵ tiāⁿ-tiāⁿ. [18] Iâ-sou tàⁿ, Khie̍h--lâi uá chí-kò. [19] Iâ-sou chiũ mẽng tãi-chèng-ke tsõ--pàng tsháu-pou; chiũ khie̍h hṳ́ ngõu-kò-piáⁿ kũa nõ-búe-hŵ, ngiáng-thiⁿ, táu-tsok liáu chiũ peh-phùa, khie̍h-piáⁿ pun mn̂g-thû, mn̂g-thû khie̍h pun tãi-chèng-ke. [20] Lóng-tsóng chia̍h kàu-pá: chia̍h-tshûn hṳ́-tshoh tshùi-tshùi--kâi to̍h-khí-lâi tsa̍p-jī-kheng tĩⁿ-tĩⁿ. [21] Chia̍h kâi nâng, hũ-jîn sòi-kiáⁿ mài-sǹg, tãi-iak ũ ngõu-tshoiⁿ nâng.

[22] Iâ-sou sûi-chiet tshui-tshok I kâi mn̂g-thû chiẽⁿ-tsûn, soiⁿ kùe hièⁿ-pôiⁿ, thãi-kàu I sùaⁿ-khui tãi-chèng-ke. [23] Iâ-sou íⁿ-keng sùaⁿ-khui tãi-chèng-ke liáu chiũ ka-kī chiẽⁿ-suaⁿ khî-táu: ji̍t àm--liáu tuaⁿ-tuaⁿ ka-kī tõ-hṳ́-kò. [24] Hṳ́-chiah-tsûn taⁿ tõ hái tìn-tang, pun tsúi-éng iâu-pùa, in-ũi sĩ nge̍k-huang. [25] Hṳ́-mê sì-keⁿ kâi sî-hāu Iâ-sou kiâⁿ tõ hái-mīn chiũ huâng-khióng, tàⁿ, Sĩ kuài-mue̍h a; chiũ kiaⁿ kàu tõ hàm-kiè. [27] Iâ-sou sûi-chiet chiũ tùi-in tàⁿ, Nín uaⁿ-sim; sĩ uá; nín mín-ēng kiaⁿ. [28] Pí-tit ìn--tàⁿ, Tsú a, zû-kuáⁿ sĩ lṳ́ chiũ hó mẽng uá kiâⁿ tõ tsúi-mīn lâi-chiũ lṳ́. [29] Iâ-sou tàⁿ, Lâi. Pí-tit chiũ tshông-tõ tsûn lo̍h--khṳ̀, kiâⁿ tõ tsúi-mīn lâi-chiũ Iâ-sou. [30] Tãn-sĩ thóiⁿ-kìⁿ hṳ́-kâi huang chiũ kiaⁿ-kũ; ki-ki tîm--lo̍h-khṳ̀, chiũ u-hàm--tàⁿ, Tsú a, kiù uá. [31] Iâ-sou sûi-chiet tshun-chhiú lĩm-kín i, kāng-i tàⁿ, Sié-sìn kâi nâng a, tsò-nî gî, né? [32] In che̍k-ē chiẽⁿ-tsûn huang chiũ tiām. Tsûn-tói kâi nâng pài Iâ-sou, chiũ tàⁿ, [33] Lṳ́ chin-chin sĩ Siãng-tì kâi Kiáⁿ.

[34] Íⁿ-keng kùe hièⁿ-pôiⁿ--liáu chiũ kàu Kek-nî-sat-le̍k uá-suaⁿ. [35] Hṳ́-kâi tī-hng kâi nâng che̍k-ē jīn--tie̍h I, chiũ thuân kàu sì-ûi kâi tī-hng, ũ-pēⁿ kâi nâng lóng-tsóng tùa lâi-chiũ I; [36] khiû Iâ-sou tuaⁿ-tuaⁿ kâi saⁿ-kṳ iông in mông--tie̍h: mông--tie̍h kâi nâng che̍k-khài tit tshuân-zú.

15

Ũ Huap-lĩ-sài nâng kũa tha̍k-tsṳ-nâng tshông-tõ Iâ-lũ-sat-léng lâi-chiũ Iâ-sou, mn̄g--tàⁿ, [2] Tsò-nî lṳ́-kâi mn̂g-thû huãm--tie̍h soiⁿ-nâng só-zũi-thuân, né? in-ũi chia̍h kâi sî-hāu in bô sói-chhiú. [3] Iâ-sou tùi-in tap--tàⁿ, Tsò-nî nín iā in-ũi nín-kâi zũi-thuân lâi huãm--tie̍h Siãng-tì kâi kài-mẽng, né? [4] Siãng-tì ũ tàⁿ, Tie̍h-kèng lṳ́-kâi-pẽ kũa lṳ́-kâi-bó: iũ ũ tàⁿ, U mē pẽ-bó kâi nâng chiũ tie̍h-tshú-sí. [5] To̍k-to̍k nín sĩ tàⁿ, Put-lũn tî-tiâng tùi i-kâi-pẽ ho̍k-sĩ tùi i-kâi-bó tàⁿ, Lṳ́ só pńg-téng tit--tie̍h uá kâi, íⁿ-keng hièn-tsò lói-mue̍h liáu; [6] chí-kâi-nâng chiũ-sĩ bô kèng i-kâi-pẽ. Nín sĩ in-ũi nín-kâi zũi-thuân hùi-tiāu Siãng-tì kâi mẽng. [7] Ké-hó kâi nâng a, Íⁿ-sài-a só ṳ̃-ngân lâi-chí nín kâi si̍t-tsãi sĩ, i-kâi-ūe sĩ tàⁿ,

[8] Chí-kâi-mîn ēng tshùi-tûn lâi-kèng uá,

Nā-sĩ in-kâi-sim lî-uá hñg.

In pài uá iā sĩ khang-khang.

[9] Uân-khî in sĩ ēng nâng só-mẽng--kâi tsò kà-hùn, lâi kà-hùe nâng.

[10] Iâ-sou hàm tãi-chèng-ke bûa--lâi, chiũ tùi-in tàⁿ, Nín tie̍h-thiaⁿ lâi hiáu-ngõ: [11] M̄-sĩ ji̍p tõ-tshùi--kâi õi u-ùe nâng, to̍k-to̍k tshông-tshùi tshut--lâi-kâi, chiàⁿ õi u-ùe--tie̍h nâng.

[12] Hṳ́-sî mn̂g-thû bûa--lâi chiũ mn̄g I, tàⁿ, Huap-lĩ-sài nâng thiaⁿ-kìⁿ chí-kâi-ūe chiũ lia̍h-tsò iàm-tsūaⁿ, lṳ́ tsai, mé? [13] Iâ-sou ìn--tàⁿ, Put-lũn tî-kâi-chhiū m̄-sĩ uá Thien-pẽ só-chèng--kâi, pit-tiāⁿ liú-tiāu i-kâi-kṳn. [14] Chhiáⁿ thèng in khṳ̀: in sĩ chheⁿ-mêⁿ nâng tõ tshūa-lōu. Zû-jia̍k chheⁿ-mêⁿ khan chheⁿ-mêⁿ, pit-tiāⁿ jī-ke pua̍h-lo̍h kheⁿ-hām. [15] Pí-tit tùi I tàⁿ, Chí-kâi phì-zũ chhiáⁿ kāng-ún kói-mêng. [16] Iâ-sou chiũ tàⁿ, Liên nín huân-sĩ m̄-hiáu, hóⁿ? [17] Nín khá-m̄-tsai huâm tshông-tshùi ji̍p--kâi, kiâⁿ-kàu tóu-pak, lâi hám-tshut tõ-chhè, né? [18] Zûi-to̍k tshông-tshùi tshut--lâi-kâi, chiũ-sĩ tshông-tõ sim tshut--lâi; chiá chiũ u-ùe--tie̍h nâng. [19] Tshông-tõ sim tshut--lâi chiũ-sĩ ak-liãm, hiong-suah, kan-îm, sai-ha̍h, thau-tãu, buáng-chèng, ak-tshùi: [20] sĩ chí-tsùaⁿ-kâi chiàⁿ-õi u-ùe--tie̍h nâng: tuaⁿ-tuaⁿ būe sói-chhiú chiũ khṳ̀-chia̍h, chí-kâi bõi u-ùe-nâng.

[21] Iâ-sou tshông-tõ hṳ́-kò tshut--khṳ̀ thò-kàu Thi-lô Si-tũn. [22] Ũ che̍k-kâi Ka-nâm kâi hũ-jîn tõ-hṳ́ lîn-kṳ̃n tshut--lâi, hàm--tàⁿ, Tsú a, Tã-phek kâi kiáⁿ-sun a, liên-mién uá; uá-kâi nńg-tsṳ́ huãm-tie̍h-kúi kan-khóu tsãi. [23] Iâ-sou bô che̍k-kù-ūe ìn--i. I kâi mn̂g-thû bûa--lâi khiû I, chiũ tàⁿ, Hó sái i khṳ̀; i tõ nán ãu-mīn u-hàm. [24] Iâ-sou chiũ ìn-tàⁿ, Uá hõng-sài lâi, put-gūa sĩ ũi-tie̍h Íⁿ-sek-lie̍t ke kâi buâng-ièⁿ tiāⁿ-tiāⁿ. [25] Hũ-jîn lâi pài I, chiũ tàⁿ, Tsú a, hũ-tsõ uá. [26] Iâ-sou ìn--tàⁿ, Khie̍h kiáⁿ-jî kâi piáⁿ ka̍k pun káu chiũ m̄-ha̍h-sek. [27] Hũ-jîn chiũ tàⁿ, Tsú a, sĩ: sui-sĩ káu, i-kâi tsú-jîn kâi tshn̂g-ẽ ka-lau̍h kâi piáⁿ-tshùi iā tit--tie̍h chia̍h. [28] Iâ-sou chiũ tùi-i ìn--tàⁿ, Hũ-jîn a, lṳ́-kâi-sìn sĩ tūa, zû lṳ́ só-àiⁿ--kâi hó tit--tie̍h. Tshông hṳ́-che̍k-sî i-kâi nńg-tsṳ́ chiũ tit tshuân-zú.

[29] Iâ-sou lī-khui hṳ́-kò khṳ̀-kàu Ka-lĩ-lĩ hái-kîⁿ; peh-chiẽⁿ-suaⁿ tsõ--tõ-kò. [30] Tsōi-tsōi nâng chiâⁿ-khûn chiâⁿ-khûn lâi-chiũ I, tùa ũ kuái-kha--kâi, chheⁿ-mêⁿ--kâi, é--kâi, phùa-sièⁿ--kâi, kũa pa̍t-iēⁿ--kâi tsōi-tsōi, tsò-pû lâi, tâu tõ Iâ-sou kha-ẽ: [31] Iâ-sou chiũ ui in: sái-kàu chèng-nâng hãi-ĩ, in-ũi thóiⁿ-kìⁿ é--kâi tõ-tàⁿ-ūe, phùa-sièⁿ--kâi uân-tshuân, kuái-kha--kâi tõ-kiâⁿ, chheⁿ-mêⁿ--kâi ma̍k kng: chèng-nâng chiũ kui-iông-kuang tõ Íⁿ-sek-lie̍t kâi Siãng-tì.

[32] Iâ-sou hàm I kâi mn̂g-thû bûa--lâi, chiũ tàⁿ, Uá liên-mién--tie̍h chí-chèng-nâng, kāng-uá tsò-pû kàu-taⁿ saⁿ-ji̍t--liáu, iā bô-muêh hó-chia̍h: uá m̄-kam sái in tóu-khùn chiũ khṳ̀, khióng-ùi lōu--tang khùn-he̍k. Mn̂g-thû tùi I tàⁿ, [33] Nán tõ khuàng-iá kâi tī-hng tshông-tî-kò õi-tit hièⁿ-tsōi piáⁿ hó-pun chièⁿ-tūa khûn-nâng chia̍h-pá, né? [34] Iâ-sou mn̄g in, tàⁿ, Nín ũ jie̍h-tsōi-kò piáⁿ? [35] Mn̂g-thû tàⁿ, Chhit-kò kũa lân-ló hŵ-kiáⁿ. Iâ-sou chiũ mẽng chèng-nâng tsõ-lo̍h tī-mīn; [36] khie̍h chhit-kò-piáⁿ kũa hṳ́-kâi-hŵ, tsok-siā liáu peh-khui, hù-pun mn̂g-thû, mn̂g-thû chiũ khie̍h-khṳt chèng-nâng. [37] Lóng-tsóng chia̍h kàu-pá: to̍h-khí só-tshûn tshùi-tshùi kâi, chhit-nâⁿ tĩⁿ-tĩⁿ. [38] Chia̍h--kâi-nâng, tŵ hũ-jîn sòi-kiáⁿ tsṳ-gūa, ũ sì-tshoiⁿ-nâng. [39] Iâ-sou sùaⁿ-khui chèng-nâng, chiũ chiẽⁿ-tsûn lâi-kàu Muat-tã-la̍h kâi tī-kài.

16

Huap-lĩ sài kũa Sàn-thú-kai tsùaⁿ-kâi-nâng lâi chhì-thóiⁿ Iâ-sou, chhiáⁿ I tshông-tõ thiⁿ lâi kâi ĩ-chiah hiń pun in thóiⁿ. [2] Iâ-sou chiũ tùi-in tap--tàⁿ, Mê-hng-sî, nín chiũ tàⁿ, Thiⁿ-sî chêⁿ--liáu, in-ũi thiⁿ-sek âng. [3] Mn̂g-khí-sî, nín chiũ tàⁿ, Kim-ji̍t thiⁿ-sî m̄-hó, in-ũi thiⁿ-sek ou-âng. Nín pat-tò-jīn thiⁿ-sek; to̍k-to̍k chí-kâi sî-hāu kâi ki-tiãu, nín m̄-pat-tò-jīn. [4] Kan-ak kâi sì-kài khiû ki-tiãu, nā-sĩ Iak-ná kâi ki-tiãu tsṳ-gūa bô ki-tiãu pun in. Iâ-sou lī-khui in, chiũ khṳ̀.

[5,6] Mn̂g-thû kùe-kàu hièⁿ-pôiⁿ m̄-it-tit tsah-piáⁿ. Iâ-sou kāng-in tàⁿ, Tsṳ́-sòi, tie̍h thî-huâng Huap-lĩ-sài nâng kũa Sàn-thú-kai nâng kâi kàⁿ-bó. [7] Mn̂g-thû chiũ jī-ke kàu-niêⁿ--tàⁿ, Iáu-káⁿ sĩ ũi-tie̍h nán m̄-tsai tsah-piáⁿ lâi. [8] Iâ-sou thóiⁿ-tshut in-kâi-ì, chiũ tàⁿ, [8] Nín sié-sìn kâi nâng a, tsò-nî ũi-tie̍h bô-piáⁿ, jī-ke tõ kàu-niêⁿ, né? [9] Nín huân-sĩ būe-mêng, hóⁿ, iā m̄-it-tit, ngõu-kò-piáⁿ pun ngõu-tshoiⁿ-nâng, huân-kèng to̍h-khí kúi-kheng? [10] Iũ chhit-kò-piáⁿ pun sì-tshoiⁿ-nâng, huân-kèng to̍h-khí kúi-nâⁿ, mé? [11] Tsò-nî m̄-tsai uá só kāng-nín tàⁿ--kâi m̄-sĩ ũi-tõ piáⁿ? Zûi--sĩ tie̍h thî-huâng Huap-lĩ-sài nâng Sàn-thú-kai nâng kâi kàⁿ-bó. [12] Mn̂g-thû chiàⁿ siẽⁿ-tshut Iâ-sou só-tàⁿ kâi ì-sṳ̀ m̄-sĩ hàm in thî-huâng piáⁿ--tang kâi kàⁿ-bó, zûi--sĩ Huap-lĩ-sài kũa Sàn-thú-kai kâi kà-tãu.

[13] Iâ-sou lâi-kàu Kai-sat-lĩ-a Hui-li̍p-pí kâi tī-mīn chiũ mn̄g I kâi mn̂g-thû, tàⁿ, Nâng tàⁿ Jîn-tsṳ́ sĩ tî-tîang? [14] Mn̂g-thû ìn--tàⁿ, Ũ nâng tàⁿ sĩ Si-sói Iak-hân; ũ nâng tàⁿ sĩ Íⁿ-lĩ-a: iā ũ pa̍t-nâng tàⁿ, sĩ Iâ-lĩ-mí, ho̍k-sĩ soiⁿ-tsai-nâng--tang che̍k-nâng. [15] Iâ-sou tàⁿ, Nā-sĩ nín tàⁿ uá sĩ tî-tîang, né? [16] Si-mn̂g Pí-tit chiũ ìn--tàⁿ, Lṳ́ sĩ Ki-tok, ióng-seⁿ Siãng-tì kâi Kiáⁿ. [17] Iâ-sou tûi-i ìn--tàⁿ, Si-mn̂g Pa Iak-ná, lṳ́ ũ hok: uân-khî chí-kâi-sṳ̄, m̄-sĩ ũ-hueh-khì--kâi kāng-lṳ́ hién-mêng, chiũ-sĩ uá thiⁿ--chiēⁿ kâi Pẽ. [18] Uá iũ kāng-lṳ́ tàⁿ, Lṳ́ sĩ Pí-tit, tõ chí-kâi chie̍h-pûaⁿ-téng uá àiⁿ tshàng-kiẽn uá-kâi siàⁿ-hũe, im-hú kâi kuan-kháu put-lêng sèng chí-kâi. [19] Uá àiⁿ chiang thien-kok kâi só-sî hù-pun lṳ́: huâm lṳ́ tõ-tī só-pa̍k--kâi tõ-thiⁿ iā pit-sĩ pa̍k chí-kâi: lṳ́ tõ-tī só sek-pàng--kâi tõ-thiⁿ iā pit-sĩ sek-pàng chí-kâi. [20] Hṳ́-sî Iâ-sou kìm-kài mn̂g-thû tshuân mài kāng-nâng tàⁿ I sĩ Ki-tok.

[21] Tshông hṳ́-kâi sî-hāu Iâ-sou chiàⁿ hién-jiên chí-sī I kâi mn̂g-thû, tàⁿ I ka-kī tie̍h-khṳ̀ Iâ-lũ-sat-léng, siũ-kùe chiáng-láu, chì-si, chèng-thâu-nâng, kũa tha̍k-tsṳ-nâng, tsōi-tsōi hũa-hāi, siãng-chhiáⁿ pĩ-suah, tõiⁿ-saⁿ-ji̍t chiũ ho̍k-ua̍h. [22] Pí-tit khan I, chiũ khui-tshùi kàn--tàⁿ, Tsú a, nguãn lṳ́ mién chièⁿ-seⁿ: chí-kâi-sṳ̄ tsong-kú mài kàu-ki̍p--tie̍h lṳ́. [23] Iâ-sou hui-tńg-sin tùi Pí-tit tàⁿ, Sat-tãn, lṳ́ tie̍h-thò tõ uá-ãu: lṳ́ sĩ tsó-gāi uá: in-ũi lṳ́-kâi-sim só-hiàng, m̄-sĩ tshông-tõ Siãng-tì, zûi-sĩ tshông-tõ nâng. [24] Iâ-sou chiũ tùi chèng-mn̂g-thû tàⁿ, Huâm sĩ-mih-nâng àiⁿ-kṳn-tshông uâ-ãu, chiũ tie̍h siá-tiāu ka-kī, taⁿ i-kâi tsa̍p--jī kè lâi-tshông uá. [25] Tãi-huãm àiⁿ-kiù i-kâi sèⁿ-miāⁿ kâi nâng chiũ sàng-sit i-kâi sèⁿ-miāⁿ: ũi-tie̍h uá kâi uân-kù sàng-sit i-kâi sèⁿ-miāⁿ kâi, chiũ tit--tie̍h sèⁿ-miāⁿ. [26] Nâng jia̍k-sĩ tit--tie̍h múaⁿ-sì-kài kâi lĩ, liáu sit sèⁿ-miāⁿ, ũ sĩ-mih iah, né? nâng hó chiang tî-kâi lâi uāⁿ sèⁿ-miāⁿ? [27] In-ũi Jîn-tsṳ́ chiang-àiⁿ ēng I kâi Pẽ kâi iông-kuang, kũa I chèng-thien-sài tsò-pû kàu; hṳ́-sî chiũ àiⁿ chiè kak-nâng só-kiâⁿ--kâi lâi pò-èng. [28] Uá khak-si̍t kāng-nín tàⁿ, Tõ-chí-kò khiã kâi nâng khî-tang ũ nâng būe-chêng chhì--tie̍h sí kâi khì-bī, pit-tiāⁿ soiⁿ thóiⁿ-kìⁿ Jîn-tsṳ́ tõ I kâi kok kàu--lâi.

17

Kùe ke la̍k-ji̍t Iâ-sou tùa Pí-tit, Iá-kok, kua Iá-kok kâi hiaⁿ-tĩ Iak-hân, tsò-pû peh-chiẽⁿ kûiⁿ-suaⁿ, bô pa̍t-nâng: [2] Iâ-sou tng in mīn-tsôiⁿ pièn-hùe: I kâi mīn kuang-iãu zû ji̍t, I kâi i-ho̍k pe̍h-pe̍h kuang-iàng. [3] Iáu Mô-si kũa Íⁿ-lĩ-a hién-hīn tõ tsùaⁿ-kâi-nâng ma̍k-tsôiⁿ kāng Iâ-sou tàⁿ-ūe. [4] Pí-tit chiũ tùi Iâ-sou tàⁿ, Tsú a, nán tõ-chí-kò hó-tsãi: lṳ́ iā-sĩ nguãn, uá tõ-chí-kò lâi-tah saⁿ-koiⁿ-liâu: che̍k-koiⁿ ũi-tie̍h lṳ́, che̍k-koiⁿ ũi-tie̍h Mô-si, che̍k-koiⁿ ũi-tie̍h Íⁿ-lĩ-a. [5] I huân tõ-tàⁿ chí-kâi-ūe, hut-jiên ũ kng-kng kâi hûn lâi-chia in; tshông hûn-tói ũ siaⁿ, tàⁿ, Chí-kâi sĩ uá-kâi Aì-tsṳ́, uá só huaⁿ-hí--kâi, nín tie̍h-thiaⁿ I. [6] Mn̂g-thû thiaⁿ-kìⁿ chiũ phak-lo̍h-tī, tūa-ē kiaⁿ-kũ. [7] Iâ-sou kiâⁿ-bûa, chhiú tah in, chiũ tàⁿ, Khí--lâi, mài kiaⁿ-kũ. [8] Mn̂g-thû kṳ́ ma̍k, tshuân bô thóiⁿ-kìⁿ nâng, zûi-to̍k Iâ-sou tiāⁿ-tiāⁿ.

[9] Chì-kàu lo̍h-suaⁿ kâi sî-hāu Iâ-sou mẽng--in chiũ tàⁿ, Jîn-tsṳ́ būe-ũ tshông-sí ho̍k-ua̍h, nín só-thóiⁿ--kìⁿ-kâi nín mài kāng-nâng tàⁿ. [10] I kâi mn̂g-thû mn̄g I, tàⁿ, Chièⁿ-seⁿ tha̍k tsṳ-nâng tàⁿ Íⁿ-lĩ-a pit-tie̍h soiⁿ lâi, sĩ tsò-nî, né? [11] Iâ-sou ìn--tàⁿ, Íⁿ-lĩ-a pit-jiên soiⁿ lâi, lâi-heng-ho̍k che̍k-chhiet kâi sṳ̄: tãn-sĩ uá kāng-nín tàⁿ, [12] Ín-lĩ-a íⁿ-keng kàu--liáu, nâng m̄-pat i, jĩm-ì khuán-thãi i. Jîn-tsṳ́ chiang-àiⁿ siũ nâng hũa-hāi iā-sĩ chièⁿ-seⁿ. [13] Mn̂g-thû chiàⁿ siẽⁿ-tshut Iâ-sou só kāng-in tàⁿ--kâi sĩ chí Si-sói Iak-hân.

[14] Íⁿ-keng kàu chí-chèng-nâng--kò ũ che̍k-kâi-nâng chiũ-kṳ̃n Iâ-sou, kũi I, chiũ tàⁿ, Tsú a, liên-mién uá-kâi-kiáⁿ, i sĩ tie̍h-iêⁿ-tshái, kan-khóu-tsãi: [15] ē-ē pua̍h-lo̍h-húe, iũ ē-ē pua̍h-lo̍h-tsúi. [16] Uá tùa i chiũ lṳ́-kâi mn̂g-thû, nā-sĩ in put-lêng ui i. [17] Iâ-sou ìn--tàⁿ, Aī--a, m̄-sìn kũa pũe-nge̍k kâi sì-tō, uá kāng-nín tâng-tõ tie̍h kàu jie̍h-kú? uá iông-jím nín tie̍h kàu jie̍h-kú? tùa hṳ́-kâi-kiáⁿ lâi uá-chí-kò. [18] Iâ-sou tuah hṳ́-kâi-kúi; kúi lī-khui hṳ́-kâi-kiáⁿ, tshut--lâi: tsṳ̃ hṳ́-sî chiũ tshuân-zú. [19] Aũ--liáu mn̂g-thû sai-ẽ bûa--khṳ̀ kìⁿ Iâ-sou, chiũ mn̄g--tàⁿ, Uń bõi-tit to̍k i tshu sĩ tsò-nî? [20] Iâ-sou tùi-in tàⁿ, Uân-khî nín-kâi-sìn sĩ sòi: uá khak-si̍t kāng-nín tàⁿ, Nín jia̍k-sĩ ũ sìn chhin-chhiẽⁿ che̍k-lia̍p kài-lua̍h-chí, chiũ-sĩ mẽng chí-kâi suaⁿ, Lī-khui chí-kò súa-pàng hṳ́-kò, iā pit-tiāⁿ súa--khṳ̀; siãng-chhiáⁿ nín bô só-put-lêng kâi sṳ̄. [22] Khiã-khí tõ Ka-lĩ-lĩ kâi sî-hāu Iâ-sou tùi mn̂g-thû tàⁿ, Jîn-tsṳ́ chiang-àiⁿ pĩ-kòi tõ nâng kâi chhiú; [23] nâng chiũ àiⁿ-suah I, tõiⁿ-saⁿ-ji̍t I chiũ àiⁿ ho̍k-ua̍h. Mn̂g-thû chiũ tūa-ē huân-ló.

[24] Lâi-kàu Ka-pek-lông siũ sì-chîⁿ-ngṳ̂n teng-sùe kâi nâng lâi-mn̄g Pí-tit, tàⁿ, Nín-kâi sin-seⁿ ũ su-na̍p teng-sùe, mé? Iǹ--tàⁿ, Ũ. [25] Pí-tit ji̍p tshù-lãi, Iâ-sou soiⁿ tùi-i mn̄g--tàⁿ, Si-mn̂g a, lṳ́ tsò-nî siẽⁿ? Sì--chiēⁿ tsùaⁿ-kâi-uâng sĩ tùi tî-tiâng siu hiàng-sùe, ho̍k-sĩ teng-sùe, né? sĩ tùi ka-kī kâi tsṳ́-mîn, a-sĩ tùi gūa-nâng, héⁿ? Pí-tit ìn--tàⁿ, Tùi gūa-nâng. [26] Iâ-sou chiũ kāng-i tàⁿ, Chièⁿ-seⁿ tsṳ́-mîn chiũ mín--liáu. [27] Tãn-sĩ khióng-ùi nán tì-sái-kàu in iàm-khì nán, lṳ́ khṳ̀ hái--kò sûi tièⁿ-kau, khie̍h soiⁿ khí--lâi kâi hṳ̂; peh-khui i-kâi-tshùi, tit--tie̍h sì-chîⁿ-ngṳ̂n; hó-khie̍h chí-kâi kāng-uá kũa lṳ́ na̍p-hôiⁿ in.

18

Tng hṳ́-che̍k-sî mn̂g-thû chiũ-kṳ̃n Iâ-sou, mn̄g--tàⁿ, Tõ thien-kok sĩ tî-tiâng tsò tūa, né? [2] Iâ-sou hàm che̍k-kâi hâi-jî lâi, sái i khiã tõ in tsùaⁿ-nâng--tang, chiũ tàⁿ, [3] Uá khak-si̍t kāng-nín tàⁿ, nín jia̍k-sĩ m̃-huán-hùe tsò-kàu chhin-chhiẽⁿ hâi-jî che̍k-iēⁿ, chiũ tuàn put-tit ji̍p thien-kok. [4] Kù-tshṳ́ put-lũn tî-tiâng tsṳ̃-khiam chhin-chhiẽⁿ chí-kâi hâi-jî, chí-kâi-nâng chiũ tõ thien-kok sĩ tūa. [5] Iā put-lũn sĩ-mih-nâng in-ũi uá-kâi-miâⁿ chiap-na̍p che̍k-kâi chièⁿ-seⁿ kâi hâi-jî, chiet-sĩ chiap-na̍p uá: [6] jia̍k iā-sĩ ũ nâng hām-hāi chí-kâi sìn-uá--tang kâi mûi-sòi che̍k-nâng tõ tsũe, hṳ́-kâi-nâng lêng-tsò hó pĩ tūa chie̍h-bō tiàu--pàng ãm tîm-lo̍h chhim-hái--khṳ̀, i chiũ ũ hēng. [7] Chí-kâi sì-kài in-ũi hām-hāi nâng tõ tsũe kâi sṳ̄ ũ hũa! in-ũi pit-tiāⁿ ũ chièⁿ-seⁿ kâi in-tuan lâi; tãn-sĩ chí-kâi in-tuan tshông hṳ́-kâi-nâng lâi, i chiũ ũ hũa. [8] Tháng-jia̍k lṳ́ chiah-chhiú, ho̍k-sĩ chiah-kha, sái lṳ́ hām-lo̍h tsũe, chiũ tie̍h tok-tñg khṳ̀-tiāu: lṳ́ lêng-tsò to̍k-kha to̍k-chhiú ji̍p tõ seⁿ-ua̍h, mài tì-kàu lṳ́ ũ sang-chhiú sang-kha ka̍k--lo̍h ióng-kú kâi húe. [9] Jia̍k-sĩ lṳ́ chiah-ma̍k sái lṳ́ hām-lo̍h ióng-kú kâi húe. Jia̍k-sĩ lṳ́ chiah-ma̍k sái lṳ́ hām-lo̍h tsũe, chiũ tie̍h liú--tshut-lâi ka̍k-tiāu: lṳ́ lêng-tsò tuaⁿ-chiah-ma̍k ji|p seⁿ-ua̍h, mài tì-kàu ũ sang-ma̍k ka̍k-lo̍h húe kâi tī-ge̍k.

[10] Tie̍h sié-sim mài thóiⁿ-khin chí-kâi mûi-sòi--tang che̍k-nâng, in-ũi uá kāng-nín tàⁿ, in-kâi thien-sài tõ thiⁿ--kò sî-siêⁿ kìⁿ uá thiⁿ--chiēⁿ Pẽ kâi mīn. [12] Nín tsò-nî siẽⁿ, né? Phì-zû nâng ũ peh-chiah-iêⁿ, khî-tang ũ che̍k-chiah mî-sit--khṳ̀, i khá-m̃ chhiáⁿ pàng-tiāu hṳ́ káu-tsa̍p-káu chiah, khṳ̀ suaⁿ--kò tshūe hṳ́-che̍k-chiah mî-sit--kâi, né? [13] Zû-jia̍k iā-sĩ tshūe--tie̍h, uá khak-sit kāng-nín tàⁿ, ũi--tie̍h chí-che̍k-chiah, pí-hṳ́ káu-tsa̍p-káu chiah bô-mî-sit--kâi, kèng-tūa-ē huaⁿ-hí. [14] Chièⁿ-seⁿ nín thiⁿ--chiēⁿ kâi Pẽ kâi chí-ì iā m̄-nguãn chí-kâi mûi-sòi--tang ũ che̍k-kâi sàng-buâng.

[15] Tháng-jia̍k lṳ́-kâi hiaⁿ-tĩ tit-tsõ--tie̍h lṳ́, chiũ tie̍h-khṳ̀, tuaⁿ-tuaⁿ nín nõ-nâng tsò-pû tõ--kò, kāng-i chí-mêng i-kâi m̄-tie̍h: i zû-jia̍k thiaⁿ-lṳ́, lṳ́ chiũ-sĩ ũ-kiù--tie̍h lṳ́-kâi hiaⁿ-tĩ. [16] I jia̍k-sĩ m̄-thiaⁿ, chiũ tie̍h-chhiáⁿ ke che̍k-nõ-nâng kāng-lṳ́ tsò-pû-khṳ̀, sái kak-kù-ūe pêng nõ-saⁿ-nâng kâi tshùi chèng-kṳ̃ tiāⁿ-tie̍h. [17] I jia̍k iā-sĩ m̄-khéng thiaⁿ in, chiũ tie̍h-kàu-tsai kong-hũe. Iũ-tsài m̄-khéng-thiaⁿ kong-hũe, chiũ hó thóiⁿ i tsò ĩ-pang-nâng kũa sùe-lī che̍k-iēⁿ.

[18] Uá khak-sit kāng-nín tàⁿ, Nín tõ tī put-lũn só sok-pa̍k--kâi, tõ thiⁿ iā sĩ sok-pa̍k: nín tõ-tī put-lũn só sek-pàng kâi, tõ thiⁿ iā-sĩ sek-pàng. [19] Uá iũ kāng-nín tàⁿ, Tháng-jia̍k nín--tang ũ nõ-nâng tõ-tī--chiēⁿ tâng-sim, lũn-ki̍p àiⁿ-khiû sĩ-mih-sṳ̄, uá thiⁿ--chiēⁿ kâi Pẽ pit-tiāⁿ kāng-in sêng-chiũ. [20] In-ũi put-lũn tî-kò ũ nõ-saⁿ-nâng ũi-tie̍h uá-kâi-miâⁿ tsũ-chip, uá pit-tiāⁿ tõ--hṳ́-kò tõ khî-tang.

[21] Hṳ́-sî Pí-tit kiâⁿ-bũa--lâi, chiũ tùi I tàⁿ, Tsú a, uá-kâi hiaⁿ-tĩ tit-tsũe uá, uá sià i tie̍h-kàu jie̍h-tsōi-tshṳ̀? Kàu chhit-tshṳ̀, hó--mé? [22] Iâ-sou ìn--i tàⁿ, Uá m̄-sĩ kāng-lṳ́ tàⁿ kàu chhit-tshṳ̀; sĩ kàu chhit-kâi chhit-tsa̍p.

[23] Kù-tshṳ́ thien-kok phì-zû tsò che̍k-kâi kun-uâng, àiⁿ kāng i-kâi chhîn-po̍k sǹg-siàu. [24] Che̍k-ē khí-sǹg kâi sî-hāu, chiũ tùa che̍k-nˆn̄g lâi, sĩ khiàm-ngṳ̂n tshoiⁿ-buān-niéⁿ--kâi. [25] Íⁿ-keng bô-hó-hôiⁿ--liáu, tsú chiũ mẽng bōi i-kâi-sin, kũa i-kâi chhi-tsṳ́, kũa i che̍k-khài só-ũ--kâi lâi-siêⁿ-hôiⁿ. [26] In-tshṳ́ hṳ́ kâi-po̍k ho̍k-tī kũi-pài, tàⁿ, Tsú a, chhiáⁿ-khuan uá, uá pit-àiⁿ chheng-hôiⁿ lṳ́.

[27] Hṳ́-kâi po̍k kâi tsú, sim liên-mién chiũ sek-pàng i, kũa sià-mién i-kâi-chè. [28] Nā-sĩ hṳ́-kâi-po̍k che̍k-tshut--khṳ̀, ngõ--tie̍h che̍k-kâi tâng liâu khiàm i tsa̍p-niéⁿ-ngṳ̂n: chiũ lia̍h i, liū i-kâi-âu, chiũ tàⁿ, Lṳ́ só-khiàm--kâi chiũ tie̍h-hôiⁿ. [29] In-tshṳ́ tâng-liâu ho̍k-tī khiû i, chiũ tàⁿ, Chhiáⁿ-khuan uá, uá pit-àiⁿ-hôiⁿ lṳ́. [30] I m̄-khéng: huán khṳ̀ ah i lo̍h-kam, thãi i só-khiàm--kâi hôiⁿ-chheng. [31] Tsùaⁿ-kâi tâng-liâu thóiⁿ-kìⁿ i só-tsò kâi sṳ̄ chiũ huân-ló-tsãi, chiang só-tsò kâi sṳ̄-chhêng che̍k-khài khṳ̀ kàu-tsai in-kâi-tsú. [32] Chí-kâi-po̍k kâi tsú chiũ tiãu i lâi, tùi-i tàⁿ, Ak kâi po̍k a, Lṳ́ só-khiàm uá hṳ́-kâi-chè, lṳ́ che̍k-ē khiû uá, uá chiũ lóng-tsóng sià-mién lṳ́. [33] Lṳ́ khá-m̄-sĩ tie̍h ũ liên-mién lṳ́-kâi tâng-liâu, che̍k-zû uá liên-mién lṳ́, né? [34] I kâi tsú chiũ huat-náu, kau i tõ ge̍k-lī, thãi-kàu i só-khiàm--kâi hôiⁿ-chheng. [35] Zû-jia̍k nín kak-nâng m̃ sim nguãn sià-mién nín-kâi hiaⁿ-tĩ, chiũ uá-kâi thien-Pẽ khuán-thãi nín, iā pit-tiāⁿ sĩ chièⁿ-seⁿ.

19

Iâ-sou tàⁿ chí-kâi-ūe liáu, chiũ lī-khui Ka-lĩ-lĩ, lâi-kàu Iak-tãn hô gūa-pôiⁿ Iû-thài kâi tī-kài; [2] tsōi-tsōi nâng chiâⁿ-khûn chiâⁿ-khûn kṳn-tùe I; Iâ-sou tõ-hṳ́-kò chiũ kāng-in ui-tî.

[3] Ũ Huap-lĩ-sài nâng lâi, chhì-thàm Iâ-sou, chiũ mn̄g I, tàⁿ, Bô-lũn sĩ-mih uân-kù hiuⁿ-tiāu chhi sĩ ha̍h-ngî, mé? [4] Iâ-sou ìn--tàⁿ, Nín khá-sĩ būe-chêng tha̍k--tie̍h, nguân-tsho tsāu--in Kâi sĩ tsãu in tsò nâm kũa nńg, iũ ũ tàⁿ, [5] In-tshṳ́ nâng tie̍h lī-khui i-kˆī pẽ-bó lâi ka-tshat i-kâi-chhi, nõ-nâng sêng-tsò che̍k-thói. [6] Chièⁿ-seⁿ in m̄-sĩ huân-liáu tsò-nõ, chiũ sĩ che̍k-thói--liáu. Kù-tshṳ́ Siãng-tì só phùe-ha̍h-bûa--kâi, nâng m̄-hó pun-khui.

[7] In--nâng chiũ tùi I tàⁿ, Chièⁿ-seⁿ Mô-si tsò-nî mẽng--tàⁿ, tie̍h hù-pun lî-tsṳ lâi-hiuⁿ chhi? [8] Iâ-sou tùi-in tàⁿ, Mô-si sĩ in-ũi nín-kâi-sim ngẽⁿ, chiũ iông nín hiuⁿ nín-kâi-chhi: tãn-sĩ tshông-tõ nguân-tsho m̄-sĩ chièⁿ-seⁿ. [9] Uá iũ kāng-nín tàⁿ, Huâm sĩ-mih-nâng, m̄-sĩ ũi-tie̍h îm-luãn chiũ hiuⁿ-chhi tshūa pa̍t-nâng, chiũ-sĩ ũ îm-hẽng; iā ũ-tshūa só-tshut kâi-chhi kâi, chí-kâi-nâng iā sĩ îm-hẽng.

[10] Tsùaⁿ-kâi mn̂g-thû tùi Iâ-sou tàⁿ, Nâng kāng i-kâi-kchhi kâi tõ-lí jia̍k-sĩ chièⁿ-seⁿ, put-zû mài-tshūa. [11] Iâ-sou tùi-in tàⁿ, Nâng būe-sĩ lóng-tsóng lêng-thiaⁿ chí-kâi-ūe, zûi-to̍k sĩ ũ-tit--tie̍h sṳ̀--kâi-nâng chiàⁿ-õi. [12] In-ũi ũ nâng tshông-tõ bó-tho tshut-sì chiũ tsò iam-jîn: iā ũ pĩ-nâng iam--kâi chiũ tsò iam-jîn: iā ũ nâng ũi--tie̍h thien-kok tsṳ̃-iam--kâi chiũ tsò iam-jîn. Oĩ niáⁿ-siũ kâi nâng chiũ hó niáⁿ-siũ.

[13] Hṳ́-kâi sî-hāu ũ nâng tùa hâi-jî lâi-chiũ Iâ-sou, àiⁿ I àn-chhiú tõ in--kò khî-táu: tsùaⁿ-kâi mn̂g-thú cheh-hiâm in. [14] Nā-sĩ Iâ-sou chiũ tàⁿ, Iông hâi-jî lâi-chiũ uá, mài tsó-chí in; in-ũi ũ thien-kok--kâi chiàⁿ-sĩ chièⁿ-seⁿ kâi nâng. [15] Chiũ àn-chhiú tõ-in, liáu chiũ tshông-tõ hṳ́-kò khṳ̀.

[16] Ũ che̍k-kâi-nâng kiâⁿ-bûa--lâi, tùi Iâ-sou tàⁿ, Sin-seⁿ, uá tie̍h-kiâⁿ tî-kâi siẽn-sṳ̄ chiàⁿ õi-tit-tie̍h ióng-seⁿ? [17] Iâ-sou kāng-i tàⁿ, Lṳ́ tsò-nî chiang-siẽn lâi-mn̄g uá? Ũ che̍k-kâi sĩ siẽn: lṳ́ iā-sĩ àiⁿ-ji̍p ióng-seⁿ, chiũ tie̍h-siú tiâu-kài. [18] I mn̄g--tàⁿ, Ũ tî-kâi? Iâ-sou chiũ tàⁿ, M̄-hó suah-nâng, M̄-hó kiâⁿ-îm, M̄-hó thau-tãu, M̄-hó zuãn-chèng-kṳ̃, [19] Tie̍h hàu-kèng lṳ́-kâi-pẽ kũa lṳ́-kâi-bó, Tie̍h ài-sieh lṳ́-kâi tshù-piⁿ che̍k-zû ka-kī. [20] Hṳ́-kâi siàu-nîⁿ-nâng tùi Iâ-sou tàⁿ, Chí tsùaⁿ-kâi-sṳ̄ uá lóng-tsóng siú: huân-liáu khiàm tî-kâi? [21] Iâ-sou kāng-i tàⁿ, Lṳ́ àiⁿ-tsò-kàu sûn-tshuân, tie̍h-khṳ̀, bōi lṳ́ só-ũ--kâi lâi si-chì phîn-khiông, chiũ pit-tiāⁿ ũ tshâi-pó tõ thiⁿ: iũ tie̍h lâi tùe-tshông uá. [22] Hṳ́-kâi siàu-nîⁿ-nâng thiaⁿ-kìⁿ chí-kâi-ūe tshôu-tshôu chiũ khṳ̀: in-ũi i sĩ ke-tsṳ pù-kãu kâi nâng.

[23] Iâ-sou chiũ tùi I kâi mn̂g-thû tàⁿ, Uá khak-si̍t kāng-nín tàⁿ, Pù-nâng ji̍p thien-kok sĩ lân. [24] Uá iũ kāng-nín tàⁿ, Lo̍h-tho̍h tshuan-kùe tsam-khang, pí pù-nâng ji̍p Siãng-tì kok, zú-kèng kōi. [25] Mn̂g-thû thiaⁿ-kìⁿ chí-kâi-ūe, tūa-ē khî-ĩ, chiũ tàⁿ, Hiá, chièⁿ-seⁿ tî-tiâng tit--tie̍h kiù, né? [26] Iâ-sou ma̍k thóiⁿ tùi in--kò khṳ̀, chiũ kāng-in tàⁿ, Tõ nâng chí-kâi-sṳ̄ sĩ put-lêng; nā-sĩ tõ Siãng-tì buān-sṳ̄ tou lêng.

[27] Pí-tit chiũ tùi Iâ-sou ìn--tàⁿ, Uń íⁿ-keng siá-tiāu che̍k-chhiet lâi tùe-tshông lṳ́; ún chiang-lâi ũ tit-tie̍h tî-kâi, né? [28] Iâ-sou chiũ kāng-in tàⁿ, Uá khak-si̍t kāng-nín tàⁿ, nín ũ tùe-tshông uá kâi, thãi-kàu tsài-seⁿ-tsãu kâi sî-hāu, Jîn-tsṳ́ tsõ tõ I iông-kuang kâi ūi, nín iā chiang-àiⁿ tsõ tõ tsa̍p-jī-ūi, sím-phuàn Íⁿ-sek-lie̍t tsa̍p-jī chiⁿ-phài. [29] Iā put-lũn tî-tiâng ũi-tie̍h uá-kâi-miâⁿ ũ lī-khui tshù-the̍h, ho̍k-sĩ tshân-hn̂g, chiang-lâi pit-tiāⁿ siũ peh-pũe, iũ tit--tie̍h ióng-seⁿ kâi ngia̍p. [30] Ũ ke-ke soiⁿ--kâi-nâng chiang-ài tsò búe-ãu, ke-ke búe-ãu--kâi-nâng chiang-àiⁿ tsò soiⁿ.

20

[STOP pg. 38]

Má-khó Hok-im-tsṳ.

1

Siãng-tì kâi Kiáⁿ, Iâ-sou Ki-tok, I hok-im kâi khí-tsho [2] Chiè soiⁿ-tsai Íⁿ-sài-a só kì-tsài,

Uá sái uá-kâi sài-chiá tõ lṳ́ mīn-tsôiⁿ,

Lâi ṳ̃-pĩ lṳ́-kâi-lōu;

[3] Khuàng-iá--kò ũ nâng-siaⁿ u-hàm tàⁿ,

Tie̍h siu Tsú kâi tãu-lōu,

Phah-tit I kâi lōu-kèⁿ;

[4] Iak-hân lâi, tõ khuàng-iá si-sói iũ thuân hùe-sim kâi sói-lói, sái tsũe tit-sià. [5] Iû-thài tshuân-tī, kũa Iâ-lũ-sat-léng kâi chèng-nâng, lóng-tsóng tshut--khṳ̀ chiũ i; jīn ka-kī kâi tsũe, tõ Iak-hân kâi chhiú--thâu siũ-sói tõ Iak-tãn hô.

[6] Iak-hân sĩ chhēng lo̍h-tho̍h mô, ēng phûe-tùa hâ-ie, chia̍h huâng-thâng kũa iá-bi̍t. [7] I thuân tàⁿ, Ũ che̍k-kâi tõ uá-āu--kò lâi, lêng-la̍t tūa--kùe uá, uá khut-sin lâi kāng I kói ôi-tùa sĩ m̄-kham. [8] Uá chêng chiang-tsúi kāng nín si-sói; nā-sĩ I àiⁿ chiang Siàⁿ-sîn kāng-nín si-sói.

[9] Tõ hṳ́ sù-jit--kan, tú-ngõ Iâ-sou tshông-tõ Ka-lĩ-lĩ kâi Ná-sat-le̍k lâi, tõ Iak-hân kâi chhiú--thâu siũ-sói tõ Iak-tãn hô. [10] Sûi-chiet tshông-tsúi khí--lâi, chiũ thóiⁿ-kìⁿ thiⁿ phùa-khui, kũa Siàⁿ-sîn chhin-chhiẽⁿ hún-chiáu kàng-lo̍h tõ I sin-chiēⁿ: [11] iũ ũ siaⁿ tshông-tõ thiⁿ tshut, Lṳ́ sĩ uá-kâi Aì-tsṳ́, uá ũi-lṳ́ hí-zua̍t.

[12] Siàⁿ-sîn sûi-chiet kúaⁿ I tshut--khṳ̀ khuàng-iá. [13] I tõ khuàng-iá sì-tsa̍p-ji̍t siũ Sat-tãn kâi iú-ho̍k; kāng iá-siù tsò-pû; chèng thien-sài ho̍k-sṳ̃ I.

[14] Iak-hân siu-kìm tsṳ-ãu, Iâ-sou lâi tõ Ka-lĩ-lĩ, thuân Siãng-tì kâi hok-im, chiũ tàⁿ, [15] Ji̍t-khî múaⁿ--liáu, Siãng-tì kok kṳ̃n--liáu: nín tie̍h hùe-sim, iũ sìn hok-im.

[16] Tùi Ka-lĩ-lĩ hái-kîⁿ keng-kùe, thóiⁿ-kìⁿ Si-mn̂g, kũa Si-mn̂g kâi hiaⁿ-tĩ An-tit-lie̍t, pha-mãng tõ hái: in-ũi in sĩ lia̍h-hŵ kâi nâng. Iâ-sou chiũ tùi-in tàⁿ, Nín lâi-tùe tõ uá-ãu, uá chiũ sái nín tsò tit-nâng kâi nâng, zû tit-hŵ che̍k-iēⁿ. [18] In sûi-chiet chiũ siá-khui hiàⁿ-kâi-mãng, lâi tshông Iâ-sou.

[19] Iâ-sou kiâⁿ chìn-tsôiⁿ se-su, iũ thóiⁿ-kìⁿ Si-pí-thài kâi kiáⁿ Iá-kok, kũa i-kâi hiaⁿ-tĩ Iak-hân, in iā sĩ tõ tsûn--kò tõ póu-mãng. [20] Iâ-sou sûi-chiet chiũ kiè in: in chiũ siá-khui in-kâi-pẽ Si-pí-thài kāng iông-kang kâi nâng tsò-pû tõ-tsûn, khṳ̀ tùe tõ Iâ-sou ãu.

[21] In sù-nâng ji̍p Ka-pek-lông; Iâ-sou sûi-chiet tõ an-sek-ji̍t ji̍p hũe-tn̂g chiũ kà-hùe. [22] Chèng-nâng thiaⁿ I kâi kà-hùe chiũ khî-ĩ: in-ũi Iâ-sou kà-hùe in sĩ chhin-chhiẽⁿ ũ-khuân, m̄ chhin-chhiẽⁿ hiàⁿ-kâi tha̍k-tsṳ-nâng.

[23] Tõ in-kâi hũe-tn̂g sûi-chiet ũ kâi nâng, ũ siâ-sîn tshâng tõ i-sin; [24] i hàm--tàⁿ, Ná-sat-le̍k kâi Iâ-sou, ún kāng-lṳ́ sĩ-mih kan-sia̍p? lṳ́ sĩ lâi tu-mit ún, mé? uá tsai lṳ́ sĩ tî-tiâng, sĩ Siãng-tì kâi Siàⁿ-chiá. [25] Iâ-sou cheh i, tàⁿ, Lṳ́ tiām-tiām, tie̍h lī-khui i tshut--lâi. [26] Hṳ́-kâi siâ-sîn sái hṳ́-kâi-nâng thiu-thek, iáu tūa-siaⁿ háu-hàm, chiũ lī-khui i tshut--lâi.

[27] Chèng-nâng hāi-ĩ, tì-kàu jī-ke mn̄g--tàⁿ, Kâi sĩ tsò-nî? sĩ sin-kà--liáu! I ēng-khuân mẽng siâ-sîn, siâ-sîn iā thiaⁿ-tshông I. [26] Iâ-sou kâi miâⁿ-siaⁿ sûi-chiet thuân-pùa pìn Ka-lĩ-lĩ sì-hng.

[29] Kàu tshut hũe-tn̂g liáu, chiũ sûi-chiet kũa Iá-kok Iak-hân, ji̍p Si-mn̂g kũa An-tit-lie̍t kâi tshù-lãi. [30] Si-mn̂g kâi tiẽⁿ-ḿ ũ sie-jie̍t-pēⁿ tõ-u̍t; sûi-chiet ũ nâng lâi pò-tsai Iâ-sou: [31] Iâ-sou chiũ bûa--khṳ̀ lĩm i-kâi-chhiú, khan i khí--lâi; sie-jie̍t chiũ thò, hũ-jîn chiũ ho̍k-sṳ̃ in.

[32] Kàu mê-hng, ji̍t lo̍h kâi sî-hāu, ũ tùa tì-pēⁿ kâi nâng, kũa pun kúi só-tùe kâi nâng, lóng-tsóng lâi chiũ Iâ-sou. [33,34] Pìn-siâⁿ lóng-tsóng tsũ-chi̍p tõ mn̂g-tsôiⁿ. Iâ-sou ui-hó ke-ke pēⁿ-nâng sĩ tì kak-iēⁿ-pēⁿ kâi, iũ to̍k-tshut tsōi-tsōi kúi; m̄ tsún hṳ́-kâi-kúi tàⁿ-ūe, in-ũi kúi pat I.

[35] Mùa-mn̂g-khí, thiⁿ huân-liáu ka-lô kng, Iâ-sou chiũ tsáu-khí, tshut--khṳ̀ khuàng-iá kâi tī-hng, tõ-hṳ́-kò khî-táu. [36] Si-mn̂g kũa kāng-i tâng-tõ kâi nâng iā chhîm-tùe I; [37] íⁿ-keng tshūe--tie̍h I, in chiũ kāng I tàⁿ, Chèng-nâng tõ-tshūe lṳ́. [38] Iâ-sou chiũ tùi-in tàⁿ, Nán chhiáⁿ lâi-khṳ̀ pa̍t-kò, ji̍p lîn-kṳ̃n kâi hieⁿ-ip uá tõ-hṳ́-kò iā lâi thuân-tãu; in-ũi uá sĩ ũi-tie̍h chí-kâi-sṳ̄ chiàⁿ tshut--lâi. [39] Iâ-sou chiũ pìn Ka-lĩ-lĩ ji̍p in-kâi hũe-tn̂g, thuân-tãu to̍k-kúi.

[40] Ũ che̍k-kâi-nâng thái-ko bûa--lâi khiû Iâ-sou, kũi I, iũ tùi I tàⁿ, Lṳ́ jia̍k-sĩ khéng, chiũ õi-sái uá chheng-kiet. [41] Iâ-sou kâi sim kám-tõng, chiũ tshun-chhiú àn--i, kāng-i tàⁿ, Uá khéng: lṳ́ hó chheng-kiet. [42] Hṳ́-kâi thái-ko-pēⁿ sûi-chiet chiũ lī-khui hṳ́-kâi-nâng, i chiũ chheng-kiet. [43] Iâ-sou ngiâm-ngiâm kàu-kài i, chiũ sûi-sî sái i tshut--khṳ̀, iũ tùi-i tàⁿ, [44] Lṳ́ tie̍h tsṳ́-sòi mài kāng-nâng tàⁿ: tãn-sĩ tie̍h-khṳ̀, pun chì-si thóiⁿ lṳ́, iā in-ũi lṳ́ tit--tie̍h chheng-kiet chiũ tie̍h-hièn Mô-si só-mẽng kâi lói-mue̍h, tùi chèng-nâng tsò chèng-kṳ̃. [45] Nā-sĩ hṳ́-kâi-nâng tshut--khṳ̀, khui-kháu thuân chí-kâi-sṳ̄ tsōi-tsōi, sì-tshù pùa-ji̍p-siâⁿ--liáu, chiũ-sĩ khiã-khí tõ gūa-kháu, khuàng-iá kâi tī-hng: nâng tshông-tõ sì-hng lâi-chiũ I.

2

Sù-ji̍t ãu Iâ-sou iũ ji̍p Ka-pek-lông, hong-bûn I tõ hṳ́-tshù-lãi. [2] Chiũ ũ tsōi-tsōi-nâng lâi tsũ-chi̍p, tì-kàu tshûn bô khàng-tī, liên-kũa mn̂g-kha iā bô: Iâ-sou chiũ káng-tãu pun in thiaⁿ.

[3] Ũ nâng tùa che̍k-kâi nńg-huang-pēⁿ kâi nâng lâi-chiũ Iâ-sou, sì-kâi-nâng kng i lâi. [4] In-ũi nâng kàu-khûn, bõi-tit kṳ̃n-bûa Iâ-sou, chiũ thiah I só-tõ hṳ́-kâi tshù-téng: íⁿ-keng thiah-khui--liáu, chiũ chiang hṳ́-kâi nńg-huang-pēⁿ u̍t tõ mîn-íⁿ tũi--lo̍h-khṳ̀. [5] Iâ-sou thóiⁿ-kìⁿ in sìn, chiũ tùi nńg-huang kâi pēⁿ-nâng tàⁿ, Nôu a, lṳ́-kâi-tsũe sià-mién--liáu. [6] Tha̍k-tsṳ-nâng ũ sù-nâng tsõ tõ-hṳ́-kò, sim-lãi ngí-lũn, tàⁿ, [7] Chí-kâi-nâng tsò-nî tàⁿ-tshut chièⁿ-seⁿ kâi ūe, né? sĩ chhiàm-buáng: tṳ̂ che̍k-kâi, chiũ-sĩ Siãng-tì, tsṳ-gūa, tî-tiâng õi sià-mién nâng kâi tsũe, né? [8] Iâ-sou sim-sîn sûi-chiet tshat-tsai in tõ sim-tang ũ chièⁿ-seⁿ ngí-lũn, chiũ tùi-in tàⁿ, Nín tsò-nî tõ-sim-tang ngí-lũn chí chiàⁿ-kâi-sṳ̄, né? [9] Ho̍k-sĩ tùi nńg-huang kâi pēⁿ-nâng tàⁿ, Lṳ́-kâi-tsũe sià-mién--liáu; ho̍k-sĩ tàⁿ, Khí--lâi, taⁿ lṳ́-kâi mîn-íⁿ kiâⁿ--khṳ̀, tî-kiãⁿ kōi? [10] Taⁿ, in-ũi àiⁿ-sái nín tsai Jîn-tsṳ́ tõ tī ũ khuân-lêng lâi sià-tsũe (chiũ tùi nńg-huang kâi pēⁿ-nâng tàⁿ), [11] Uá mẽng lṳ́ khí--lâi, taⁿ lṳ́-kâi mîn-íⁿ, tńg--khṳ̀ lṳ́-tshù. [12] Hṳ́-kâi-nâng chiũ khí--lâi, sûi-chiet taⁿ mîn-íⁿ, tng chèng-nâng mīn-tsôiⁿ chiũ tshut--khṳ̀; tì-kàu chèng-nâng lóng-tsóng hãi-ĩ, kui iông-kuang tõ Siãng-tì, tàⁿ, Nán tshông būe-pat thóiⁿ-kìⁿ àn-chièⁿ-seⁿ.

[13] Iâ-sou iũ tùi hái-kîⁿ tshut--khṳ̀; chèng nâng bûa-khṳ̀ chiũ I, Iâ-sou chiũ kà-hùe in. [14] Kiâⁿ tùi hṳ́-kò kùe, thóiⁿ-kìⁿ A-le̍k-hui kâi kiáⁿ Lĩ-mūi, tsõ tõ hiàng-kuan, Iâ-sou kiè i, tàⁿ, Lâi-tùe uá. I chiũ khí-sin tùe I khṳ̀.

[15] Tú-ngõ Iâ-sou tõ i-kâi ke--tang tsõ-sia̍h, ke-ke sùe-lī kũa tsũe-jîn kāng Iâ-sou kũa I kâi mn̂g-thû tsò-pû tsõ--lo̍h-khṳ̀: in-ũi hṳ́-khí-nâng sĩ tsōi, iā ũ tùe-tshông Iâ-sou. [16] Huap-lĩ-sài nâng--tang kâi tha̍k-tsṳ-nâng, che̍k thóiⁿ-kìⁿ Iâ-sou kāng tsũe-jîn kũa sùe-lī tsò-pû chia̍h, chiũ tùi Iâ-sou kâi mn̂g-thû tàⁿ, I sĩ kāng sùe-lī kũa tsũe-jîn tsò-pû ím-chia̍h. [17] Iâ-sou thiaⁿ-kìⁿ, chiũ tùi-in tàⁿ, Khiâng-tsàng kâi nâng mín-ēng--tie̍h ui-seng, chiũ-sĩ tì-pēⁿ kâi nâng chiũ ēng--tie̍h: uá lâi m̄-sĩ àiⁿ-chie ngĩ-jîn, zûi-sĩ àiⁿ-chie tsũe-jîn.

[18] Iak-hân kâi mn̂g-thû kũa Huap-lĩ-sài nâng hṳ́-hûe tõ kìm-chia̍h: in lâi mn̄g Iâ-sou, tàⁿ, Iak-hân kâi mn̂g-thû kũa Huap-lĩ-sài nâng ũ kìm-chia̍h, lṳ́-kâi mn̂g-thû bô kìm-chia̍h, sĩ tsò-nî, né? [19] Iâ-sou tùi-in tàⁿ, Hō-hí kâi nâng ũ sin-nn̂g tsò-pû tõ--kò, khá-hó kìm-chia̍h, né? huân-liáu ũ sin-nn̂g tsò-pû-tõ, chiũ put-lêng kìm-chia̍h. [20] Zûi-sĩ chiang-lâi sin-nn̂g kāng-in kiáng-pie̍t--khṳ̀, kàu hṳ́-ji̍t in pit-tiāⁿ àiⁿ kìm-chia̍h. [21] Tshuân-bô nâng ēng nguân-tsng kâi pòu-tshùi thīⁿ tõ kū-saⁿ: khióng-ùi só-póu kâi hāi--tie̍h hṳ́-kâi-saⁿ, chiũ-sĩ sin hāi--tie̍h kū, li̍h--khṳ̀ zú-tūa. [22] Iā bô nâng tò sin-chiú tõ kū phûe-tō: khióng-ùi chiú li̍h-tiāu phûe-tō, chiú kũa tō chiũ hùi-huãi: zûi-sĩ sin-chiú sĩ tò tõ chhiⁿ kâi phûe-tō.

[23] Tú-ngõ Iâ-sou tõ an-sek-ji̍t tùi be̍h-tshân keng-kùe; I kâi mn̂g-thû tõ-kiâⁿ-lōu chiũ tõ-tiah be̍h-sūi. [24] Huap-lĩ-sài nâng tùi Iâ-sou tàⁿ, In tõ an-sek-ji̍t tsò chí-kâi m̄-ha̍h-ngî kâi sṳ̄, sĩ tsò-nî, né? [25] Iâ-sou tùi-in tàⁿ, Tã-phek kũa sûi-tsõng kâi nâng, khueh-hua̍t tóu khùn hṳ́-sî, só-tsò kâi sṳ̄, nín khá-sĩ m̄-pat-tha̍k, héⁿ? [26] Tng A-pí-a-thap tsò chì-si-chiáng kâi sî-hāu, Tã-phek ji̍p Siãng-tì kâi keng, chia̍h pái-siet kâi piáⁿ, siãng-chhiáⁿ pun sûi-tsõng kâi nâng; tãn-sĩ chí-kâi-piáⁿ, tŵ chì-si tsṳ-gūa, pa̍t-nâng chia̍h, chiũ m̄-ha̍h-ngî. [27] Iâ-sou iũ tàⁿ, Sĩ an-sek-ji̍t ũi-tie̍h nâng, m̄-sĩ nâng ũi-tie̍h an-sek-ji̍t, chiàⁿ-ũ: [28] kù-tshṳ́ Jîn-tsṳ́ iā sĩ an-sek-ji̍t kâi tsú.

3

Iâ-sou iũ ji̍p--khṳ̀ hũe-tn̂g; hṳ́-kò ũ che̍k-nâng chiah-chhiú phien-kou. [2] Chèng-nâng chiũ thàm-thóiⁿ Iâ-sou an-sek-ji̍t ũ ui i--mé; in-ũi àiⁿ-kò I. [3] Iâ-sou tùi chhiú phien-kou kâi nâng tàⁿ, Khiã tõ chí-tang. [4] Chiũ tùi hùaⁿ-nâng mn̄g--tàⁿ, Tõ an-sek-ji̍t kiâⁿ-siẽn, kiâⁿ-ak, kiù-miāⁿ, suah-miāⁿ, tî-kiãⁿ ha̍h-ngî, né? In hùaⁿ-nâng tiām-tiām. [5] Iâ-sou náu-ma̍k thóiⁿ chiu-ûi hùaⁿ-nâng, sĩ khùa-lṳ̃ in-kâi-sim pièn-ngẽⁿ, chiũ tùi hṳ́-kâi-nâng tàⁿ, Tshun-tshut lṳ́-kâi-chhiú. I chiũ tshun--tshut-lâi: i-kâi-chhiú chiũ ho̍k-nguân. [6] Huap-lĩ-sài nâng chiũ tshut--khṳ̀, sûi-sî kũa Hi-lu̍t táng kàu-niêⁿ, mông-hāi Iâ-sou, tsò-nî lâi tu-mit I.

[7] Iâ-sou kũa I kâi mn̂g-thû thò-khui kàu hái-kîⁿ: iā ũ che̍k-tūa-khûn nâng tshông Ka-lĩ-lĩ tùe--khṳ̀: iā ũ nâng tshông-tõ Iû-thài, Iâ-lũ-sat-léng, [8] Íⁿ-thú-mái, Iak-tãn gūa, kũa Thî-lô Si-tũn tsôiⁿ-ãu, thiaⁿ-tsai Iâ-sou só-kiâⁿ kâi tãi-sṳ̄, chiũ sêng tūa-khûn lâi chiũ I. [9] Iâ-sou kāng I kâi mn̂g-thû tàⁿ tie̍h-ũ chiah-tsûn-kiáⁿ tõ hāu-thāi I, ũi-tie̍h mín pĩ chèng-nâng chìⁿ--tie̍h, in-ũi nâng sĩ tsōi: [10] uân-khî Iâ-sou íⁿ-keng ui tsōi-tsōi nâng; tì-kàu huâm ũ pēⁿ-khóu kâi nâng lóng-tsóng pek-kṳ̃n àiⁿ lâi-mông I. [11] Tsùaⁿ-kâi siâ-sîn che̍k kìⁿ--tie̍h Iâ-sou, chiũ phak-lo̍h tõ I mīn-tsôiⁿ, u-hàm tàⁿ, Lṳ́ sĩ Siãng-tì kâi Kiáⁿ. [12] Iâ-sou ngiâm-ngiâm kìm-kài in mài hién-mêng I.

[13] Iâ-sou khí-khṳ̀ suaⁿ--kò, chiè I ka-kī só-àiⁿ chiũ tiãu-nâng: in chiũ khṳ̀-chiũ I. I chiũ siet-li̍p tsa̍p-jī nâng àiⁿ siêⁿ-siêⁿ tõ sin-piⁿ, iũ àiⁿ-sái in tshut--khṳ̀ thuân-tāu, [15,16] tit--tie̍h ũ khuân lâi to̍k-kúi: Iâ-sou chiũ chheng Si-mn̂g tsò Pí-tit; [17] Iũ ũ Si-pí-thài kâi kiáⁿ Iá-kok, kũa Iá-kok kâi tĩ Iak-hân; chí-nõ-nâng Iâ-sou chheng-tsò Pùan-nî-khî, ì-sṳ̀ chiũ-sĩ Lûi-tsṳ́: [18] iũ ũ An-tit-lie̍t, Hui-le̍k, Pa-to-lô-mái, Má-thài, To-má, A-le̍k-hui kâi kiáⁿ Iá-kok, kũa Ta̍t thài, kũa hãu-tsò Zũe kâi Si-mn̂g, [19] kũa bōi Iâ-sou kâi Ka-lia̍k nâng Iû-tã.

[20] Iâ-sou ji̍p kàu tshù-lãi. Chèng-nâng iũ-tsài tsũ-chi̍p, tì-kàu in àiⁿ-chia̍h tou bõi-tit. [21] Iâ-sou kâi chhin-iú thiaⁿ-tsai chí-kâi-sṳ̄ chiũ tshut-khṳ̀ àiⁿ-lâu I: in-ũi tàⁿ, I sĩ khuâng.

[22] Tshông-tõ Iâ-lũ-sat-léng lâi kâi tha̍k-tsṳ-nâng chiũ tàⁿ, I sĩ pĩ Pie̍t-si-phok só-tshâng, iā sĩ tàⁿ, I sĩ kõu kúi-uâng lâi to̍k-kúi.

[23] Iâ-sou hàm in bûa--lâi, chiũ siet phì-zũ kāng-in tàⁿ, Sat-tãn tsò-nî õi to̍k Sat-tãn, né? [24] Zû-jia̍k kok tsṳ̃-siang hun-cheⁿ, hṳ́-kâi kok chiũ put-lêng sêng-lip. [25] Zû-jia̍k ke tsṳ̃-siang hun-cheⁿ, hṳ́-kâi-ke chiang-lâi put-lêng sêng-lip. [26] Tháng-jia̍k Sat-tān khí--lâi kong-khek ka-kī, tsṳ̃-siang hun-cheⁿ, iā chiũ put-lêng sêng-li̍p, pit tì-kàu mua̍t-buâng. [27] Bô nâng õi ji̍p ióng-sṳ̃ kâi tshù-lãi, lâi-kiap i-kâi ke-tsṳ, bũ-pit tie̍h soiⁿ pa̍k chí-kâi ióng-sṳ̃, ãu chiàⁿ kiap i-kâi tshù-lãi. [28] Uá khak-si̍t kāng nín tàⁿ, Chèng-jîn-tsṳ́ che̍k-chhiet só-huãm kâi tsũe, bô lũn húiⁿ-pãng tsò-nî húiⁿ-pãng kâi ūe, lóng-tsóng hó tit-tie̍h sià-mién: [29] nā-sĩ put-lũn tî-tiâng húiⁿ-pãng Siàⁿ-sîn tsong-kú bô hó tit--tie̍h sià-mién, sĩ huãm-tie̍h ióng-tõ kâi tsũe: [30] uân-khî nâng tàⁿ Iâ-sou pĩ siâ-sîn só-tshâng.

[31] Iâ-sou kâi a-bó kũa I kâi hiaⁿ-tĩ lâi; khiā tõ gūa, sái nâng bûa--khṳ̀ hàm I. [32] Ũ che̍k-khûn-nâng ûi Iâ-sou tõ-tsõ; ũ nâng kāng Iâ-sou tàⁿ, Lṳ́-kâi a-bó kũa lṳ́-kâi hiaⁿ-tĩ tõ gūa-kháu lâi-tshūe lṳ́. [33] Iâ-sou tùi-in tap-tàⁿ, Tî-tiâng sĩ uá-kâi-bó, uá-kâi hiaⁿ-tĩ, né? [34] Sì-ûi thóiⁿ ûi-tsõ kâi chèng-nâng, chiũ tàⁿ, Nín thóiⁿ uá-kâi-bó kũa uá-kâi hiaⁿ-tĩ! [35] Uân-in put-lũn tî-tiâng tsun-kiâⁿ Siãng-tì kâi chí-ì, chiũ-sĩ uá-kâi hiaⁿ-tĩ, chí-mūe, kũa a-bó.

4

Iâ-sou iũ tõ hái-kîⁿ khui-kháu kà-hùe. Ũ che̍k-khûn nâng chì-tsōi, tsũ-chi̍p bûa--khṳ̀, tì-kàu Iâ-sou chiẽⁿ-tsûn, tsõ tõ hái--kò; che̍k-khûn chèng-nâng khùa-kṳ̃n hái, khiã tõ le̍k-tī. [2] Iâ-sou siet phì-zũ kà in ke-ke-sṳ̄, tõ kà-hùe kâi sî-hāu kāng-in tàⁿ, [3] Nín tie̍h thiaⁿ: Ũ iā-chéng kâi nâng tshut--khṳ̀ iā-chéng: [4] tú-ngõ tõ-iā kâi sî-hāu, ũ-kâi ka-lau̍h tõ lōu-kîⁿ, pue-chiáu kàu chiũ chĩn-chia̍h--khṳ̀. [5] Iā ũ pa̍t-kâi ka-lau̍h tõ chie̍h-pûaⁿ-téng kâi tī, tõ-hṳ́-kò thôu bô-tsōi; in-ũi thôu m̄-chhim sûi-sî chiũ huat: [6] ji̍t che̍k-ē chiẽⁿ, chiũ pha̍k-tiāu; in-ũi bô-kṳn chiũ ta--khṳ̀. [7] Ũ pa̍t-kâi ka-lau̍h tõ chhì-phè--tang, chhì-phè huat--khí-lâi chia-tiāu i, chiũ bõi kit-si̍t. [8] Iā ũ pa̍t-kâi ka-lau̍h tõ hó kâi thôu-tī, chiũ kit-si̍t, sĩ huat-khí-lâi chiũ chiām-chiām tūa, chiũ ũ kit-si̍t saⁿ-tsa̍p-pũe, la̍k-tsa̍p-pũe, che̍k-peh-pũe. [9] Iũ tàⁿ, Sûi tî-tîang ũ hĩⁿ hó-thiaⁿ, chiũ tie̍h-thiaⁿ.

[10] Iâ-sou to̍k-tõ kâi sî-hāu, kṳn-tùe kâi nâng kũa tsa̍p-jī mn̂g-thû mn̄g I chiàⁿ-kâi phì-zũ kâi ì-sṳ̀. [11] Iâ-sou kāng-in tàⁿ, Siãng-tì kok kâi àu-biāu chiũ pun nín: zûi-to̍k tõ-gūa kâi nâng, kak-sṳ̄ chiũ-sĩ ēng-tsò phì-zũ: [12] sái in thóiⁿ, thóiⁿ bô-kìⁿ, thiaⁿ, thiaⁿ bô-mêng; khióng-ùi in huán-hùe tit--tie̍h sià-mién.

[13] Iũ kāng-in tàⁿ, Chí-kâi phì-zũ nín sĩ m̄-hiáu, mé? tsãi-tit õi-hiáu tsùaⁿ-kâi phì-zũ? [14] Tõ pùa-chéng kâi nâng chiũ-sĩ pùa-tãu. [15] Hṳ́-khí ũ tãu pùa tõ lõu-kîⁿ kâi, chiũ-sĩ nâng thiaⁿ-tãu, Sat-tãn sûi-chiet chiũ kàu, chhiéⁿ-tiāu in--kò só-pùa kâi tãu. [16] Hṳ́-khí iā tõ chie̍h-pûaⁿ-téng kâi tī, chiũ-sĩ nâng thiaⁿ-tãu sûi-chiet chiũ huaⁿ-hí na̍p-siũ; [17] nā-sĩ lãi-tói bô-kṳn, chiũ-sĩ chiãm-tshûn tiāⁿ-tiāⁿ; ki̍p-kàu ũi-tie̍h tãu khóu-lān khún-to̍k -khí--lâi; sûi-chiet chiũ that-pua̍h. [18] Ũ che̍k-khí-nâng tǹg-zû iā tõ chhì-phè--kâi; [19] in sĩ thiaⁿ-kùe-tãu, nā-sĩ chí sì--kan kâi jiáu-tsa̍p, tshâi-mue̍h kâi hun-mî, kũa pa̍t-mue̍h kâi tham-io̍k, ji̍p--lâi, chia-tiāu tãu, i chiũ bõi kit-sit. [20] Hṳ́-khí iā tõ hó kâi thôu-tī kâi; chiũ-sĩ nâng thiaⁿ-tãu, na̍p-siũ, chiũ kit-sit, ũ saⁿ-tsa̍p-pũe, la̍k-tsa̍p-pũe, che̍k-peh-pũe.

[21] Iâ-sou iũ tùi-in tàⁿ, Nâng khiâ teng-húe kàu--lâi, khá-sĩ àiⁿ-pàng tõ táu-ẽ, ho̍k-sĩ tshn̂g-ẽ, khá-m̄-sĩ pái-pàng thâi-téng, né [22] In-ũi bô-ũ tshâng-khǹg kâi sṳ̄ m̄ àiⁿ hiéⁿ-mêng; iā bô-ũ àm-chẽⁿ kâi sṳ̄ m̄ àiⁿ tshut-hīn. [23] Iā-sĩ ũ hĩⁿ hó-thiaⁿ chiũ tie̍h-thiaⁿ.

[24] Iũ kāng-in tàⁿ, Nín só-thiaⁿ kâi tie̍h kṳ́-sín: nín ēng sĩ-mih-tōu niêⁿ-pun nâng, chiũ àiⁿ chiang chí-kâi tōu lâi-niêⁿ-pun nín: iā pit-tiāⁿ thiⁿ-ke pun nín. [25] Uân-khî ũ--kâi nâng, pit-tiāⁿ sṳ̀-pun i: bô-ũ--kâi, liên-kũa i só-ũ--kâi iā pit-tiāⁿ to̍h-tńg--lâi.

[26] Iũ tàⁿ, Siãng-tì kok chhin-chhiẽⁿ nâng iā-chéng tõ tī; [27] mê khṳ̀-u̍t, ji̍t tsáu-khí, chéng-chí huat-khí-lâi chiãm-chiãm tūa, i m̄-tsai tsò-nî õi. [28] Tī tsṳ̃-jiên seⁿ mue̍h-súaⁿ; khí-thâu huat-miâu, ãu thòu-sūi, ki̍p-ãu sūi chiũ sêng-lia̍p. [29] Kàu se̍k--liáu, i chiũ sái liâm-to, in-ũi siu-tang kâi sî-hāu kàu--liáu.

[30] Iâ-sou iũ tàⁿ, Nán tie̍h chiang sĩ-mih-kâi lâi pí Siãng-tì kok? tie̍h ēng sĩ-mih phì-zũ lâi piáu-mêng? [31] Sĩ chhin-chhiẽⁿ che̍k-lia̍p kài-lua̍h-chí, iā lo̍h-tī, sui--sĩ sòi kùe tī-chiēⁿ peh-iēⁿ chéng-chí, [32] nā-sĩ íⁿ-keng iā--lo̍h-khṳ̀ chiũ huat-khí, tūa kùe kak-iēⁿ kâi tshài, iũ khui tūa-ki; thiⁿ-tang kâi chiáu hó-hiah tõ i ìm-ẽ.

[33] Iâ-sou siet chiè-seⁿ kâi phì-zũ tsōi-tsōi, lâi thuân-tãu pun in thiaⁿ, chiè in só õi-thiaⁿ--kâi: [34] m̄-sĩ phì-zũ chiũ bô tùi-in tàⁿ: tõ-lãi kâi sî-hāu lóng-tsóng kāng ka-kī kâi mn̂g-thû kói-thiah.

[35] Hṳ́-ji̍t háⁿ-àm, Iâ-sou tùi-in tàⁿ, Lâi kùe--khṳ̀ hièⁿ-pôiⁿ. [36] Lī-khui chèng-nâng, in chiũ tsài Iâ-sou tsò-pû tõ-tsûn hièⁿ-seⁿ chiũ khṳ̀. Iā ũ pa̍t-kâi-tsûn kāng I tsò-pû. [37] Khuâng-huang tãi-khí, tsúi-éng thiàu ji̍p tsûn, tì-kàu tsûn àiⁿ-múaⁿ. [38] Iâ-sou ka-kī tõ tsûn-búe, khùa chím-thâu tõ u̍t: mn̂g-thû hàm-chhéⁿ I, chiũ kāng I tàⁿ, Sin-seⁿ, ún mi̍t-buâng lṳ́ bô kài-ì, héⁿ? [39] Iâ-sou chhéⁿ--khí-lâi, tuah-huang, tùi-hái tàⁿ, Tiām-tiām, uaⁿ-chẽⁿ. [40] Huang chiũ hiah, iũ tūa-ē phêng-chẽⁿ. Chiũ tùi mn̂g-thû tàⁿ, Nín tsò-nî kiaⁿ? nín huân-liáu būe-ũ sìn, héⁿ? [41] In chiũ tūa-ē kiaⁿ-kũ, jī-ke kàu-niêⁿ, tàⁿ, Chiá sĩ-mih nâng, héⁿ, liên huang kũa hái iā sũn I?

5

[STOP pg. 69]

Sài-thû Hẽng-tn̄g.

1

Thî-o-hui-lô a, uá tsò hṳ́-kâi tsôiⁿ-tsṳ sĩ lũn Iâ-sou khí-thâu kiâⁿ-sṳ̄ kà-hùe, [2] chì-kàu thoh Siàⁿ-sîn hiáu-zũ só-suán kâi sài-thû tsṳ-ãu, pĩ ín-chiap chiẽⁿ-thiⁿ kâi ji̍t, chí chiàⁿ-kâi-sṳ̄: [3] Iâ-sou siũ-hāi tsṳ-ãu iā ũ ke-ke chèng-kṳ̃ hién ka-kī seⁿ-ua̍h tõ-kò pun sài-thû thóiⁿ-kìⁿ, hién-hīn pun in thóiⁿ ũ sì-tsa̍p ji̍t tsṳ-kú, káng-lũn Siãng-tì kok kâi sṳ̄: [4] kāng sài-thû tâng tsũ-chi̍p chiũ hun-hù in, tàⁿ, Mài lī-khui Iâ-lũ-sat-léng, tie̍h hāu-thãi Pẽ soiⁿ só èng-hṳ́, chiũ-sĩ nín pat-thiaⁿ uá tàⁿ--kâi: [5] in-ũi Iak-hân sĩ ēng-tsúi si-sói; nā-sĩ nín ke bô kúi-ji̍t pit-tiāⁿ tõ Siàⁿ-sîn niáⁿ-sói.

[6] In tsũ-chi̍p tõ-kò chiũ mn̄g I, tàⁿ, Tsú, lṳ́ àiⁿ chiang kok-pèⁿ kui-ho̍k Íⁿ-sek-lie̍t sĩ tõ-chí-hûe a m̄-sĩ? [7] I chiũ tùi-in tàⁿ, M̄-hó pun nín tsai sî-ji̍t kũa tiāⁿ-khî, chiũ-sĩ Pẽ chip ka-kī kâi khuân só tsú-tiāⁿ--kâi. [8] Nā-sĩ Siàⁿ-sîn kàng-lîm nín, nín chiũ tit-tie̍h ũ khuân: chiũ ũi-tie̍h uá tsò chèng-kṳ̃, tõ Iâ-lũ-sat-léng, pìn Iû-thài, Sat-má-lĩ-a, chì-kàu tī-ke̍k.

[9] Íⁿ-keng tàⁿ chí-kâi-ūe liáu, huàⁿ-nâng chiàⁿ tõ-thóiⁿ, I chiũ pĩ ín-chiap tõ-chiēⁿ: iā ũ hûn lâi-chia I, bô khṳt in thóiⁿ-kìⁿ.

[10] I tõ seng-chiẽⁿ kâi sî-hāu, in chiàⁿ-nâng tsuan-tsuan tõ mōⁿ thiⁿ, hut-jiên ũ nõ-nâng chhēng pe̍h-saⁿ khiã tõ in sin-piⁿ; [11] chiũ tàⁿ, Ka-lĩ-lĩ nâng, nín tsò-nî khiã tõ mōⁿ thiⁿ, né? chí-kâi Iâ-sou tshông-tõ nín--kò chièⁿ-seⁿ pĩ ín-chiap chiẽⁿ-thiⁿ, iā-àiⁿ chièⁿ-seⁿ tsài-lâi, chhin-chhiẽⁿ nín thóiⁿ-kièn I seng-thiⁿ che̍k-iēⁿ.

[12] Aũ in chiũ tshông hṳ́-kâi suaⁿ, miâⁿ kiè-tsò Kaⁿ-náⁿ suaⁿ, tò-tńg--lâi Iâ-lũ-sat-léng, chí-kâi suaⁿ kṳ̃n Iâ-lũ-sat-léng, lî ũ che̍k an-sek-ji̍t kâi lōu-thâu. [13] Ji̍p-lâi-kàu, chiẽⁿ-khṳ̀ in só khiã-khí kâi lâu-téng; chiũ-sĩ ũ Pí-tit, kũa Iak-hân, kũa Iá-kok, kũa An-tit-lie̍t, Hui-le̍k kũa To-má, Pa-to-lô-mái kũa Má-thài, A-le̍k-hui kâi kiáⁿ Iá-kok, kũa Si-mn̂g, chheng-tsò Zũe, kũa Iá-kok, kâi kiáⁿ Iû-tã. [14] Chí chiàⁿ-nâng kāng sù-kâi hũ-jîn, kũa Má-lĩ-a, sĩ Iâ-sou kâi a-bó, kũa I kâi hiaⁿ-tĩ lóng-tsóng tsuan-sim tâng-ì tõ khî-táu.

[15] Tng-sî ũ nâng tsũ-chi̍p sêng-khûn, iak-lia̍k ũ che̍k-peh jī-tsa̍p miâⁿ, Pí-tit tõ chèng hiaⁿ-tĩ--tang khiã--khí-lâi, tàⁿ,

[16] Hiaⁿ-tĩ a, Siàⁿ-sîn soiⁿ-tsá thoh Tã-phek kâi tshùi só-tàⁿ lũn-ki̍p Iû-tã, chiũ-sĩ kāng lia̍h Iâ-sou kâi nâng tshūa-lōu--kâi, chí-kâi-tsṳ ũ èng-ngiām sĩ pńg-téng. [17] In-ũi chí-kâi-nâng sĩ sǹg tõ nán siàu-lãi, tit ũ hūn tõ nán chí-kâi-cheh. [18] (Chí-kâi-nâng chiang tsò-put-ngĩ só-tit-siéⁿ kâi lĩ bói-tī; tò-thâu pua̍h --lo̍h-khṳ̀, tóu phùa, i-kâi-tn̂g lóng-tsóng lâu--tshut-lâi.

[19] Chí-kâi-sṳ̄ Iâ-lũ-sat-léng kâi kṳ-mîn lóng-tsóng tit-tsai; kù-tshṳ́ in-kâi thóu-thâm hṳ́ che̍k-kò-tī chiũ kiè-tsò A-kek-tã-má, chiũ-sĩ Hueh-tī.) [20] Chiũ-sĩ Si-phien só-tsài,

I kâi tshù tie̍h huang-hùi,

Bô-nâng khiã-khí tõ-kò:

Iũ tàⁿ,

I kâi cheh-hūn tie̍h pa̍t-nâng tng.

[21] Taⁿ tshông-tõ nán tâng-phũaⁿ kâi nâng, chiũ-sĩ thàng Tsú Iâ-sou tõ nán--tang tshut-ji̍p kâi sî-hāu, [22] tsṳ̃ Iak-hân si-sói khí-thâu, kàu Tsú lī-khui nán pĩ ín-chiap tõ-chiēⁿ hṳ́-ji̍t, taⁿ khî-tang tie̍h che̍k-nâng kāng-nán pêⁿ-tâng lâi-chèng-kṳ̃ I kâi ho̍k-ua̍h.

[23] In chiũ kṳ́-khí nõ-nâng, chiũ-sĩ Iak-sek, iũ miâⁿ tsò Pa-sat-pa, pie̍t-hō Iû-sṳ̃-tu, kũa Má-thî-a. [24] Chiũ khî-táu, tàⁿ, Tsú, lṳ́ tsai chèng-nâng kâi sim, chí nõ-nâng--tang [25] khiû lṳ́ chí-mêng lṳ́ sĩ suán tî-che̍k-nâng lâi-kṳ chí-kâi chip-sṳ̃ sài-thû kâi ūi, uân-in Iû-tã lī-khui chí-kâi-ūi khṳ̀ ka-kī kâi ūi. [26] Chiũ kāng-in iê-chhiam; chhiam sĩ iê-tie̍h Má-thî-a; i chiũ kāng tsa̍p-it kâi sài-thû sǹg-tsò tâng-téng.

2